1 CORINTIOS 2 - Nuevo Testamento en Quichua Cañar 1996

Cristo cruzpi huañushcata Pablo huillashcamanta

1C'uyashca criccuna, Taita Diosmanta pimanpish mana huillashcata ñuca huillangapac cancunapacman rishpaca, yachac tucushca rimaicunahuanca mana huillarcanichu.

2Shinallatac ñuca cancunahuan cashpaca, ima shuctac yachanata mana munashpami, Jesucristo yuyailla cashpa, pai cruzpi huañushcamanta ashtahuan yachanata munarcani.

3Cancunahuan cashpaca, manchaihuan imapacpish mana valic shina, chucchucucmi carcani.

4Cancuna crichunca, imata parlashpapish, alli huillaita huillashpapish, jatun yachac tucushca rimaicunahuanca mana huillarcanichu. Chaipac randica Taita Diospac Espíritu imatapish ruhuaclla cashcata ricushpami, ñuca huillacpica crircanguichic.

5Gentecuna yuyashca shina cancuna ama crichun, ashtahuanpish imatapish ruhuaclla Taita Diosmanta crichunmi, chashnaca huillarcani.

Diosca paipac Espirituhuan yuyaita cuc cashcamanta

6Shina cashpami ña sinchi criccunapura cashpaca, yachac tucuna rimaicunahuan rimanacunchic. Ashtahuanpish cai yachac tucuna rimaicunaca mana cai pachamantachu, mana jatun mandaccunamantachu. Mandaccunaca chingariccunallami.

7Ñucanchicca huiñaita sumac llactapi causagrichunmi, pipish mana yachashca, cai pachata Taita Dios manarac ruhuashpa, huacaichishpa charicushca yachaicunata huillacunchic.

8Chaita mana yachashcamantami, cai pacha mandaccunaca Apunchic Jesustaca chacatarcacuna. Paicuna yachashca cashpaca, sumaimana Apunchic Jesustaca mana chacatanmanchu carcacuna.

9Ashtahuanpish Dios quillcachishcapica:

“Imapish mana ricushcata,

mana uyashcata

shinallatac jaicapi

mana yuyashcatami,

paita c'uyaccunamanca

Taita Diosca cusha nicun” ninmi.

10Caicunataca Taita Diosmi paipac Espirituhuan yuyaita cushpa, ñucanchicman yachachishca. Diospac Espiritumi Taita Dios imata yuyacushcatapish yachan.

11Shungupi imata yuyacushcataca gentecunapurallapica pi mana yachanchu, ashtahuanpish paipac shungupi cac espiritullami yachan. Chai shinallatacmi Dios imata yuyacushcataca gentecunaca mana yachan, chaitaca Diospac Espiritullami tucuita yachan.

12Ñucanchicca mana cai pachapaclla cac espiritutachu chasquircanchic, ashtahuanpish Dios cushca Espiritutami, pai c'uyashpa yachachishcacunata entendingapac chasquircanchic.

13Chashna cashpami ñucanchicca mana ñucanchic yuyaillamanta rimanchic, ashtahuanpish Diospac Espíritu yuyaita cushcallatac rimanchic. Shina cashpami Diosmanta yuyaita cushpa, paipac Espíritu yuyaita cushcallata Diosmanta yachanata munaccunamanca yachachinchic.

14Diospac Espiritumanta yachanata mana munacca, pai cushcacunataca mana chasquisha ninchu. Chaicunaca paimanca pucllashca shinami. Shinallatac imata nisha nicushcatapish mana entendinchu. Chaitaca Diospac Espíritu yuyachicllapimi, yachac chayancuna.

15Ashtahuanpish Diospac Espiritumanta yachanata munacca alli cashcatapish, mana alli cashcatapish yachanmi. Paitaca pi imata mana ni pudinchu.

16Dios quillcachishcapica: “Mandac Diospac yuyaitaca, ¿pitac ricsingayari? Shinallatac paitaca, ¿pitac yachachingayari?” ninmi.

Shina cacpipish ñucanchictaca Cristomi yuyaita cushpa yachachicun.