Isaias 24 - Bible with DC

Ti Panangdusa ni Yahweh iti Daga

1Dadaelento ti Apo ti daga ket baybay-annanto nga aglangalang. Gusogusoennanto ti rabaw ti daga ket warawaraennanto dagiti tattaona.

2Agpapadanto ti pagtungpalan ti tunggal maysa—dagiti papadi ken dagiti tattao, dagiti tagabu ken dagiti appoda, dagiti aggatgatang ken dagiti agtagtagilako, dagiti agpapautang ken dagiti umut-utang.

3Madadaelto ti daga ket aglangalang. Insao daytoy ti Apo ket matungpalto.

4Agmaga ti daga ket agtikag. Agangrag ken aglaylay ti lubong. Agpada nga agkapsut ti langit ken daga.

5Tinulawan dagiti tattao ti daga gapu ta sinalungasingda dagiti linteg ti Dios ket dida nagtungpal iti agnanayon a tulag.

6Iti kasta, adda lunod a mangdadael iti daga, ket agsagsagaba dagiti tattao gapu iti kinadakesda. Bassit dagiti matda a sibibiag.

7Malaylay dagiti ubas, ket kumirang ti arak. Naladingiten dagiti amin a naragsak idi,

8ket nagsardengen dagiti naragsak a tokar dagiti arpa ken tamborda.

9Awanen dagiti naragsak a kankanta no adda agiinum iti arak. Saanen a naimas ti arak.

10Nariribuk ken awan urnos ken talna iti siudad. Imbalunet dagiti tattao dagiti balbalayda tapno awan ti makastrek.

11Agpukpukkaw dagiti tattao kadagiti kalsada gapu ta awanen ti arak. Napukawen a namimpinsan ti ragragsak iti daga.

12Narba ti entero a siudad, ket narakraken dagiti ruanganna.

13Kastoyto ti mapasamak iti amin a pagilian iti entero a lubong. Kaslanto iti pannakalpas a mawagwag dagiti bunga ti olibo iti tunggal kayo ken maburas ti maudi nga ubas iti puonna.

14Agkantanto dagiti nakalasat gapu iti ragsakda. Manipud iti Laud, itan-okdanto ti Apo,

15ket idaydayawto met dagiti adda iti Daya. Idaydayawto dagiti tattao nga agnaed iti igid ti baybay ni Yahweh a Dios ti Israel.

16Manipud iti kaadayoan a paset ti lubong, mangngegtayto dagiti kanta a pangidaydayaw iti Israel, ti nalinteg a nasion.

Ngem awan ti pangnamnamaak! Kaslaak la marunrunot a kandela! Ngamin, dumegdeg a dumegdeg ti panangliput dagiti traidor!

17Dumngegkayo, dakayo nga agnaed ditoy daga. Adda dagiti pagbutngan, palab-og, abut ken bateng nga agur-uray kadakayo.

18Ti agpanggep a mangliklik iti pagbutngan, matnagto iti abut. Ti makalisi iti abut, matiliwto iti palab-og. Maibuyatto manipud langit ti bumayakabak a tudo ket madayyegto dagiti fondasion ti daga.

19Agrenggat ken agungapto ti daga, ket agpisi.

20Kas iti nabartek, agibar-ibarto ti daga ket agpallayogto a kas iti kalapaw iti tiempo ti bagio. Gapu iti dagsen dagiti basol a bakbaklayenna, marsuodto ti lubong ket pulos a dinton bumangon.

21Iti dayta nga aldaw, dusaento ti Apo dagiti pannakabalin iti ngato ken dagiti agtuturay iti daga.

22Ipisokto ti Dios dagiti ar-ari a kas kadagiti balud iti uneg ti abut. Ipupoknanto ida iti pagbaludan agingga a dumteng ti tiempo a pannakadusada.

23Agsipngetto ti bulan ket saanton nga aglawag ti init, agsipud ta agarinton ti Apo a Mannakabalin-amin. Agturayto idiay Jerusalem, iti Bantay Sion, ket makitanto dagiti pangulo dagiti tattao ti dayagna.