1 CORINTIOS 11 - Nuevo Testamento en Quichua Cañar 1996

1Ima shinami Cristota ñuca c'aticuni, chai shinallatac ñuca ima shina ruhuacta ricushpa c'atichic.

Huarmicuna cultopi ima shina canamanta

2Cancuna tucui imapipish ñucata yuyaricushcamanta, shinallatac ima shina ñuca yachachishcata c'aticushcamantaca, allimi ruhuacunguichic ninimi.

3Shina cacpipish Cristoca c'arita uma shina mandac cashcata, cutin c'arica huarmita uma shina mandac cashcata, shinallatac Taita Diosca Cristota uma shina mandac cashcatami yachachun munani.

4Maijan c'aripish Diosman mañacushpa, mana cashpaca Diosmanta huillacushpa umata tapallishpaca, uma shina mandac Cristotami pingaichin.

5Cutin huarmicuna Diosman mañacushpa, mana cashpaca Diosmanta huillacushpa umata mana tapallishpaca, uma shina mandac c'aritami pingaichin. Chai shina umata mana tapallishpaca, acchata p'itishca shinami tucun.

6Maijan huarmi cashpapish umata mana tapallishpaca, acchata p'itichinami ashtahuan alli canman. Ashtahuanpish acchata tucui p'itichina pingai cacpica, umata tapallichun.

7C'arica Diosman riccha cashcamanta shinallatac Dios sumac cashcata ricuchic cashcamantami, umata mana tapallina can. Cutin huarmica c'ari sumac cashcatami ricuchin.

8C'aritaca mana huarmimanta surcushpachu Diosca ruhuarca, ashtahuanpish huarmitami c'arimanta surcushpa ruhuarca.

9Shinallatac Taita Diosca c'aritaca mana huarmiman alli cachun ruhuarcachu, ashtahuanpish huarmitami c'ariman alli cachun ruhuarca.

10Shina cashcamantami huarmica mandacushcata ricuchingapacpish, shinallatac angelcunamantapish umataca tapallina can.

11Ashtahuanpish Apunchic Jesucristota crishpa, paihuan shuc shinalla tucushcamantaca, c'aripish mana huarmita yallichu, shinallatac huarmipish mana c'arita yallichu.

12Ima shinami huarmica c'arimanta surcushpa ruhuashca, chashnallatacmi c'aripish huarmimanta huacharin. Chashna cashpapish tucuimi Diosmanta shamun.

13Huarmicuna umata mana tapallishpa, Diosman mañana alli cashcata, mana alli cashcataca cancunallatac imata cashpapish nichic.

14C'arica acchata huiñachun saquinaca pingaimi. Chashna huiñachishpaca, paillatacmi c'aricunamanta shuctac laya cashcataca ricuchicun.

15Ashtahuanpish huarmipac accha huiñachun saquinaca allimi. Paimanca umata tapallirichunmi, chashna acchata huiñachichun Taita Diosca cushca.

16Tucui caicunamanta maijanpish mana uyasha nishpa rimasha nicca, caita entendichun: Ñucanchicpish, Diospaclla cac tandanacushca criccunapish, chashna shuctac layaman causana tiyashcataca mana yachanchicchu.

Jesús huañushcata yuyarishpa micunatamana alli yuyaihuan micuccuna tiyashcamanta

17Ashtahuan caicunata nishpaca, “cancuna allitami ruhuacunguichic” nishpaca, mana ninichu. Cancuna tandanacushpaca, allita ruhuanapac randica mana allita ruhuangapacmi tandanacunguichic.

18Cancuna Taita Diosta cushichingapac tandanacushpapish, ch'icanyarinacui tiyashcatami puntaca uyani. Chai shina nishcacunaca, maijan cutinca chashnatacmi canga yuyanimi.

19Cancunapurapi alli cric cashca ricurichunca, ch'icanyarinacui tiyanami alli can.

20Shina ch'icanyarinacushpa, Apunchic Jesús huañushcata yuyarishpa cancuna micushcaca yangallami.

21Chai shina ch'icanyarinacushpa, Jesús huañushcata yuyarishpa micungapac micunata apashpaca, mana shuyashpami maijancunaca micunguichic. Maijancunaca yarcaihuanmi saquirishcanguichic. Shina cacpipish maijancunaca machactami ubiashcanguichic.

22Cancunaca micungapac, ubiangapacca, ¿manachu quiquin huasita charinguichic? Chai shina ruhuashpaca, Diospaclla cac tandanacushca criccunata mana allipi churashpami, imata mana chariccunataca pingaipi churanguichic. ¿Chai shina ruhuaccunataca allimi ninachu cani? ¡Chai shinaca mana ninachu cani!

Apunchic Jesús huañushcata yuyarishpa micunamanta

23Ñuca cancunaman yachachishcataca, Apunchic Jesusmantami chasquircani. Apunchic Jesusca paita japichina tutallatacmi tandata japishpa,

24Taita Diosta pagui nishpa, chaupishpa chaupishpaca: “Caica cancunamanta llaquichishca cana ñuca aichami. Ñucata yuyarishpa cashna micucunguichiclla” nirca.

25Shinallatac micushca q'uipaca vaso vinota japishpami: “Cai vaso vinoca mushuc ari ninacuita ricuchic, ñuca yahuarmi. Chashnaca ñucata yuyarishpa, ubiacunguichiclla” nirca.

26Chai shina tandata micushpa, vaso vinota ubiashpaca, Apunchic Jesús cutimungacamanmi pai huañushcata huillacunguichic.

Ima shina Apunchic Jesús huañushcata yuyarishpa micunamanta

27Apunchic Jesús huañushcata yuyarishpa, maijanpish mana allita ruhuashpa micucca Jesuspac aichatapish, yahuartapish yangapi churashpami juchallin.

28Chashna cashcamantami manarac micushpa, manarac ubiashpa, quiquin ima shina cashcatarac allita yuyarina can.

29Maijanpish Apunchic Jesuspac aicha cashcata, paipac yahuar cashcata mana alli yachashpa micucca, paillatac llaqui tucungapacmi micun, shinallatac ubian.

30Chaimantami cancunapuramanta taucacuna ungushcacuna, irquiyashcacuna canguichic. Shinallatac maijancunacarin ña huañushcacunami.

31Manarac micushpa, ñucanchic quiquinllatac ima shina cashcata alli yuyarishpaca, mana Dios llaquichishca canchicmanchu.

32Apunchic Jesús llaquichishpapish, ñucanchicllatac alli yachacuchun, shinallatac cai pachapaclla causaccunahuan pacta ama jatun llaquiman richunmi, chashnaca llaquichin.

33Chaimanta c'uyashca criccuna, Apunchic Jesús huañushcata yuyarishpa micungapac tandanacushpaca, caishuc chaishuc shuyanacushpami micuna canguichic.

34Chaimanta maijanpish yarcaihuan cashpaca, quiquin huasillapitac micuchun. Tandanacuipi mana allita ruhuashpa micushcamanta Dios ama llaquichishca cachunmi, chashnaca nini. Caishuc allichinacunataca ñuca shamushpami allichisha.