SAN JUDAS 1 - Nuevo Testamento en Quichua Cañar 1996

Criccunaman Judas quillcashcamanta

1Jesucristopacta ruhuac, Santiagopac huauqui Judasmi, Taita Dios c'uyashpa c'ayashcacunata “allillachu canguichic” nishpa caita quillcashpa cachani. Cancunataca ima millaimantapish Jesucristomi huacaichicun.

2Taita Dios cancunata mai llaquicpi, paimanta sumac causaitapish, c'uyaitapish ashtahuan chasquichunmi munani.

Llullashpa yachachiccunamanta

3C'uyashca criccuna, ñucapish, cancunapish quishpirishca cashcamantami, cancunamanca yallita quillcanata munarcani. Shina cacpipish cunanca Diospaclla caccunaman paicuna crichun yachachishcata, macanacuc shina sinchita c'atina cacpimi, cai quillcata cachani.

4Chaica ñucanchicpurahuanmi, llullashpa yachachishpa maijan llullac huillaccuna tandarishca. Chaicunatami ñaupa punzhacunamanta pacha Diosca jatun llaquiman rina cashcata huillashca. Chaicunaca millai runacunami. “Ñucanchic Taita Dios c'uyacmi” nic tucushpallami, imapipish mana jarcarishpa, mana alliman pushancuna. Chashna ruhuashpami, ñucanchicta Mandac shuclla Apunchic Jesucristotapish “paica mana quishpichicchu” nincuna.

5Cancuna ña yachashca cacpipish, Taita Diosca israelcunata*f** Egipto llactamanta llucchishca q'uipa, paicunapurapi mana criccunata chingachishcatami yuyachisha nini.

6Shinallatac angelcunatapish, paicuna mandacushca jahua shitashpa rishcamantaca, amsa pachapimi tucuri punzhapi taripashpa llaquichingapac huiñaita huatashpa charicun.

7Chai angelcuna shinallatacmi Sodoma pueblopi, Gomorra pueblopi shinallatac chai cuchulla pueblocunapi causaccunapish huacllirishpa, c'aricunapura, huarmicunapura chayarinacushpa, millaillapi causarcacuna. Chaimantami huiñaita rupacuc ninapi llaquita aparcacuna. Cunan punzha causaccuna ricushpa yuyarichunmi, chashnaca tucurca.

8Chashna cashpapish chai llullashpa yachachiccunaca “muscunchicmi” nishpami, caishuccunata pandachishpa, paicunallatac mapayancuna. Shinashpami Mandac Diostapish mana cazushpa, jahua pacha jatun mandaccunatapish mana alli nishpa, rimashpa c'amincuna.

9Angelcunata jatun mandac Miguel angelpish, diablohuan Moisespac huañushca cuerpota quichunacushpa p'iñanacushpapish, diablotaca mana millaita rimarcachu. Chaipac randica “Taita Diosllatac llaquichichun” nircami.

10Shina cacpipish chai llullashpa yachachiccunaca manapish chashna cacta yachashpa, mana allita rimancunallami. Imata yachashpapish, animalcuna shina yuyai illac cashcamantami, paicunallatac llaqui tucungapac millaita ruhuancuna.

11Chashna gentecunaca, ¡aij, imachari tucungacuna! Paicunaca Caín ruhuashca shinallatacmi ruhuashcacuna. Balaam runa shinami, cullquiraicu paicunaca pandarishcacuna. Shinallatac Coré runa shina c'ariyaclla cashcamantami, huañushpa chingaringacuna.

12Chashna cashcamantami cancuna tandanacushpa micuicunapica, paicunaca jatun pinganayaita ruhuashpa mapayachincuna. Chashna cashpami paicunapac huicsallata yuyarishpami, pitapish mana manchashpa micuncunalla, ubiancunalla. Paicunaca chaquishca p'uyuta huaira caiman, chaiman apacuc shinami. Paicunaca p'ucuna punzha mana p'ucuc yura shina, shinallatac sapimanta p'itishca yura shina cashpami, ishcai cutin huañushcacuna.

13Paicunapac pinganayaita mana allita ruhuashcacunaca, mama cuchata huaira caiman chaiman shitacpi, puscuta shitashca shinami. Paicunaca lucerocuna ñanta chingachishca shinami, tucuimanta yalli amsa pachapi huiñaicaman llaquita apangacuna.

14Ñaupa taita Adanmanta Enoccamanca, canchis taitacunami cashca. Enocca Dios yuyaita cucpimi, chai yachachiccunamanta huillashpaca: “Mandac Diosca paipac huaranga huaranga angelcunahuan shamuctami ricurcani.

15Chashna shamushpaca, tucui mana allita ruhuaccunata taripashpa, paicuna mana allita ruhuashcamanta, shinallatac paicuna Diosta p'iñachishpa, millai rimaicunata rimashpalla causashcamantami, taripashpa llaquichingapac shamurca” nishcami.

16Chai shina caccunaca huashalla parlarishpa rimaccunami, ima charishcacunahuanpish mana cushilla caccunami, shinallatac quiquinman imapish alli cachunllami munancuna. Paicuna jatun tucushpami, imatapish japingaraiculla pitapish “canca allimi cangui” nic tucuncuna.

Criccunata cunashcamanta

17Shina cacpipish c'uyashca criccuna, ñucanchic Apunchic Jesús acllashca huillaccuna ñaupaman ima nishcacunataca, alli yuyarichic.

18Paicunaca: “Tucuri punzhacunapica, paicuna munashca shina mana alli munaillahuan causashpa, asishpa burlaric gentecunami tiyanga” nircacunami.

19Chaicunaca criccunata ch'icanyachiccunami. Cai pachapaclla ima tiyashcata yuyariccuna cashpami, Diospac Espiritutaca mana charincuna.

20Ashtahuanpish c'uyashca criccuna, Diospaclla cachun cushca crinata allita c'atiraichic. Diosman mañashpapish, Diospac Espíritu yuyaita cushca shina mañaichic.

21Cancunata Dios c'uyacushcamantaca ama anchurichicchu. Shinallatac ñucanchic Apunchic Jesucristo llaquishpa, ñucanchicman huiñai causaita cuna punzhataca shuyacuichiclla.

22Maijanpish “¿chashnachari, manachari chashna?” niccunataca ayudaichic.

23Ninapi huiñaita rupangapac ricuccunataca, ninamanta aisac shina quishpichichic. Shuccuna mana allita ruhuacpipish, paicuna shina mana allita ruhuanamanta cuidarishpa ayudanami canguichic. Shina cacpipish paicuna mana allita ruhuashcamanta churanacunacaman mapayashcataca millanami canguichic.

Tucuchingapac Taita Diosta alli nishcamanta

24¡Ñucanchicta Quishpichic shuclla Diostaca “allimari cangui” nishunchic! Paimi imatapish ruhuaclla cashcahuanca, cancuna ima millaipi ama urmashpa, paipac sumaimana ñaupapi cushilla ricurichun huacaichicun.

25¡Paitaca sarunpish, cunanpish, huiñaipacpish sumaimana jatun cashcamanta, imatapish ruhuaipac mandac cashcamantami, ñucanchic Apunchic Jesucristomanta alli nishunchicyari! Chashna cachun.