3 SAN JUAN 1 - Nuevo Testamento en Quichua Cañar 1996

“Allillachu cangui” nishcamanta

1Criccunata pushac ñucami ñuca tucui shunguhuan c'uyashca Gayoman cai quillcata quillcani.

2C'uyashca Gayo, ima shinami Taita Diospac ñaupapi alli cangui, shinallatac cambac tucui causaipipish alli cachun nishpami, Taita Diosman mañani.

3Maijan criccuna shamushpa “cashcata nic huillashcata uyashpa allimi c'aticun” nishpa canmanta huillacpimi, ñucaca yallita cushicurcani.

4Ñuca huahuacuna cashcata nic huillashcata uyashpa alli c'aticucta yachashpami, tucuimanta yalli cushicuni.

5C'uyashca Gayo, criccunaman allita ruhuacushcamantaca allimi cangui. Shinallatac shuctac llactamanta shamuccunamanpish allitami ruhuacungui.

6Paicunami can ima shina c'uyaita charishcataca tandanacushca criccunapac ñaupapi huillarcacuna. Paicuna ashtahuan Diospacta ruhuashpa purichunmi, imallahuan ayudashpa c'atichun mañani.

7Paicunaca Jesucristomanta huillangapac llucshishpapish, mana criccunamantaca ima ayudashcacunata mana chasquircacunachu.

8Chaimantami ñucanchic criccunaca paicunata imallahuan ayudashpa, cashcata nic alli huillaita huillanata ayudanacuna canchic.

Deótrefes runa mana allita ruhuac cashcamanta,shinallatac Demetrio runa allita ruhuac cashcamanta

9Ñucaca tandanacushca criccunamanmi shuc quillcata quillcarcani. Chashna quillcacpipish Deótrefes runaca pai mandac casha nishpami, ñucanchic yuyaita cushpa quillcashcataca mana chasquisha nirca.

10Chashna cashcamantami ñuca rishpaca, ñucanchicta huashalla parlota ruhuashpa, llullashpa puricuctaca yuyachishpa rimasha. Ashtahuanpish mana chaillatachu ruhuacun. Maijan criccuna pozachichun nicpipish, mana chaquisha ninchu. Shinallatac criccunata chasquishun niccunatapish, tandanacushca criccunamanta llucchishpa cachanmi.

11C'uyashca Gayo, chashna mana alli ruhuaccunataca ama c'atinguichu, ashtahuanpish allita ruhuaccunata c'atingui. Maijanpish allita ruhuacca Diospacmi, ashtahuanpish mana allita ruhuacca Diostaca mana ricsinchu.

12Demetrio runamantaca tucui mashnami alli nincuna. Cashcata nic huillashcapish pai alli cashcatami ricuchin. Shinallatac ñucanchicpish pai ima shina cashcataca huillanchicmi. Ñucanchic huillashca mana llulla cashcataca, cancunallatac yachanguichicmi.

Ña tucuchingapac “allilla causangui” nishcamanta

13Ñucaca achcatami canmanca nisha nini. Chashna cashpapish tintahuan, plumahuan quillcashpallaca mana nisha ninichu.

14Ashtahuanpish canhuan ñahui ñahui cangapacmi, utca shamusha nicuni. Chaipimi ashtahuan parlanacushun.

15Sumac causaita charichunmi munani. Cambac ricsishcacunapish cantaca “allilla causangui” nishpami cachancuna. Ñucanchic ricsishcacunatapish shucllancaman “allilla cashca cachun” ninguiyari.