IINDUMISO 75 - isiXhosa 1975

Umgwebo olungileyo kaThixoKumongameli; ngethi, Ungonakalisi. Umhobe ka-Asafu. Ingoma.

1Siyabulela kuwe, Thixo, siyabulela;

Lisondele igama lakho;

Babalisa imisebenzi yakho ebalulekileyo.

2Ngokuba ùthi, Ndiya kwenza ngexesha elimisiweyo,

Mna ndiya kugweba ngokuthe tye.

3Liyetha amandla ihlabathi, nabemi balo;

Ke mna, ndizizinzisile iintsika zalo. (Phakamisani.)

4Ndithi kubaqhayisi, Musani ukuqhayisa;

Nakwabangendawo, Musani ukuphakamisa uphondo;

5Musani ukuluphakamisela phezulu uphondo lwenu,

Ningathethi ngokusa, nolùle intamo.

6Ngokuba ugwebo aluveli empumalanga nasentshonalanga,

Nasentlango yeentaba.

7Hayi, nguThixo ogwebayo;

Úyamthoba lo, amphakamise lowa.

8Ngokuba indebe isesandleni sikaYehova,

Iphuphuma igwebu lewayini, izele yephithikeziweyo.

Úthulula kuyo; ewe, iintlenga zayo

Ziya kuselwa zifincwe ngabangendawo bonke behlabathi.

9Ke mna ndiya kushumayela ngonaphakade,

Ndiya kuvuma kuThixo kaYakobi;

10Zonke iimpondo zabangendawo ndiya kuzixakaxa,

Iimpondo zelungisa ziya kuphakanyiswa.