Псалми 10 - Нов превод на Псалмите од LXX 2024（MAK2024PS）

ПСАЛМ 10Доверба на праведникот во Господа

1 7,1; 54,6; 90,3; 140,8 За крајот: псалм на Давид.

Се препуштив на Господа.

Како ќе ѝ речете на душата моја:

„Пресели се на гората како врапче“?

2 7,12; 9,28; 36,14; 56,4; 63,3 Зашто, ете, грешниците затегнаа лак,

подготвија стрели во тулот,

за во мракот да стрелаат кон оние со чесно срце.

3Зашто она што Ти го подготви – го срушија;

а праведникот што направи?

4 2,4; 5,7; 101,19; 102,19; 5 Мојс 26,15; Ис 66,1; Авак 2,20; Мт 5,34 Господ е во Својот свет храм,

Господовиот престол е на небото,

очите Негови се вперени кон сиромавиот,

веѓите Негови ги испитуваат синовите човечки.

5Господ ги испитува праведникот и безбожникот,

а оној што сака неправда, ја мрази душата своја.

6 74,8; 1 Мојс 19,24; Ис 51,17-22; Ер 25,15; Ез 10,2; 37,21; Откр 8,5; 19,8-9 Врз грешните ќе истури замки како дожд, оган и сулфур;

и ветар бурен е делот во чашата нивна.

7Зашто Господ е праведен и ја возљуби правдата,

чесниот ќе го види лицето Негово.