Псалми 144 - Нов превод на Псалмите од LXX 2024（MAK2024PS）

ПСАЛМ 144Прославување на небесниот Цар

1 33,1; 43,4 Пофалба од Давид.

Ќе Те возвишувам, Боже мој, Цару мој,

и ќе го благословувам името Твое довека и во вечни векови.

2 67,19 Секој ден ќе Те благословувам

и ќе го фалам името Твое довека и во вечни векови.

3 47,1; 94,3; Јов 36,26 Велик е Господ и многу фален,

и на Неговото величие му нема крај.

4 70,18; 77,4 Поколенија и поколенија ќе ги фалат делата Твои

и силата Твоја ќе ја објавуваат.

5За велелепната слава на светоста Твоја ќе зборуваат

и за чудесните дела Твои ќе раскажуваат.

6И за силата на страшните дела Твои ќе зборуваат

и за величието Твое ќе раскажуваат.

7Споменот на изобилната добрина Твоја ќе го излеваат

и на правдата Твоја ќе ѝ се радуваат.

8 102,8; 110,4; 111,4 Милосрден и милостив е Господ,

долготрпелив и многумилостив.

9 85,5 Добар е Господ кон сите и кон сѐ

и милосрдието Негово е во сите дела Негови.

10 102,13.22; Дан 3,57 Нека Те слават, Господи, сите дела Твои

и нека Те благословуваат светиите Твои.

11 92,1; 1 Лет 29,11 За славата на царството Твое ќе кажуваат,

и за силата Твоја ќе говорат,

12за да им ја обзнанат на синовите човечки моќта Твоја

и славата на велелепието на царството Твое.

13 101,12; 145,10; 2 Мојс 15,18; Дан 3,33; 4,30; 1 Тим 1,17; Откр 11,15 Царството Твое е царство на сите векови

и владеењето Твое е во секое поколение и поколение.

13aВерен е Господ во сите зборови Свои

и свет во сите дела Свои.

14 36,24; 93,18; 145,8 Господ ги придржува сите што паѓаат

и ги исправува скршените.

15 103,27-28; 122,2; 135,25; Мт 6,25-26; 24,45; Лк 12,42 На Тебе се надеваат очите на сите

и Ти храната нивна ја даваш благовремено.

16Ти рацете Свои ги отвораш

и сѐ што живее наситуваш со благонаклонетост.

17 17,30; 5 Мојс 32,4; 2 Цар 22,31; Дан 9,14; Тов 3,2; Варух 2,9 Праведен е Господ на сите патишта Свои

и свет во сите дела Свои.

18 118,151; 5 Мојс 4,7; Ис 58,9; Ер 29,13; Фил 4,6 Блиску е Господ до сите што Го повикуваат,

до сите што навистина Го повикуваат.

19 Изреки 10,24 Волјата на оние што се бојат од Него ќе ја изврши,

и молењето нивно ќе го услиши и ќе ги спаси.

20 36,28; 96,10; Суд 5,31 Господ ги чува сите што Го љубат

и сите грешници ќе ги истреби.

21Пофалба за Господа ќе говори устата моја

и секое тело нека го благословува Неговото свето име довека и во век века.