IZILILO 5 - isiXhosa 1975

Umthandazo weZiyon wokucela ukuhlangulwa

1Kukhumbule, Yehova, okusihleleyo; Bheka, uyibone ingcikivo yethu.

2Ilifa lethu lisuke lenziwa elabasemzini,

Izindlu zethu zalunga kwabolunye uhlanga.

3Siziinkedama, asinabawo;

Oma banjengabahlolokazi.

4Amanzi ethu siwasela ngesilivere;

Iinkuni zethu ziza kuthi ngexabiso.

5Intshutshiso iphezu kwentamo yethu;

Sidiniwe, asinakuphumla.

6Isandla sisinika amaYiputa,

Nama-Asiriya, ukuba sihluthe sisonka.

7Oobawo bonile, àbasekho;

Thina sithwele ubugwenxa babo.

8Silawulwa ngabakhonzi;

Akukho usiqhiwulayo ezandleni zabo.

9Isonka sethu sisizuza ngomphefumlo wethu ùsisichenge.

Ngenxa yekrele lasentlango.

10Ulùsu lwethu luyavutha njengeziko

Ngenxa yolophu lwendlala.

11Badlwengulé abafazi eZiyon,

Iintombi emizini yakwaYuda.

12Baxhomé abathetheli ngezandla;

Ubuso bamadoda amakhulu àbubékwa.

13Amadodana athwala amatye okusila,

Amakhwenkwe akhubeka phantsi kweenkuni.

14Amadoda amakhulu aphezile ukuya esangweni;

Amadodana, ekubetheni uhadi.

15Iphelile imihlali yentliziyo yethu,

Ukuqamba kwethu kujike kwaba kukumbambazela.

16Síwile isithsaba entlokweni yethu;

Yeha ke thina! kuba sonile.

17Ngenxa yoko ityhafile intliziyo yethu;

Ngenxa yezo zinto amnyama amehlo ethu;

18Ngenxa yentaba yaseZiyon, kuba ibharhile,

Kuhamba iimpungutye phezu kwayo.

19Wena, Yehova, uhleli ngonaphakade;

Itrone yakho ikwisizukulwana ngesizukulwana.

20Yini na ukuba usilibale ngonaphakade,

Usilahle imihla emide?

21Síbuyisele kuwe, Yehova; sobuya;

Hlaziya imihla yethu njengokwamandulo.

22Ùngaba usicekise mpela na,

Wanoburhalarhume kuthi ngokukhulukazi na?