EFESIOS 5 - Nuevo Testamento en Quichua Cañar 1996

Diospac huahuacuna shina causanamanta

1Cancunaca ña Diospac c'uyashca huahuacuna cashcamantaca, pai shina canata yuyaichic.

2Jesucristo ñucanchicta c'uyac shinallatac, cancunapish c'uyanacushpa causaichic. Paica c'uyashcamantami, Diosman cushpa rupachishca mishquiman ashnacuc shina cangapac, pai quiquinllatac japi tucushpa, ñucanchicmanta huañurca.

3Cancunaca Diospaclla cashcamantaca “huaclliriccuna” nishcapish, “manapish caipaccunata ruhuaccuna” nishcapish, mana cashpaca “ashtahuan charina yuyaillami causancuna” nishcapish, cancunapurapica pacta uyarishcallapish canman.

4Pinganayaipac shimicunatapish, mapa yangalla pandachic shimicunatapish ama rimarichicchu. Chaicunata rimarinapac randica, Diosman mañashpa pagui ninami alli.

5Maijanpish huacllirishpa, ima mapatapish ruhuashpa, shinallatac imatapish ashtahuan charina yuyailla cashpa, ruhuashcalla diosta alli niccunaca. Jesucristopish, Taita Diospish mandacucpica imata mana charingacunachu. Chaitaca yachanami canguichic.

6Chashna mana allita ruhuashcamantami Taita Dios p'iñarishpa, tucui paita mana cazuccunataca llaquichinga. Chaimanta yanga parlocunahuanca pipish cancunata ama pandachichun.

7Chashna caccunahuanca ama tandaringuichicchu.

8Ñaupaca amsallapimi cancunaca causarcanguichic. Cunanca Apunchic Jesushuan shuc shinalla tucushcamanta achic luzpimi causacunguichic. Shina cashcamantaca achic luzpi causacuc shina causaichic.

9Achic luzca alli shungu canata, imapish cashcata ruhuanata, shinallatac mana llullac cana yuyaitami cun.

10Cancunaca punzhantami Apunchic Jesús munashca shina causanata yuyana canguichic.

11Amsapi causac, yangalla mana allita ruhuaccuna shina ama causaichicchu. Chaipac randica chashna ruhuaccunataca “mana allichu” nishpa rimashpami, achicman llucchina canguichic.

12Paicuna pacalla imatapish ruhuashcata rimanataca pinganayanmi.

13Imapish pacashcata achicman llucchicpica, tucuimi yacharinga.

14Chashna achic luzman llucchicpica, imapish luzpimi canga. Chaimantami:

“Suiñushcamanta ricchari,

huañushcacunapuramanta jatari.

Cristomi cantaca achicyachinga” nincuna.

15Chaimanta caishuc chaishuchuan apanacungapac alli yuyarichic. Ama yuyai illac shina causaichicchu, ashtahuanpish alli yuyaihuan causaichic.

16Cunan punzhapi gentecuna mana allita ruhuashpa causacushcamantaca, ruhuanata pudishpaca allita ruhuaichic.

17Imata mana yachaccuna shina ama caichicchu, ashtahuanpish Apunchic Jesucristo ima munashcata yachana yuyailla caichic.

18Ama machaichicchu. Machaccunaca imapipish mana jarcarincunachu. Chaipac randica, Diospac Espíritu yuyaita cushca shina causanata munaichic.

19Salmocunatapish, Diospac Espíritu yuyachishca sumac cantocunatapish caishuc chaishuc parlanacuichic. Apunchic Jesucristota tucui shunguhuan “allimari cangui” nishpa cantaichic.

20Ñucanchic Apunchic Jesuspac shutipi punzhanta imamantapish Taita Diostaca pagui nicuichiclla.

Cusandic huarmindic sumacta causanamanta

21Apunchic Jesucristota cazushcamanta caishuc chaishuc cazunacuichic.

22Huarmicuna, Apunchic Jesusta cazuc shina cancunapac cusacunata cazuichic.

23Jesucristoca tandanacushca criccunata uma shina Mandacmi. Shinallatac cusapish huarmitaca uma shina mandacmi. Jesucristoca tandanacushca criccunata Quishpichicmi. Tandanacushca criccunaca Jesucristopac cuerpo shinami.

24Tandanacushca criccunaca Jesucristota cazucmi. Shinallatac huarmicunapish, tucui imapipish cancunapac cusacunata cazuichic.

25Cusacunapish, Jesucristo tandanacushca criccunata c'uyac shina, cancunapac huarmicunata c'uyaichic. Jesucristoca tandanacushca criccunata c'uyashpami huañurca.

26Cristoca tandanacushca criccunataca yacuhuanpish, pai rimashca shimihuanpish chuyayachishcami. Diospaclla tucushpa causachunmi, paicunamanta Cristoca huañurca.

27Tandanacushca criccunaca paipac ñaupapi chuyalla, ima mana alli ruhuashcacunapish illac, llambuclla sumaimana ricurichunmi, chashnaca ruhuarca.

28Cusacunaca, ima shinami quiquinllatac c'uyaringuichic, chai shinallatac cancunapac huarmicunatapish c'uyaichic. Maijanpish quiquin huarmita c'uyacca quiquinllatacmi c'uyarin.

29Maijanpish quiquin cuerpotaca mana p'iñanchu, ashtahuanpish allita ricunmi. Imamantapish jarcarinatami munan. Shinallatacmi Cristoca tandanacushca criccunataca huacaichin.

30Tandanacushca criccunaca Jesucristopac cuerpo shinami. Chaimanta ñucanchicpish Jesucristopac cuerpo shinallami canchic.

31Dios quillcachishcapica: “C'arica taita mamata saquishpa, paipac huarmihuan tandanacushpa causanga. Chashna tandanacushpaca, ña mana ishcaichu, ashtahuanpish shucllami tucun” ninmi.

32Caimanta yachanaca yallitacmi tiyan. Shina cacpipish ñucaca Jesucristohuan, tandanacushca criccunahuan ima shina cana cashcatami entendishpa huillani.

33Shina cacpica quiquinllatac c'uyaric shina, cancunaca cancunapac huarmicunata c'uyaichic. Shinallatac huarmicunapish, cancunapac cusacunata alli nishpa cazuichic.