APOCALIPSIS 3 - Nuevo Testamento en Quichua Cañar 1996

Sardis pueblopi cac tandanacushca criccunaman huillashcamanta

1Sardis pueblopi cac tandanacushca criccunata ricuc angelmanpish cashna nishpa quillcai: Diospac canchis Espirituta shinallatac canchis lucerota charicucca, cashnami nini: Ñucaca cancuna imata ruhuacushcatapish, shinallatac ‘causacunmi’ nishca cashpapish huañushca shina cashcatami yachani.

2Cancuna ima ruhuashcacunapish ñuca Diospac ñaupapica manarac allitac cashcatami ricuni. Chaimanta cancunapac allita ruhuana munaicuna amarac tucuricpi, riccharic shina cutin sinchiyashpa, maipi mana alli ruhuacushcataca allichichic.

3Callaripi ima shina yachacushcataca yuyarishpa, Diosman cutirishpa c'atiraichic. Cancuna mana yuyarishpa Diosman mana cutiricpica, cancuna mana yuyashca horasmi shuhua shamuc shina cancunapacman shamusha.

4Shina cashpapish Sardis pueblopi causac cancunapurapica, churanacunata mana mapayachishcacunaca taucacunami tiyan. Paicunaca japina cashcamantami, ñucahuan yuraclla churana churashca puringacuna.

5Maijanpish millaita mishaccunami, yuraclla churana churashcaca cangacuna. Paicunapac shuticunataca huiñaita causangapac quillcachina libropi quillcashcatapish mana anchuchishachu, ashtahuanpish ñuca Taitapac, shinallatac paipac angelcunapac ñaupapimi paicunataca ‘ñucapacmi’ nisha.

6Maijanpish rinrita chariccunaca, Diospac Espíritu tandanacushca criccunaman ima nicushcataca uyachun.

Filadelfia pueblopi cac tandanacushca criccunaman huillashcamanta

7Filadelfia pueblopi cac tandanacushca criccunata ricuc angelmanpish cashna nishpa quillcai: Mandac Davidpac llaveta charicuc, pi mana pascaipacta huichcac, pi mana huichcaipacta pascac, cashcata ruhuac jucha illacca cashnami nini:

8Ñucaca cancuna imata ruhuacushcataca tucuimi yachani. Riquichic, cancunapac ñaupapica pi mana huichcaipac punguta shinami ñucamanta huillachunca pascashpa churashcani. Shina mana tucuita ruhuaipac cashpapish, ñuca nishcataca pactachishcanguichicmi, shinallatac ñucata ‘mana ricsinichu’ ninatapish mana nishcanguichicchu.

9Ñucaca Satanaspac*f** tandanacuimantami maijan manapish israelcuna*f** cashpa, ‘israelcunami canchic’ nishpa llullaccunataca cancunapac ñaupapi cungurichisha. Chashna ruhuacpimi ñuca cancunata c'uyashcataca yachangacuna.

10Cancuna ñuca mandashcacunata pactachinataca ‘saquishallami’ ninataca mana nishcanguichicchu. Chaimantami shamuc punzhapi cai pachapi causaccuna ima shina cashcata ricungapac llaquicuna shamucpi, cancunatapish huacaichisha.

11Cancunaman ñuca cusha nishcata ama pi quichuchun, ñucata c'atiranguichic. Ñucaca ñallami shamusha.

12Maijanpish millaita mishaccunamanca, ñuca Diosman mañana huasi ucupi cac pilar shina canatami cusha. Chaimantaca jaicapi mana llucshingacunachu, shinallatac paicunapica ñuca Diospac shutitapish, ñuca Diospac pueblopac shutitapish quillcashami. Chaica jahua pacha Taita Diospacmanta shamuc mushuc Jerusalenmi canga. Shinallatac paicunapica ñucapac mushuc shutitapish quillcashami.

13Maijanpish rinrita chariccunaca, Diospac Espíritu tandanacushca criccunaman ima nicushcataca uyachun.

Laodicea pueblopi cac tandanacushca criccunaman huillashcamanta

14Laodicea pueblopi cac tandanacushca criccunata ricuc angelmanpish cashna nishpa quillcai: Taita Dioshuan cai pachapi tucui ima tiyashcatapish ruhuac, mana llullashpa imatapish cashcata nic, imatapish pactachicca, cashnami nini:

15Ñucaca cancuna imata ruhuacushcataca tucuimi yachani. Cancunaca chiripish, rupacpish mana canguichicchu. Cancunaca chiri cashpapish chirilla cashpa, rupac cashpapish rupaclla chashpachari alli canguichicman.

16Shina rupacpish, chiripish mana cashpa cunuclla cacpica, shungu tigrashami.

17Shina cashpapish cancunaca ‘chayuccunami canchic, imapish mana illanchu, tucuipimi alli ricurinchic’ nishpami niricunguichic. Cancunaca imatapish mana charic, lluchulla, ñahui mana ricuc, misa, pipish mana c'uyashca cashcataca mana yachanguichicchu.

18Chaimantami ñucaca: ‘Ninapi rupachishca curita ñucamanta randishpa chayucyaichic’ nini. Shinallatac: ‘Cancuna lluchulla pingailla cashcata ama pi ricuchun, yuraclla churanata randishpa churarichic’ ninimi. ‘Ñahui alli ricuchunpish, jambita randishpa churarichic’ ninimi.

19Ñucaca tucui c'uyashcacunatami rimanipish, llaquichinipish. Chaimanta cancuna juchayuc cashcamanta llaquirishpa Diosman cutirishpa, shuc shungulla caichic.

20Riquichic, ñucaca ‘huasiyuc’ nishpami pungupi huactashpa shayacuni. Maijanpish ñuca rimashcata uyashpa punguta pascacpica, paipacman yaicushpa paihuan micushami. Paipish ñucahuan micungami.

21Ima shinami millaita ñuca mishashpa ñuca Taita mandashpa tiyarinapi paihuan mandangapac tiyarircani, chai shinallatacmi maijanpish millaita mishaccunamanca ñucahuan mandachun ñuca mandashpa tiyarinapi ñucahuan tiyarichun cusha.

22Maijanpish rinrita chariccunaca, Diospac Espíritu tandanacushca criccunaman ima nicushcataca uyachun” nirca.