IINDUMISO 5 - isiXhosa 1975

Umthandazo wokukhuselwa ezintshabeniKumongameli: ngogwali. Umhobe kaDavide.

1Wabekele indlebe amazwi am, Yehova,

Kúqonde ukucamanga kwam.

2Libázele indlebe izwi lokuzibika kwam, Kumkani wam, Thixo wam;

Ngokuba ndithandaza kuwe.

3Yehova, ùya kuliva izwi lam kwakusasa,

Kwakusasa ndiya kuwusingisa kuwe umthandazo wam, ndibonisele.

4Ngokuba wena akunguThixo onanze okungendawo,

Akanakuphambukela kuwe onobubi.

5Abanakuma abaqhayisi phambi kwamehlo akho;

Ùyabathiya bonke abasebenzi bobutshinga.

6Ùyabatshabalalisa abathetha amanga;

Indoda enegazi nenkohliso ilisikizi kuYehova.

7Ke mna, ndinokungena endlwini yakho ngenceba yakho eninzi,

Ndiqubude, ndibhekise etempileni yakho engcwele ngokukoyika.

8Yehova, ndíkhaphe ngobulungisa bakho ngenxa yabandilaleleyo;

Yilungelelanise indlela yakho phambi kwam.

9Ngokuba emlonyeni wabo akukho nto imiyo,

Umbilini wabo ngumeyeliselo;

Lingcwaba elivuliweyo umqala wabo;

Bathetha okugudileyo ngolwimi lwabo.

10Báthwalise ityala, Thixo;

Makatshitshe amaqhinga abo;

Elukreqweni lwabo oluninzi bátyhale,

Ngokuba bakuphikisile.

11Mabavuye bonke abazímela ngawe,

Bamemelele ngonaphakade, ubakhusele;

Badlamke ngawe abalithandayo igama lakho.

12Ngokuba wena uyalisikelela ilungisa, Yehova,

Ùlihlanganisele ngenkoliseko njengekhaka.