Ezekiel 40 - Bible with DC

TI PARMATA MAIPAPAN ITI TEMPLO(40:1–48:35)Maipan ni Ezekiel idiay Jerusalem

1Maika-10 idi nga aldaw iti baro a tawen, iti maika-25 a tawen kalpasan ti pannakaitalawmi a kas balud, iti maika-14 a tawen kalpasan ti pannakaparmek ti Jerusalem. Nariknak ti pannakabalin ti Apo, ket inyadayonak.

2Iti nakitak ti maysa a purok dagiti patakder a kasla maysa a siudad.

3Inyasidegnak

7Iti labes ti pagserkan, adda dalan. Adda tallo a kuarto a pagguardiaan iti agsumbangir. Kuadrado ti tunggal kuarto, tallo a metro ti tunggal sikigan, ket dua ket kagudua a metro ti kapuskol ti nagbabaetanda. Iti labes dagiti kuarto a pagguardiaan, adda dalan a tallo a metro ti kaatiddogna nga agturong iti kuarto a sumango iti Templo.

8-9Rinukodna daytoy a kuarto, ket natakuatanna nga uppat a metro ti kangatona. Adda daytoy a kuarto iti pagpatinggaan ti dalan iti asideg ti Templo. Maysa a metro ti kapuskol ti murdong dagiti diding.

10(Agpapada ti rukod dagiti kuarto a pagguardiaan iti agsumbangir ti dalan. Agpapada met ti kapuskol dagiti diding iti nagbabaetanda.)

11Kalpasanna, rinukodna ti kaakaba ti pagserkan. Innem ket kagudua a metro ti kalawana. Lima a metro ti nagbaetan dagiti silulukat a ruangan.

12Iti sangoanan ti tunggal kuarto a pagguardiaan, adda nababa a diding a 20 a pulgada ti kangato ket 20 a pulgada ti kapuskol. (Sangapulo a pulgada kuadrado dagitoy a kuarto.)

13Rinukodna ti nagbaetan dagiti akinlikud a diding ti tunggal kuarto a lumasat iti dalan—42 a kadapan.

14Ti akinmurdong unay a kuarto agturong iti maysa a paraangan. Rinukodna ket natakuatanna a 42 a kadapan ti kaakabana.

15Walopulo ket uppat a kadapan ti kaatiddog ti dalan manipud iti ruar ti ruangan agingga iti kaadayoan a paset ti maudi a kuarto.

16Adda babassit a tawa dagiti akinruar a diding dagiti amin a kuarto, kasta met kadagiti akin-uneg a diding iti nagbabaetan dagiti kuarto. Nakitikitan iti palma dagiti akin-uneg a diding a sumango iti dalan.

Ti Akinruar a Paraangan

17Impagnanak ti lalaki iti ruangan ket inturongnak iti akinruar a paraangan. Adda tallopulo a kuarto a naipadeg iti akinruar a bakud. Iti sangoanan dagiti kuarto, adda dalan a naikkan iti bato,

18ket dumanon iti likmut ti paraangan. Nababbaba ti akinruar a paraangan ngem ti akin-uneg.

19Adda nangatngato a pagserkan nga agturong iti akin-uneg a paraangan. Rinukod ti lalaki ti nagbaetan dagiti dua a pagserkan. Limapulo a metro ti kaatiddogna.

Ti Akin-amianan a Ruangan

20Rinukod ti lalaki ti dalan iti akin-amianan a bangir nga agturong iti akinruar a paraangan.

21Agpapada ti rukod dagiti tallo a pagguardiaan a kuarto iti agsumbangir ti dalan, dagiti diding iti nagbabaetanda ken ti nalawa a kuarto. Kas kadagiti adda iti akindaya a pagserkan. Duapulo ket lima a metro ti kaatiddog ket 12 1/2 a metro ti kalawa ti pagserkan.

22Ti dakkel a kuarto, dagiti tawa ken dagiti naikitikit a palma pumada kadagiti adda iti akindaya a ruangan. Adda met ditoy dagiti pito a tukad nga umuli iti pagserkan, ket adda ti dakkel a kuarto iti ungtona a sumango iti paraangan.

23Iti bangir ti paraangan manipud iti akin-amianan a pagserkan, adda sabali a pagserkan nga agturong iti akin-uneg a paraangan a kas iti adda iti akindaya a bangir. Rinukod ti lalaki ti nagbaetan dagitoy a ruangan; 50 a metro ti nagbaetanda.

Ti Akin-abagatan a Ruangan

24Impannak ti lalaki iti akin-abagatan a bangir ket nakitami sadiay ti sabali a pagserkan. Rinukodna dagiti akin-uneg a bakudna ken ti pagserkan a kuartona ket pumadada kadagiti dadduma.

25Adda tawa kadagiti kuarto daytoy a ruangan a kas kadagiti dadduma a ruangan. Duapulo ket lima a metro ti kaatiddogna, ket 121/2 a metro ti kaakikidna.

26Adda pito a tukad nga umuli iti pagserkan ket ti dakkel a kuartona adda iti pungtona a sumango iti paraangan. Adda dagiti naikitikit a palma iti akin-uneg a diding a sumango iti dalan.

27Adda met ditoy ti pagserkan nga agturong iti akin-uneg a paraangan. Rinukod ti lalaki, ket 50 a metro ti kaadayo ti maikadua a dalan.

Ti Akin-uneg a Paraangan: Ti Akin-abagatan a Ruangan

28Impagnanak ti lalaki iti akin-abagatan a pagserkan ket napankam iti akin-uneg a paraangan. Rinukodna ti pagserkan ket pumada ti rukodna kadagiti dadduma.

29-30Dagiti kuarto a pagguardiaan, ti dakkel a kuartona, ken dagiti akin-uneg a didingna pumadada kadagiti adda kadagiti sabali a ruangan. Adda met tawa kadagiti kuarto daytoy a ruangan. Duapulo ket lima a metro ti kaatiddogna, ket 12 1/2 ti kaakabana.

31Adda dakkel a kuartona a sumango iti akinruar a paraangan. Nakitikitan kadagiti palma dagiti didingna iti dalan. Walo dagiti tukad nga umuli iti daytoy a ruangan.

Ti Akin-uneg a Paraangan: Ti Akindaya a Ruangan

32Impagnanak ti lalaki iti akindaya a pagserkan ket napankam iti akin-uneg a paraangan. Rinukodna ti pagserkan, ket pumada ti rukodna kadagiti dadduma.

33Dagiti kuarto a pagguardiaan, ti dakkel a kuartona, ken dagiti akin-uneg a diding, pumadada iti rukod kadagiti adda iti sabali a pagserkan. Adda dagiti tawa iti aglawlaw kasta met iti dakkel a kuarto. Duapulo ket lima a metro ti kaatiddogna, ket 12 a metro ti kaakabana.

34Sumango ti dakkel a kuarto iti akinruar a paraangan. Nakitikitan kadagiti palma dagiti diding iti dalan. Walo a tukad ti umuli iti daytoy a ruangan.

Ti Akin-uneg a Paraangan: Ti Akin-amianan a Ruangan

35Kalpasanna, impannak ti lalaki iti akin-amianan a pagserkan. Rinukodna ti pagserkan ket pumada ti rukodna kadagiti dadduma.

36Kas kadagiti dadduma, adda met dagiti kuartona a pagguardiaan, akin-uneg a diding a naarkosan, maysa a dakkel a kuarto ken dagiti tawa iti aglawlaw. Walopulo ket uppat a kadapan ti kaatiddogna, ket 42 a kadapan ti kaakabana.

37Sumango ti dakkel a kuarto iti akinruar a paraangan. Nakitikitan kadagiti palma dagiti diding iti dalan. Walo a tukad ti umuli iti daytoy a ruangan.

Dagiti Patakder iti Asideg ti Akin-amianan a Ruangan

38Iti akinruar a paraangan, adda naisilpo a kuarto iti akin-uneg a pagserkan. Aglukat daytoy iti dakkel a kuarto a sumango iti paraangan. Ditoy ti pakabuggoan dagiti animal a mapuoran a kas daton.

39Adda uppat a lamisaan iti dakkel a kuarto, dua iti agsumbangir. Kadagitoy a lamisaan ti pakapartian dagiti animal a maidatag a daton a pakapakawanan ti basol wenno daton gapu iti basol wenno pagsupapak iti basol.

40Adda met uppat a lamisaan iti ruar ti kuarto, dua iti agsumbangir iti pagserkan ti akin-amianan a ruangan.

41Uppat ti lamisaan nga adda iti uneg ti kuarto ken uppat met ti adda iti ruar—walo amin ti bilangda a pakapartian dagiti animal a maidaton.

42Natikapan a bato dagiti uppat a lamisaan a pakaisaganaan dagiti daton a mapuoran. Duapulo a pulgada ti kangatoda, ket 30 a pulgada kuadrado ti rabawda. Maikabil kadagitoy a lamisaan dagiti alikamen a maaramat iti pannakaparti dagiti animal.

43Tallo a pulgada ti kapuskol ti naitapar iti iking ti lamisaan. Naiparabaw kadagiti lamisaan dagiti amin a karne a maidaton.

44Kalpasanna, impannak iti akin-uneg a paraangan. Adda dua a kuarto a sumango iti akin-uneg a paraangan. Maysa ti sumango iti abagatan iti abay ti akin-amianan a pagserkan.

45Imbaga kaniak ti lalaki a ti kuarto a sumango iti abagatan, agpaay kadagiti papadi nga agserserbi iti Templo

46ket ti kuarto a sumango iti amianan agpaay kadagiti papadi nga agserbi iti altar. Nagtaudda amin iti kaputotan ni Zadok; isuda laeng ti makastrek iti sangoanan ti Apo tapno agserbida kenkuana.

Ti Akin-uneg a Paraangan ken ti Templo

47Rinukod ti lalaki ti akin-uneg a paraangan: 50 a metro kuadrado. Adda altar iti sango ti Templo nga adda iti bangirna iti laud.

48Kalpasanna, impannak iti pagserkan a kuarto ti Templo. Rinukodna ti dalan a pagserkan. Dua ket kagudua a metro ti kaunegna, ket pito a metro ti kaakabana. Maysa ket kagudua a metro ti kapuskol ti agsumbangir a didingna.

49Uppat ket uppat a kadapan ti kaakaba ti kuarto a pagserkan ket 20 a pulgada ti kaunegna. Adda dagiti tukad nga umuli iti kuarto. Adda dua nga adigi nga agsumbangir iti pagserkan.