Псалми 148 - Нов превод на Псалмите од LXX 2024（MAK2024PS）

ПСАЛМ 148Сион нека Го фали Господа

1Алилуја, од Агеј и Захарија.

Фалете Го Господа од небесата,

фалете Го во височините.

2 102,20-21; Јов 38,7 Фалете Го сите ангели Негови,

фалете Го сите сили Негови.

3 Дан 3,62-63 Фалете Го сонце и месечино,

фалете Го сите ѕвезди и светлино.

4 1 Мојс 1,7; 3 Цар 8,27; Дан 3,59-60 Фалете Го небеса небесни

и ти, водо, што ги надвишуваш небесата.

5Нека го фалат името Господово,

зашто Тој рече и настанаа,

Тој заповеда и се создадоа.

6 110,8; Ер 31,35-36 Ги постави довека и во вечни векови;

повелба даде и таа нема да измине.

7Фалете Го Господа на земјата,

змејови и сите бездни;

8 102,20-21; 147,5; Дан 3,66-70 огну, граду, снегу, мразу, ветру бурен,

кои го извршувате зборот Негов;

9 Ис 44,23; 54,11; Дан 3,75-76 гори и сите ридови,

дрвја плодородни и сите кедри;

10 Ис 43,20; Дан 3,80-81 ѕверови и сиот добиток,

влекачи и птици крилести;

11цареви земни и сите народи,

кнезови и сите судии земни;

12 Ер 31,13 момчиња и девојки,

старци со помладите,

13 88,17; 107,5; 112,4; Ис 12,4 нека го фалат името Господово,

зашто само Неговото име се возвиши.

Славата Негова е на земјата и на небото.

14 5 Мојс 7,6; Ефес 2,13 И Тој ќе го возвиси рогот на моќта на народот Свој,

песната на сите светии Негови,

на синовите на Израил –

народот што Нему Му се приближува.