Nehemias 8 - Bible with DC

Ibasa ni Ezra ti Linteg kadagiti Tattao

1Idi dumteng ti maikapito a bulan, agnanaeden dagiti Israelita kadagiti il-ili ken siudadda. Iti umuna nga aldaw iti dayta a bulan, naguummongda amin iti plasa iti uneg ti Ruangan ti Danum idiay Jerusalem. Dinawatda ken ni Ezra a padi ken masirib iti Linteg nga alaenna ti libro ti Linteg nga inted ni Yahweh ken ni Moises para kadagiti Israelita.

2Innala ni Ezra ti libro. Napan iti sangoanan ti ummong a buklen dagiti lallaki ken babbai agraman ubbing nga addan umdas a tawenda a makaawat iti sao.

3Manipud iti agsapa agingga iti agmatuon, imbasa ni Ezra ti Linteg kadagiti tattao a nagtitipon iti plasa iti asideg ti ruangan. Sipapasnekda amin a dimngeg.

4Agtaktakder ni Ezra iti kayo a plataforma a naaramid para iti daytoy nga aldaw. Iti makannawanna, nakatakder da Mattitias, Sema, Anaias, Urias, Hilkias ken Maaseias ket iti makannigidna, da Pedaias, Misael, Malkija, Hasum, Hasbaddana, Zacarias ken Mesullam.

5Linuktan ni Ezra ti libro. Agtaktakder ni Ezra iti plataforma ket makita dagiti amin a tattao. Nagtakderda apaman a naluktan ti libro.

6Kinuna ni Ezra, “Madaydayaw ti Apo, ti naindaklan a Dios!”

Ingngato dagiti amin a tattao dagiti imada sada kinuna, “Sapay koma ta kasta! Sapay koma ta kasta!” Kalpasanna, nagpaklebda a nagdaydayaw.

7Timmakder dagiti tattao, ket impalawag dagitoy a Levita ti Linteg: Jesua, Bani, Serebias, Jamin, Akkub, Sabbetai, Hodias, Maaseias, Kelita, Azarias, Josabad, Hanan ken Pelaias.

8Impatarusda ti Linteg ti Dios sada inlawlawag tapno maawatan dagiti tattao.

9Nagsasangit dagiti tattao idi mangngegda ti ipaannurot ti Linteg. Ket kinuna ni Nehemias a gobernador, ni Ezra a padi ken eskriba, ken dagiti Levita a mangipalpalawag iti Linteg kadagiti tattao, “Nasantoan daytoy nga aldaw iti Apo a Diosyo. Saankayo nga agladingit wenno agsangit.

10Agawidkayon ket agfiestakayo. Ibingayanyo iti taraon ken arak dagiti agkurkurang iti agserbi kadakuada. Nasantoan daytoy nga aldaw iti Apotayo. Dikay agladingit, ta ti rag-o ti Apo ti mangpapigsa kadakayo.”

11Nagwaras dagiti Levita iti ummong dagiti tattao ket pinakiredda ti pakinakemda. Imbagada a dida agladladingit ta nasantoan daytoy nga aldaw.

12Nagawid ngarud dagiti amin a tattao, ket siraragsakda a nagpapangan ken nagiinum ket nagibingayda kadagiti kanenda ta naawatanda ti naibasa kadakuada.

Ti Fiesta dagiti Abong-abong

13Iti sumuno nga aldaw, napan dagiti ulo ti familia agraman dagiti papadi ken Levita ken ni Ezra tapno adalenda ti pannursuro ti Linteg.

14NatakuatandaLev. 23:33-36, 39-43; Deut. 16:13-15. a naibilin kadagiti Israelita nga agnaedda kadagiti abong-abong kabayatan ti Fiesta ti Abong-abong, kas sagudayen ti Linteg nga inted ni Yahweh ken ni Moises.

15Iti kasta, intedda dagiti annuroten iti entero a Jerusalem ken kadagiti dadduma a siudad ken il-ili: “Inkayo kadagiti turturod ket agalakayo kadagiti sanga ti olibo, kadagiti saleng, mirto, palma ken dadduma pay a kayo, ket agaramidkayo iti paglinonganyo, kas mayannurot iti alagaden iti Linteg.”

16Nagala ngarud dagiti tattao kadagiti sangsanga ket nagaramidda kadagiti paglinongan kadagiti tuktok dagiti balbalayda, kadagiti paraanganda, iti paraangan ti Templo, iti plasa iti abay ti Ruangan ti Danum ken iti abay ti Ruangan ni Efraim.

17Kasta met ti inaramid dagiti amin a nagsubli manipud kadagiti pagilian a nakaipananda a kas balud. Nagipatakderda kadagiti abong-abong a nagyananda. Daytoy ti damo a pannakaaramid ti fiesta manipud idi tiempo ni Josue nga anak ni Nun. Adda rag-o ken ragsak ti tunggal maysa kadakuada.

18Manipud iti umuna nga aldaw ti fiesta agingga iti maudi, inaldaw nga adda mabasa a paset ti Linteg ti Dios. Pito nga aldaw a nagrarambakda, ket iti maikawalo nga aldaw, adda naangay a seremonia a panggibus iti fiesta, kas mayannurot iti alagaden.