APOCALIPSIS 13 - Nuevo Testamento en Quichua Cañar 1996

Manchana ishcai animalta ricushcamanta

1Mama cucha yacumantaca shuc manchana animal llucshictami ricurcani. Chai animalca canchis umayuc, chunga gachuyucmi carca. Chai gachucunapica coronatami charirca. Shinallatac umacunapica: “Ñucami Dios cani” nishpa, Diosta p'iñachishpa quillcashcatami charirca.

2Chai ñuca ricushca manchana animalca tigreman ricchami carca. Chaquica osopac chaqui shinami carca. Shimipish leonpac shimi shinami carca. Dragonmi pai shina mandashpa tiyarinatapish, imata ruhuaclla canatapish, shinallatac mandanatapish chai manchana animalman curca.

3Chai animalpac umacunapuramanta shuc umaca yallita chugrishca cashcamanta huañunallami carca. Chai chugri alli tucucpimi, tucui cai pachapi causaccunaca mana amirishpa chai animalta c'atircacuna.

4Chai animalman imatapish ruhuaclla canata cushcamantami, dragontaca “allimari cangui” nircacuna. Chai manchana animaltapish alli nishpaca:

—Cai animal shinaca pipish mana tiyanchu. ¿Paihuanca pitac macanacungayari?— nircacuna.

5Chai manchana animalca Dios shina tucushpa “allimari cani” nishpa Diosta rimachunpish, shinallatac chuscu chunga ishcai quillata mandachunpish, Taita Diosca saquircami.

6Shina saquicpimi Taita Diostapish mana alli nishpa, paipac huasitapish, shinallatac jahua pachapi causaccunatapish c'amishpa rimarca.

7Shinallatac Diospaclla caccunahuan macanacuchunpish, mishachunpish saquircami. Tucui aillucunata, tucui laya rimaita rimaccunata, tucui laya gentecunata, shinallatac tucui cai pacha llactacunata mandachunpish saquircami.

8Tucui cai pachapi causaccunami chai animaltaca “allimari cangui” ningacuna. Chaicunaca cai pachata Taita Dios ruhuashca punzhamanta pacha huiñaita causangapac quillcachina libropi mana quillcashcachu can. Chai librotaca huañuchishca cac Pactalla Ovejami*f** charicun.

9Maijanpish rinrita chariccunaca caita uyaichic:

10Maijanpish prezu apana cacca

prezu apashcami canga.

Shinallatac espadahuan huañuchina cacca

espadallahuantacmi huañuchishca canga.

Chashna tucucpimi Diospaclla caccunaca Diosta tucui shunguhuan crishpa c'atina can.

11Chai q'uipaca cutin shuc manchana animaltami allpa ucumanta llucshicta ricurcani. Chai animalca ovejapac gachu shina ishcai gachucunatami charirca, shinallatac dragón shinami rimarca.

12Chai animalca punta animal shinallatacmi paipac ñaupapica imatapish mandaclla carca. Paica huañunalla chugrishca, alli tucushca punta animaltami cai pachapi causaccunataca “allimari cangui” nichun nirca.

13Pi mana ruhuaipaccunatapish ruhuashpa ricuchishpami, jahua pachamantapish ninata tucui gentecunapac ricuipi urmachic carca.

14Punta shamuc animalpac ñaupapi chai manchana animal chashna ruhuashpa ricuchichunpish, cai pachapi tucui causaccunata llullashpa crichichunpish Diosca saquircami. Shina saquicpica: “Chai punta animalca espadahuan huañunallatac chugrichishca cashpapish, causashpa c'atinmi” nishpami, chai animalman ricchata ruhuachunpish mandarca.

15Taita Diosca q'uipa animaltaca punta animalman ricchata ruhuashca animalman causaita cuchun, rimachichun, shinallatac paita mana “allimari cangui” niccunata huañuchichunmi saquirca.

16Chashna saquicpimi uchilla cachun, jatun cachun, huaccha cachun, chayuc cachun alli lado maquipi, mana cashpaca frentepi unanchishca cachun mandarca.

17Maijanpish chai unanchita mana charicca c'atunatapish, randinatapish mana pudircachu. Chai unanchica animalpac shuti, mana cashpaca chai animalpac shutipac yupaimi carca.

18Maijanpish alli yachacllami, chai animalpac yupai ima nicushcataca yachanga. Chai animalpac yupaica sucta pasac sucta chunga suctami. Chai yupaica shuc runapac shutitami nisha nin. Chaitaca alli yachaccunallami yachac chayanga.