IINDUMISO 6 - isiXhosa 1975

Umthandazo wokucela inceba engxakiniKumongameli wokubethelwa izinto ezineentambo: ngelamadoda ilizwi. Umhobe kaDavide.

1Yehova, musa ukundohlwaya únomsindo,

Ungandithethisi únobushushu.

2Ndíbabale, Yehova, ngokuba ndintshwenyile;

Ndíphilise, Yehova, ngokuba ekhwankqisiwe amathambo am.

3Umphefumlo wam ukhwankqiswe kakhulu;

Ke wena, Yehova, koda kube nini na?

4Buya, Yehova, uwuhlangule umphefumlo wam;

Ndísindise ngenxa yenceba yakho.

5Ngokuba ekufeni akusekho kukukhumbula;

Kwelabafileyo ngubani na osenokubulela kuwe?

6Ndidiniwe kukugcuma kwam;

Ndiludadisa ubusuku bonke ukhuko lwam,

Ndiwenza manzi umandlalo wam ngeenyembezi zam.

7Lonakele kukukhathazeka iliso lam;

Laluphele ngenxa yababandezeli bam bonke.

8Sukani kum, nina nonke basebenzi bobutshinga;

Ngokuba uYehova ulivile ilizwi lokulila kwam.

9Ukuvile uYehova ukutarhuzisa kwam;

UYehova umthandazo wam uyawamkela.

10Ziya kudana, zikhwankqe kakhulu, zonke iintshaba zam;

Ziya kubuyiswa zidanile ngephanyazo.