APOCALIPSIS 7 - Nuevo Testamento en Quichua Cañar 1996

Pasac chuscu chunga chuscu huaranga israelcunata ch'icanyachishcamanta

1Chai q'uipaca cai pachapi tiyac chuscu esquinacunapi chuscu angelcuna shayacuctami ricurcani. Chaicunaca cai pacha allpatapish, mama cuchatapish, ima yuracunatapish ama huaira huactachunmi, chuscu esquinacunapi jarcashpa shayacurca.

2Shinallatac inti llucshic ladomanta shuc ángel shamuctami ricurcani. Paica causac Diospac unanchinatami charicurca. Chai angelmi mama cucha yacutapish, cai pacha allpatapish huacllichiclla canata chasquic, chuscu esquinacunapi shayacuc angelcunaman caparishpaca:

3—Ñucanchic Taita Diospacta ruhuaccunapac frentepi unanchingacaman cai pacha allpatapish, mama cucha yacutapish, shinallatac ima yuratapish ama imata ruhuanguichicchu— nirca.

4Chai q'uipaca: “Israelpac*f** chunga ishcai c'ari huahuacuna mirarishcapuramanta, pasac chuscu chunga chuscu huaranga unanchishcacuna tiyan” nictami uyarcani.

5Chaicunaca Judapac aillupuramanta chunga ishcai huaranga, Rubenpac aillupuramanta chunga ishcai huaranga, Gedpac aillupuramanta chunga ishcai huaranga,

6Aserpac aillupuramanta chunga ishcai huaranga, Neftalipac aillupuramanta chunga ishcai huaranga, Manasespac aillupuramanta chunga ishcai huaranga,

7Simeonpac aillupuramanta chunga ishcai huaranga, Levipac aillupuramanta chunga ishcai huaranga, Isacarpac aillupuramanta chunga ishcai huaranga,

8Zabulonpac aillupuramanta chunga ishcai huaranga, Josepac aillupuramanta chunga ishcai huaranga, shinallatac Benjaminpac aillupuramanta chunga ishcai huaranga unanchishcacunami carca.

Yuraclla churanata churashca achcacunata ricushcamanta

9Chai q'uipaca tucui llactacunamantapish, tucui aillucunamantapish, tucui laya rimaita rimaccunamantapish, shinallatac tucui laya gentecunamantapish pi mana yupaipac gentecunami mandashpa tiyarinapac ñaupapi, shinallatac Pactalla Ovejapac*f** ñaupapi shayacuctami ricurcani. Paicunaca yuraclla churanata churarishca, maquipica ramoscunatami charicurcacuna.

10Chaicunaca:

—¡Mandashpa tiyarinapi tiyacuc

ñucanchic Taita Diospish,

Pactalla Ovejapish

ñucanchicta quishpichircami!— nishpami, sinchita caparicurca.

11Tucui angelcunaca mandashpa tiyarinapac, yuyaccunapac, shinallatac chuscu animalman ricchacunapac muyundictami shayacurcacuna. Paicunaca mandashpa tiyarinapac ñaupapi Taita Diosta alli ningapac pambacaman cumurishpaca:

12—¡Chashna cachun!

Ñucanchic Taita Diosca

sumac cashcamanta, yachac cashcamanta,

alli nishca cashcamanta,

imatapish ruhuaclla cashcamanta,

jatun cashcamantapish,

huiñaicamanmi alli nishpa

pagui ninchic.

¡Chashna cachun!—nicurcacunami.

13Chaimantaca chai yuyaccunapuramanta shucca:

—Chai yuraclla churanata churashcacunaca, ¿picunatac, maimantatac shamushca?— nishpami, ñucaman tapurca.

14Shina tapucpica:

—Amito, canllatac yachanguimi— nircanimi.

Shina nicpi paica cashnami nirca:

—Chaicunaca jatun llaquimanta mishaccunami, shinallatac Pactalla Ovejapac yahuarhuan paicunapac churanata tacsharishcamanta yuraclla tucushcacunami.

15Chaimantami Diosman

mañana huasipi,

Taita Dios mandashpa

tiyarinapac ñaupapi

tutapish, punzhapish

paipacta ruhuancuna.

Shina cacpimi

mandashpa tiyarinapi tiyacucca

pai chaipi cashcamanta

tucui imapipish huacaichinga.

16Chaipica yarcaihuanpish yacunaihuanpish

ña mana llaquita apangacunachu.

Intipish, shuctac ima rupachiccunapish

mana rupachingachu.

17Ashtahuanpish chai mandashpa

tiyarinapac chaupipi cac

Pactalla Ovejallatacmi michinga.

Paillatacmi huiñai causaita

cuc yacumanpish pushanga.

Shinallatac tucui huiquicunatapish

Taita Diosmi paicunapac

ñahuicunamanta p'ichanga— nirca.