APOCALIPSIS 5 - Nuevo Testamento en Quichua Cañar 1996

Pillushca p'angamantapish, Pactalla Ovejamantapish

1Mandashpa tiyarinapi tiyacucca jahuamanpish uramanpish quillcashca, shuc pillushca p'angatami paipac alli maquipi charicucta ricurcani. Chai pillushca p'angaca canchis unanchihuan unanchishcami carca.

2Imatapish ruhuaclla shuc angeltami ricurcani. Paica sinchita caparishpami:

—¿Maijantac cai unanchishcata p'itishpa, pillushca p'angataca pascaipac canguichic?— nirca.

3Chai unanchishcata p'itishpa pascashpa ricungapacca jahua pachapipish, cai pachapipish, ucu pachapipish pi mana tiyarcachu.

4Chai unanchishca pillushca p'angata pi mana pascaipac tiyacta ricushpaca, yallitami huacarcani.

5Chashna huacacucpimi yuyaccunapuramanta shucca:

—Ña ama huacaichu. Judá aillumanta león shina Mandacmi, tucui mana allita mishashca. Paica ñaupa mandac Davidpac huahua huahuacunapurami. Shina cashcamantami chai canchis unanchishcatapish p'itishpa, pillushca p'angatapish pascaipac can— nirca.

6Chai ishcai chunga chuscu yuyaccunapac, shinallatac chuscu animalman ricchacunapac chaupipi cac mandashpa tiyarina cuchullapica, shuc Pactalla Oveja*f** shayacuctami ricurcani. Chai Ovejaca huañuchishca shinami ricurirca. Chai Ovejaca canchis gachuyuc, shinallatac canchis ñahui muruyucmi carca. Chai canchis ñahui murucunaca, cai pachaman cachashca Diospac canchis Espiritucunami can.

7Chai Pactalla Oveja shamushpami, mandashpa tiyarinapi tiyacucpac alli maquimantaca pillushca p'angata japirca.

8Pillushca p'angata ña japicpica, chai chuscu animalman ricchacunapish, chai ishcai chunga chuscu yuyaccunapish Pactalla Ovejapac ñaupapimi cungurircacuna. Tucui paicunaca arpacunatami charicurcacuna. Curi vasocunapipish incienso jundatami charicurcacuna. Chai inciensoca Taita Diospaclla caccuna Diosman mañashcacunatami nisha nin.

9Shinallatac shuc mushuc cantota cantashpaca:

—Canllami unanchishcacunata p'itishpa,

pillushca p'angata

pascaipacmi cangui.

Canca huañushpami,

Taita Diospac cachun

tucui aillucunamantapish,

tucui laya rimaita rimaccunamantapish,

tucui llactacunamantapish,

tucui laya gentecunamantapish

cambac yahuarhuan

randishpa tandachishcangui.

10Chashnami ñucanchicta Mandac

Taita Diospacta ruhuaccuna cachun,

jatun mandaccuna cachun,

curacuna cachunpish ruhuashcangui.

Shina cashpami

cai pachataca mandangacuna— nicurcacuna.

11Chai q'uipa ricushpaca, mandashpa tiyarinapac, animalman ricchacunapac, shinallatac chai yuyaccunapac muyundicpi achca angelcunapac rimashcatami uyarcani. Paicunaca mana yupaipac mai achcacunami carca.

12Paicunaca cashna sinchita rimashpaca:

—Taita Diosman cushpa

huañuchishca Pactalla Ovejaca,

can imatapish ruhuaclla cashcamanta,

charic cashcamanta,

yachac cashcamanta,

alli nishca cashcamanta,

sinchi cashcamanta,

shinallatac sumaimana cashcamantapish,

¡tucuimanta yalli jatunmi cangui!— nicurcacunami.

13Shinallatac Taita Dios churashca jahua pachapi caccunapish, cai pachapi caccunapish, allpa ucupi caccunapish, yacu ucupi caccunapish cantashpaca:

—Mandashpa tiyarinapi tiyacuctapish,

Pactalla Ovejatapish

imatapish ruhuaclla cashcamanta,

sumaimana cashcamanta,

alli nishca cashcamantami

¡huiñai huiñaita

alli nishcami cana can!— nicushcatami uyarcani.

14Chai chuscu animalman ricchacunaca: “¡Chashna cachun!” nircacunami. Shinallatac chai ishcai chunga chuscu yuyaccunaca cungurishpami alli nircacuna.