1 SAN PEDRO 1 - Nuevo Testamento en Quichua Cañar 1996

Caita chaita rishpa causacuc criccunaman Pedro quillcashcamanta

1Ñucaca Jesús acllashca huillac Pedromi cani. Cai quillcataca quiquin llactamanta llucshishpa, caita chaita rishpa, Ponto, Galacia, Capadocia, Asia shinallatac Bitinia llactapi causac criccunamanmi quillcashpa cachani.

2Cancunataca Taita Diosmi ña ñaupamanta pacha pai munashca shina paipac huahuacuna cachun acllashca. Taita Diosca paita c'uyashpa causachun, shinallatac Jesucristopac yahuarhuan chuyayachishca cachunmi, cancunata paipac Espiritumanta paipacllatac ruhuashca. Taita Dios mai c'uyashpa, cancunaman sumac causaita yallita cushca cachun ninimi.

Huiñaita causagrina yuyailla canamanta

3¡Ñucanchic Apunchic Jesucristopac Taita Diostaca “allimari cangui” nishunchic! Ñucanchic huiñaita causagrina yuyailla cachunmi, paipac sumaimana c'uyaimanta Jesucristota causachishpa, ñucanchictaca cutin huacharishca shinata ruhuarca.

4Chaimantami ñucanchicca jahua pachapi Dios huacaichishca, mana ismuclla, mana chaquiclla, mana mapayaclla allicunata japinata charinchic.

5Cancuna Taita Diosta crishcamantami, cancunaman allichishca quishpirinata japingacaman, pai imatapish ruhuaclla cashcahuan cancunataca huacaichishpa, paipac maquipi charicun. Chai quishpirinataca ña tucuri punzhacunapimi ricuchinga.

6Chaimantami cancunaca ashacaman tucui laya llaquicunata apana cacpipish, mai cushicuna canguichic.

7Cancuna crishcaca curi shinami. Curi alli cactaca ninapi rupachishpami ricun. Chai shinallatac cancuna alli crishcata ricungapacca, llaquicunaca japinami can. Shina llaquita apana cacpipish, mana chingaric crishcaca chingariclla curitapish ashtahuan yallimi can. Chai shina llaquichishca cashpapish crinata mana saquishpaca, Jesucristo ricuricpica, sumacyachishca, “allimi cangui” nishcami canguichic.

8Cancunaca Apunchic Jesucristota mana ricushca cashpapish c'uyanguichicmi. Cunan mana ricushpapish paita crishpami, sumaimana cushicuita charinguichic. Chaimanta pagui ningapacca ima rimaillapish mana tiyanchu.

9Cancunaca crishpa, quishpirinata japigricushcamantami, chashnaca cushicunguichic.

10Diosmanta ñaupa huillaccunaca allita tapushpa yachashpami, cancunata Dios c'uyashpalla, quishpichina cashcataca huillarca.

11Cristopac Espiritumi Diosmanta ñaupa huillaccunamanca Cristo llaquita apashpapish, q'uipaman sumacyachishca canataca utcashpa ña huillarca. Paicunahuan cac Cristopac Espíritu chashna yuyaita cucpimi, paicunaca ima punzha ima shina tucuna cashcata yachac chayanata munarcacuna.

12Paicuna chashna yachashun nicucpipish, Diosca pai huillachishcaca mana paicunaman cashcata, ashtahuanpish cancunapac allipac cashcatami yachachirca. Chaitatacmi jahua pachamanta shamushca, imatapish ruhuaclla Diospac Espíritu yuyaita cucpi, alli huillaita huillaccunallatac cancunaman huillarca. Cai huillashcacunataca jahua pacha angelcunapish yachanata munancunami.

Diospaclla causachun c'ayashcamanta

13Chaimanta caicunata yachashpaca, allichirishpa alli yuyaihuan causaichic. Jesucristo cutimui punzha Taita Dios paipac sumaimana c'uyaimanta ñucanchic japina cashcata japingapac cushicushpa shuyacuichic.

14Alli cazuc huahuacuna shina, Diosta cazuichic. Diosta manarac ricsic cashpa, jucha munashca shina causanataca ama munaichicchu.

15Ashtahuanpish cancunata acllac Diosca ima jucha illacmi. Shina cashcamanta cancunapish tucui causaipi ima jucha illac causanata munaichic.

16Dios quillcachishcapica: “Ñucaca jucha illacmi cani. Chaimanta cancunapish jucha illac causaichic” nicunmi.

17Cancunaca pimanpish mana tucushpa, imata ruhuashcata ricushpa taripac Diosta “Taita” nishpaca, tucui causaipimi cai pachapi causashcacamanca, paita manchashpa, cumurishpa causana canguichic.

18Caitaca cancunallatac alli yuyarichic: Taita Diosca cancunataca cancunapac ñaupa taitacuna causashca shina yangalla yuyaicunahuan causacuctami quishpichirca. Cancunaca mana curihuan, cullquihuan, imapish chingarinallahuan randishcachu canguichic,

19ashtahuanpish Jesucristopac sumaimana valic yahuarhuanmi quishpichishca canguichic. Paica imapish mapa illac, sumaimana pactalla ovejata*f** Diosman cushpa, rupachishca shinami carca.

20Diosca cai pachata manarac ruhuashpami, Cristotaca huañushpa gentecunata quishpichichun nishca. Shina cashpami, cai tucuri punzhacunapi cancunapac allipac quishpichingapac shamurca.

21Paimantami cancunaca Diosta cringuichic. Taita Diosmi Cristotaca huañushcacunapuramanta causachishpa sumacyachirca. Chaimantami cancunaca Taita Diospi shunguta churashpa cringuichic.

22Cunanca tucui shunguhuan criccunapura c'uyanacungapacmi, cashcata nic alli huillaita cazushpa, cancunapac almataca chuyayachishca canguichic. Chashna cashcamantami chuya shunguhuan, tucui munaihuan criccunapura c'uyanacuna canguichic.

23Cancunaca cutin huacharishca shinami tucushcanguichic. Cunanca mana huañuclla, mana chingariclla taitamantachu huacharishca canguichic, ashtahuanpish huiñai causaita cuc, mana chingaric Dios rimashcata uyashcamantami, cutin huacharishca shina canguichic.

24Dios quillcachishcapica:

“Tucui gentecunaca q'uihua shinallami.

Paicuna ‘jatunmi cani’ nishcapish,

sisashca q'uihua shinallami.

Q'uihua chaquiricpica,

sisaca urmanllami.

25Ashtahuanpish Dios rimashca shimicunaca

huiñaita mana chingaringachu” ninmi.

Cai shimicunatami quishpirinamanta alli huillaita huillacpica uyarcanguichic.