1 TIMOTEO 6 - Nuevo Testamento en Quichua Cañar 1996

1Amo randishcamanta huatashca shina serviccunata, paicuna Diosta cric cashcamanta paicunapac amocunata alli cazuchun yachachingui. Chashna cazucpimi, Taita Diostapish shinallatac ñucanchic yachachishcatapish mana allichu nishpa pi mana rimangacuna.

2Shinallatac maijan servicpish, Jesusta cric amocunata servicushpaca, “cric amollami” nishpa mana cazuna yuyaita ama charichun yachachingui. Ashtahuanpish chai serviccunataca: “Cancuna c'uyashca cric huauquipacta ruhuacushcamantaca, ashtahuan alli cazunami cangui” nishpami, cunashpa yachachina cangui.

Charishcallahuan cushi canamanta

3Maijanpish ñucanchic Apunchic Jesucristo cashcata nic rimashca shimicunata, shinallatac ñucanchic yachachishcacunata mana allichu nishpa shuctac layaman yachachicca,

4imatapish mana yachac jatun tucushcallami. Paica ima rimashcapish “caica cashnami nisha nin” nishpa, shuccunahuan rimanacushpa p'iñanacunallatami munan. Chashna cacpimi shuccuna ama charichun nishpa munanacuipish, macanacuipish, rimanacuipish, shinallatac imatapish mana crinacuipish tiyan.

5Chaimantami paicunaca imami alli cashcata mana yachashpa, yuyai illac shina tucushpa p'iñanacuncunalla. Paicunaca chayucyana yuyaillahuanmi Diosta cric tucuncuna.

6Chayucyanamanta nishpaca, maijanpish ima charishcallahuan cushi causashpaca, pai crishcamantaca yallita charishca shinami can.

7Ñucanchicca cai pachapi huacharishpaca, imata mana apamushcanchicchu. Shinallatac huañushpapish, cai pachamantaca imata mana apashunchu.

8Shina cashcamantaca ñucanchicca churaringapacpish, micungapacpish charishpaca, cushillami cana canchic.

9Imatapish charina yuyaihuan cacpimi, millai munaicunaca muspachishpa, tucllapi urmachic shina gentecunataca llaquiman apan. Chashnami huiñaita chingarincuna.

10Yallimana cullquita charina munaica tucui laya millaicunapimi urmachin. Chashnami maijancunaca cullquita charinata yallita munashpa, crinatapish saquishpa, tauca llaquicunatapish aparcacuna.

Macanacushpa mishac shina, crishca yuyaihuan atinamanta

11Ashtahuanpish cantaca Diospacta ruhuac cashcamantaca, tucui chai mana allicunamanta anchurichun ninimi. Cantaca cashcata ruhuashpa, Taita Diosllata yuyarishpa, crishca yuyailla c'uyaihuan mana p'iñariclla, shinallatac c'uyac shunguhuan causanata munachunmi nini.

12Huiñai causaita japingapacca, macanacuipi mishac shina crishca yuyaihuan alli c'atingui. Cantaca achcacunapac ñaupapi “tucui shunguhuan crinimi” nicpimi, chai causaita japichun Taita Diosca acllashca.

13Cantaca tucui cai pachapi causaita cuc Taita Diospac ñaupapi, shinallatac mandac Pilatoman cashcata nishpa allitac huillac Jesucristopac ñaupapimi, caicunataca mandani.

14Cantaca ñucanchic Apunchic Jesucristo cutimungacaman, cai tucui ñuca nishcacunata pactachishpa, allita cazushpa ruhuachunmi mandani. Chashna ruhuacpica, pipish mana juchanchingachu.

15Taita Diosca pai acllashca punzha pactacpimi, Apunchic Jesucristotaca cutin cachanga. Taita Diosca mai sumacmi. Paica tucuita Mandacmi. Jatun mandaccunapacpish Jatun Mandacpish, amocunapacpish Jatun Amomi.

16Paillami huiñaita causacca. Paica pipish mana ricuipac luzpi causacmi. Paitaca pipish jaicapi mana ricushcachu, shinallatac mana ricui pudingachu. ¡Paitaca huiñaita alli nishca, tucuita Mandacpish nishca cachun! Chashna cachun.

17Imapish charishcacunaca chingarinallami. Chashna cashcamanta cai pachapi achcata chariccunataca: “Ama jatun tucushpa, charishcapi ama shunguta churangui” nishpa rimangui. Chaipac randica, ñucanchicman imallatapish atic aticta cushpa cushichic Taita Diospi shunguta churachun ningui.

18Chayuccunataca imatapish allita ruhuashpa, mana misarishpa shuccunaman carashpa, chaicunahuan chayuc shina cachun yachachingui.

19Chashna ruhuashpami, q'uipa punzhapi huiñai causaita japingapac ña utcashpa mana chingaric allicunata ruhuacuncuna.

Tucuchingapac Timoteoman mingashcamanta

20Timoteo, tucui canman mingashcacunataca allita huacaichingui nishpami mandani. “Caicunaca alli yachanami” nishpa, p'iñanacuipi churac yanga yachanacunataca pacta uyanguiman.

21Chai yachachishcata c'atishpami, maijancunaca crishcata saquishcacuna. Taita Diosca paipac sumaimana c'uyaita canman cushca cachun ninimi.