Псалми 138 - Нов превод на Псалмите од LXX 2024（MAK2024PS）

ПСАЛМ 138Похвала на сезнајниот Бог

1 Ер 12,3 За крајот, псалм на Давид.

Господи, Ти ме испита и ме позна;

2 93,11 Ти го позна седењето мое и станувањето мое,

Ти оддалеку ги разбра помислите мои;

3 Јов 13,27 патеката моја и мерата моја си ги истражил

и сите патишта мои ги предвиде.

4 Сир 23,20 Зашто нема збор на јазикот мој.

5Ете, Господи, Ти позна сѐ,

и последното и првото.

Ти ме обликува

и врз мене ја положи раката Своја.

6Чудесно е знаењето Твое за мене;

тоа е толку надмоќно,

не можам да допрам до него.

7Каде ќе заминам од Духот Твој

и од лицето Твое каде ќе побегнам?

8 Ер 23,24; Амос 9,2 Ако се искачам на небото, Ти си таму;

ако слезам во адот, присутен си;

9ако ги земам крилјата свои наутро

и се населам на краиштата на морето,

10дури и таму раката Твоја ќе ме води

и ќе ме прифати десницата Твоја.

11 Јов 24,17 Па реков: „Можеби темнината ќе ме прегази,

но дури и ноќта ќе биде светлина во моето насладување“.

12 Дан 2,22 Зашто темнината нема да се помрачи од Тебе

и ноќта како ден ќе се осветли;

каква што е темнината нејзина,

таква е и светлината нејзина.

13 70,6; Јов 10,9-12 Зашто Ти ги создаде бубрезите мои, Господи,

ме прифати од утробата на мајката моја.

14Ќе Те славам, зашто си чудесен до трепет;

чудесни се делата Твои

и душата моја тоа најдобро го знае.

15Не се сокри коската моја од Тебе,

која ја создаде скришно,

и составот мој во длабочините на земјата;

16 Ис 4,3; Дан 12,1 невообличениот зачеток мој го видоа очите Твои

и во книгата Твоја сите ќе бидат запишани;

деновите ќе се обликуваат

и никој ќе нема во нив.

17А Твоите пријатели имаа голема почит кај мене, Боже,

силно се утврдија нивните првенства.

18Ќе ги избројам и повеќе од песокот ќе се умножат;

станав и уште сум со Тебе.

19 118,115 О, кога би ги погубил грешниците, Боже!

Луѓе крвници, тргнете се од мене,

20зашто сте подмолни во помислите;

залудно ќе ги земат градовите Твои.

21 25,2; Ер 6,27; Јов 23,10 Зар не ги намразив оние што Те мразат, Господи,

и не се топев ли поради непријателите Твои?

22Со крајна омраза ги замразив,

ми станаа непријатели.

23 16,3; 25,2 Испитај ме, Боже,

и познај го срцето мое,

испитај ме и познај ги патеките мои.

24И види дали има пат на беззаконие во мене

и води ме по патот вечен.