IINDUMISO 56 - isiXhosa 1975

Umthandazo wokuchasa iintshaba ezinobutshingaKumongameli; ngeyehobe elithe cwaka phakathi kwabakude. EkaDavide. Eliligugu. Ukubanjwa kwakhe ngamaFilisti eGati.

1Ndíbabale, Thixo, ngokuba abantu bendizonda;

Bandixinile, besilwa yonke imini;

2Abandilalelayo bandizonda yonke imini,

Ngokuba baninzi abalwa nam beziphakamisile.

3Mhlana ndinxunguphalayo mna,

Ndokoholosa ngawe.

4Ndiya kulidumisa ngoThixo ilizwi lakhe,

Ndikholòse ngoThixo, ndingoyiki;

Inokundenza ntoni na inyama?

5Yonke imini bayawaphambanisa amazwi am;

Zingam zonke iingcinga zabo zobubi.

6Baqukene, babonisele,

Bona bagcine izithende zam,

Ngokokuba belinde umphefumlo wam.

7Bengamatshinga nje, bosinda na?

Zihlise ngomsindo izizwe, Thixo.

8Ukuphalaphala kwam ùkubhalile wena;

Yitha iinyembezi zam entsubeni yakho;

Àzisencwadini yakho na?

9Ziya kubuya umva ke iintshaba zam, mhlana ndibizayo;

Ndiyakwazi oku, ukuba uThixo unam.

10Ndilidumisa ngoThixo ilizwi,

Ndilidumisa ngoYehova ilizwi.

11Ndikholosé ngoThixo, ndingoyiki;

Únokundenza ntoni na umntu?

12Ziphezu kwam, Thixo, izibhambathiso zakho;

Ndiya kuyizalisa kuwe imibingelelo yombulelo.

13Ngokuba uwuhlangule ekufeni umphefumlo wam,

Iinyawo zam ekukhubekeni,

Ukuba ndihambe phambi koThixo

Ekukhanyeni kobomi.