HEBREOS 4 - Nuevo Testamento en Quichua Cañar 1996

1Chashna cashcamanta chai samarinapi Dios ñucanchicta yaicuchisha nicucpirac, allita yuyarichic. Cancunapuramanta shucllapish pacta yaicunata mana charic shina saquiringuichicman.

2Paicuna shinallatacmi ñucanchicpish alli huillaitaca chasquircanchic. Shina cashpapish paicunaca alli huillaita cazushpa, criccunahuan mana tandanacurcachu. Chaimantami paicuna alli huillaita chasquishcaca, paicunamanca yangalla carca.

3Shina cacpipish ñucanchicca crishcamantami, Taita Dios cusha nishca samarinamanca yaicushun. Samarinamanta Taita Dios rimashpaca:

“Ñuca p'iñarishpaca:

‘Ñucahuan samaringapacca

manatac yaicungacunachu’ nircani” ninmi.

Shina nishpaca, Taita Diosca cai pachata ruhuashca q'uipa samarishcatami nisha nin.

4Dios quillcachishcapi samarina punzhamanta maipitapishcharica:

“Diosca tucui imallata

ruhuashca q'uipaca,

canchis punzhapica samarircami” ninmi.

5Shinallatac cutinmi Dios quillcachishcapica:

“Ñucahuan samaringapacca

manatac yaicungacunachu” nicun.

6Alli huillaita ñaupaman uyaccunaca, paicuna mana cazushcamantami mana yaicurcacuna. Chaimanta chai samarinaman yaicunaca tiyanracmi.

7Chaimantami Taita Diosca samaringapac shuc punzhata acllashca. Chai punzhaca cunanmari. Chai huillacushcamantaca tauca huatacuna q'uipami Davidca:

“Dios ima nishcata

cunan cancuna uyashpaca,

ama shunguta

sinchiyachichicchu” nishca.

8Israelcunaman chai samarinata Josué cushca cacpica, cutin Taita Diosca: “Q'uipa punzhapi samarinata cushami” nishpaca, mana ninmanchu carca.

9Shina cashcamantami Taita Diospac huahuacunamanca shuc samarina tiyan.

10Dioshuan samaringapac maijanpish yaicuccunaca, Taita Dios pai imata ruhuashcamanta samarishca shinami, paicuna imata ruhuashcamantapish samaringacuna.

11Chai ñaupa mana cazuccuna shina shucllapish ama chashna tucungapacca, mana saquirishpami chai samarinaman yaicungapac ñucanchicca c'atirana canchic.

12Dios rimashca shimica causacmi. Tucui imatapish ruhuacmi. Ishcai filoyuc espadacunatapish yalli filoyucmi. Shina cashcamantami almatapish, espiritutapish, mucucunatapish, tullu ñutcutapish chaupishpa, yaicuipaclla can. Shinallatac shungu imata munashcatapish, yuyashcatapish ricuchinmi.

13Taita Dios tucui ruhuashcacunaca paipac ñaupamantaca mana miticuipacmi. Tucui imapish paipac ñaupapica mana pacashcachu. Paimanmi ñucanchicca tucui imatapish huillana canchic.

Jesusca curacunata jatun mandac cura cashcamanta

14Taita Diospac Churi Jesusca curacunata jatun mandac cura cashpami, ñucanchicmanta Diospacta ruhuangapac jahua pachaman yaicurca. Chaimantami ñucanchicca crishpa, c'atirana canchic.

15Paica ñucanchicmanta Diospacta ruhuac curacunata jatun mandac cura cashpami, ñucanchic mana c'atinata pudicucpipish llaquin. Paitapish ñucanchicta shinallatacmi, mana alli yuyaicunaca pandachisha nirca. Shina cacpipish jaicapi mana juchallircachu.

16Chaimanta c'uyac Dios ñucanchicta llaquichun, shinallatac ima llaquihuan cacpipish paipac jatun c'uyaimanta ayudachun, paipacman tucui shunguhuan cuchuyashpa mañashunchic.