HEBREOS 2 - Nuevo Testamento en Quichua Cañar 1996

Sumac quishpirinata mana cungarinamanta

1Chai shina cashcamantami alli ñanta chingachic shina mana pandaringapacca, ñucanchicca alli huillaita uyashcataca ashtahuan alli crishpa, chai yuyailla cana canchic.

2Ñucanchic ñaupa taitacunaman angelcunata cachashpa, Taita Dios paipac mandashcacunata huillachishpaca, chashnatac cashcatami ricuchirca. Shinallatac maijanpish juchallishpa mana cazuccunataca, llaquichina cashca shinallatacmi llaquichishca carca.

3Shina cacpica cai sumac quishpirinamanta huillashcata yangapi churashpaca, ¿ima shinatac jatun llaquimanta quishpirishunyari? Cai quishpirinataca Apunchic Jesusmi punta huillarca. Chaimantami pai huillashcata uyaccunaca chashnatac cashcata yachashpa, ñucanchicman huillarca.

4Taita Diospish pi mana ruhuaipaccunata, pi mana ricushcacunata ruhuashpa, shinallatac pai munashca shina imatapish ruhuachun paipac Espiritutaca cushpami, chashnatac cashcata ricuchirca.

Jesucristoca ñucanchicta Quishpichic cashcamanta

5Taita Diosca ñucanchic parlacushca, chai shamuna cashca mushuc llacta mandanataca, mana angelcunamanchu curca.

6Ashtahuanpish Dios quillcachishcapica maijancharimi cashna nin:

“¡Taita Dioslla! Gentecunataca,

¿ima cacpitac yuyaringuiyari?

Huañuclla runataca,

¿ima nishpatac llaquinguiyari?

7Asha punzhacamanllami paitaca

angelcunamanta yangallata ruhuashcangui,

ashtahuanpish paimanca sumac

alli nishca canatami cushcangui.

Can imata ruhuashcacunata

mandactapish paitaca ruhuashcanguimi.

8Pai tucuita mandachunmi,

paipac chaqui sarunapi churashcangui” ninmi.

Taita Diosca chashna tucuita pai mandachun churashpaca, shucllatapish pai mana mandashca cachunca mana ch'icanyachircachu. Shina cashpapish pai mandashpa, tucuita cazuchicuctaca manarac ricunchicchu.

9Ashtahuanpish Jesustaca, ashacamanlla angelcunamanta asha yangallata ruhuashpa, cunanca llaquita apashpa huañushcamanta Taita Dios sumac alli nishcata ruhuashcatami ricunchic. Taita Diosca tucui mashnata c'uyashcamantami, Jesús tucuipac allipac huañuchun nicpi paica huañurca.

10Tucui ima tiyashcatapish Diosmi ruhuashca. Chaimantami tucui imapish paipaclla can. Taita Diosca tucui paipac huahuacuna paipac sumaimana cushicuita japichunmi munan. Chaimantami Diosca paicunata Quishpichic Jesucristotaca, pai llaquita apashcamanta sumacyachirca.

11Paica Diospacllata ruhuacmi. Paipish, Diospacllata ruhuashcacunapish shuc Taitapac huahuacuna shinami canchic. Chaimantami Jesusca “ñuca huauquicuna, ñuca panicunami canguichic” ninataca, mana pinganachin.

12Dios quillcachishcapica:

“Canmantami

ñuca huauquicunamanca huillachisha,

shinallatac sumac cantotami

tandanacushcacunapac chaupipica cantasha” ninmi.

13Shinallatac Dios quillcachishcapica:

“Paipi shunguta churashpami shuyasha” ninmi.

Shinallatac:

“Caipica Taita Dios cushca

huahuacunahuanmi cani” ninmi.

14Ima shinami shuc taita mamapac huahuacunaca shuc aichalla, shuc yahuarlla shina can, chai shinallatacmi Jesuspish ñucanchic shina aichayuc, yahuaryuc carca. Shina cashpami huañuiman apac diablotaca pai huañushpa chingachirca.

15Chai shina huañushpami, tucui causaipi huañuita manchashpa, huatashca shina causacuccunataca cacharichirca.

16Chashna cashcamantaca angelcunata ayudangapacca mana shamurcachu, ashtahuanpish taita Abrahampac huahua huahuacunata ayudangapacmi shamurca.

17Chai shina ayudangapacmi, paipac huauquicuna shina tucuna carca. Chai shina tucushpaca, tucui gentecunapac juchacunata anchuchingapacmi, allita pactachic, tucuita llaquic, Diospacta ruhuac curacunata jatun mandac cura tucurca.

18Shinashpaca, diablo pandachisha nicucpi pai llaquita apashpa mishashcamantami, maijantapish chai shina llaquicuna japicpipish, paillatac cunanca mishachingapac ayudacun.