Псалми 82 - Нов превод на Псалмите од LXX 2024（MAK2024PS）

ПСАЛМ 82Молитва за пораз на непријателите

1Песна на псалмот, на Асаф.

2 43,23; 49,3; 108,1 Боже, кој ќе Ти се уподоби Тебе?

Немој да премолчуваш,

ниту да се скротуваш, Боже.

3Зашто ете, непријателите Твои кренаа врева

и оние што Те мразат ја подигнаа главата;

4 Ер 11,19 против народот Твој наумија зло

и се договорија против светиите Твои.

5Рекоа: „Дојдете, та да ги истребиме нив од народите

и веќе нема да се спомнува името Израилево“.

6Зашто заедно и еднодушно се договорија,

против Тебе направија сојуз:

7населбите на Идумејците и Исмаилќаните,

Моавците и Агарјаните,

8Гевал, Амон и Амалик

и другоплеменици со жителите на Тир;

9зашто дури и Асур им се придружи,

па станаа помошници на синовите Лотови.

10 2 Мојс 2,15; Суд 4–5; Ис 9,3; 10,26 Направи им како на Мадијам и Сисара,

како на Јавин во потокот Кисон;

11 Ер 8,2 тие беа истребени во Аендор,

станаа како ѓубриво за земјата.

12 Суд 7,25; 8,9-20 Постапи со кнезовите нивни како што си постапил со Орив, и Зив, и Зевеј,

и со Салмана, со сите кнезови нивни,

13кои рекоа:

„Да го наследиме за себе светилиштето Божјо“.

14 57,9; Ис 17,13; 28,5; Јов 27,21 Боже мој, постави ги како вртлог,

како трска пред лицето на ветрот;

15 Ис 5,24; 10,17; Ез 21,2 како оган што ќе ја гори шумата,

како пламен што ќе ја запали гората,

16 Ер 25,32 така ќе ги прогониш со бурата Своја

и со гневот Свој ќе ги ужасиш.

17Исполни ги лицата нивни со срам

и ќе го побараат името Твое, Господи.

18 45,11; 96,9; Ис 42,8 Нека се засрамат и ужаснат во вечни векови,

и нека бидат посрамени и уништени

19и да познаат дека Тебе името Ти е Господ;

единствено Ти си Севишен по целата земја.