Псалми 85 - Нов превод на Псалмите од LXX 2024（MAK2024PS）

ПСАЛМ 85Молитва во голема неволја

1 39,17 Молитва на Давид.

Приклони го, Господи, увото Свое и услиши ме,

зашто сум сиромав и беден.

2 24,20 Запази ја душата моја, зашто сум свет,

спаси го слугата Свој, Боже мој, кој се надева на Тебе.

3Помилуј ме, Господи,

зашто по цел ден кон Тебе ќе повикувам.

4 24,1; 142,8 Развесели ја душата на слугата Твој,

зашто кон Тебе, Господи, ја издигнав душата своја.

5Зашто Ти си, Господи, добар и снисходлив и многумилостив

кон сите што Те повикуваат.

6 5,1-2; 27,2; 129,2 Чуј ја, Господи, молитвата моја

и внимавај на гласот од молењето мое.

7 16,6; 76,2 Во денот на жалоста моја повикав кон Тебе,

зашто ме услиша.

8 34,10; 88,6; 2 Мојс 15,11; 5 Мојс 3,24; Ер 10,6 Нема сличен на Тебе меѓу боговите, Господи,

и нема дела како Твоите.

9 21,27-29; 65,4; 86,4-6; 101,15.22; Откр 15,4 Сите народи што ги создаде ќе дојдат

и ќе се поклонат пред Тебе, Господи,

и ќе го прослават името Твое.

10Зашто Ти си велик и Ти правиш чуда,

Ти си единствен Бог.

11 25,3; 26,11; 142,8 На Твојот пат упати ме, Господи,

и ќе одам во вистината Твоја.

Срцето мое нека се зарадува во трепетот од името Твое.

12 9,1; 51,9 Ќе Те исповедам и ќе Те фалам, Господи, Боже мој, со сето срце свое

и ќе го славам името Твое довека,

13 87,6; 5 Мојс 32,22; Ез 32,23 зашто голема е Твојата милост врз мене

и Ти ја избави душата моја од најдолниот ад.

14 53,4 Боже, беззакониците станаа против мене,

и собраните моќници ја побараа душата моја

и не Те поставија Тебе пред себе.

15 102,8; 144,8; 2 Мојс 34,6 А Ти си милосрден и милостив, Господи, Боже мој,

долготрпелив, и многумилостив и вистинит.

16 24,16; 115,7 Погледни на мене и помилуј ме;

на слугата Свој дај му ја силата Твоја

и спаси го синот на слугинката Своја.

17Направи со мене знак за добро,

та оние што ме мразат да видат и да се посрамат;

зашто Ти, Господи, ми помогна и ме утеши.