IINDUMISO 59 - isiXhosa 1975

Umthandazo wokuchasa neentshaba ezinekratshiKumongameli; ngethi, Ungonakalisi. EkaDavide. Eliligugu: ekuthumeleni kukaSawule, bayilinda indlu ukuba bambulale.

1Ndíhlangule ezintshabeni zam, Thixo wam,

Ndíse engxondeni kwabasukela phezulu kum.

2Ndíhlangule kubasebenzi bobutshinga;

Ndísindise ebantwini abanamagazi.

3Ngokuba nâbo bewulalela umphefumlo wam;

Baqukana ngam ábanamandla,

Kungekho lukreqo kum, kungekho sono kum, Yehova.

4Ndingenabugwenxa nje, bagidimé baxhoba.

Vuka, undikhawulele, ubone.

5Wena Yehova, Thixo wemikhosi, Thixo kaSirayeli,

Phapha, uzivelele zonke iintlanga;

Musa ukubayeka bonke abanginizayo bengábagqithi. (Phakamisani.)

6Bayabuya ngokuhlwa, bayavungama njengezinja,

Bawuhamba-hambe umzi.

7Nâbo belephuza amagwebu ngomlomo;

Ngamakrele emlonyeni wabo;

Ngokuba bathi, Kuva bani na?

8Wena, Yehova, uyabahleka,

Ùyazigculela zonke iintlanga.

9Mandla am, ndiya kulindela kuwe;

Ngokuba uThixo uyingxonde yam.

10UThixo wam uya kundikhawulela ngenceba yakhe;

UThixo uya kundibonisa abandilaleleyo.

11Musa ukubabulala, hleze balibale abantu bakowethu;

Babhadulise ngamandla akho, ubawise,

Ngweletshetshe yethu, Nkosi yethu.

12Isono somlomo wabo lilizwi lemilebe yomlomo wabo;

Mababanjiswe likratshi labo,

Nangenxa yokushwabula nokuhanahanisa abakuthethayo.

13Bágqibe ngobushushu; gqiba, bangabi sabakho;

Baqónde ukuba uThixo ngumlawuli kwaYakobi,

Wesa eziphelweni zehlabathi. (Phakamisani.)

14Bayabuya ngokuhlwa, bayavungama njengezinja,

Bawuhamba-hambe umzi.

15Bona babhadulela ukudla;

Ukuba bathe àbahlutha, balala apho.

16Ke mna, ndiya kuvuma ngamandla akho,

Ndimemelele kwakusasa ngenceba yakho,

Kuba ubuyingxonde kum,

Nendawo endisabela kuyo ngemini yokubandezelwa kwam.

17Mandla am, ndiya kukubethela uhadi;

Ngokuba uThixo yingxonde yam, nguThixo wam onenceba.