IINDUMISO 67 - isiXhosa 1975

Zonke izizwe ziyayalwa ukuba zibonge uThixoKumongameli; eyokubethelwa ngezinto ezineentambo. Umhobe. Ingoma.

1Ngamana uThixo wasibabala, wasisikelela,

Wabukhanyisa ubuso bakhe kuthi; (Phakamisani.)

2Ukuze yaziwe ehlabathini indlela yakho,

Usindiso lwakho ezintlangeni zonke.

3Ngamana zabulela izizwe kuwe, Thixo,

Zabulela izizwe kuwe zonke ziphela;

4Zavuya zamemelela izizwe:

Ngokuba ùya kugweba phakathi kwezizwe ngokuthe tye,

Uzikhaphe izizwe ehlabathini. (Phakamisani.)

5Ngamana zabulela izizwe kuwe, Thixo,

Zabulela izizwe kuwe zonke ziphela.

6Umhlaba uyivelisile indyebo yawo;

Úya kusisikelela uThixo, uThixo wethu;

7Úya kusisikelela uThixo,

Zimoyike zonke iziphelo zehlabathi.