1 Cronicas 11 - Bible with DC

Maisaad ni David nga Ari ti Israel ken Juda(2 Sam. 5:1-10)

1Sangsangkamaysa dagiti amin a tribu ti Israel a napan ken ni David idiay Hebron ket kinunada kenkuana, “Kakabagian ken kadaraannakami.

2Iti napalabas, uray idi ari pay laeng ni Saul, sika ti nangipangpangulo iti armada ti Israel iti paggugubatan. Inkari kenka ti Apo a Diosmo nga ipanguloamto dagiti tattaona ket sikanto ti mangituray kadakuada.”

3Ngarud, napan dagiti amin a pangulo ti Israel ken ni David idiay Hebron. Nakitulag kadakuada iti imatang ni Yahweh. Inkonsagrarda ni David ket nagbalin nga ari ti Israel, kas inkari ni Yahweh ken ni Samuel.

4Rinaut Tinarimaan ni Joab ti dadduma a paset ti siudad.

9Bimmileg a bimmileg ni David ta adda kenkuana ni Yahweh a Mannakabalin-amin.

Dagiti Nalatak a Soldado ni David(2 Sam. 23:8-39)

10Daytoy ti listaan dagiti nalatak a soldado ni David a timmulong kadagiti Israelita a nangisaad kenkuana nga ari kas inkari ni Yahweh ket isuda ti nangpabileg iti pagarianna.

11Umuna ni Jasobeam iti kapuonan ni Hacmon. Isu ti pangulo “Dagiti Tallo.” Gayang ti inaramatna iti pannakigubatna kadagiti 300 a lallaki, ket pinatayna amin ida iti naminsan laeng a ranget.

12Ni Eleazar nga anak ni Dodo iti kapuonan ni Aho ti maikadua kadagiti agdindinamag a “Tallo.”

13Kaduana ni David a nakiranget kadagiti Filisteo idiay Pas Dammim. Adda idi iti talon a namulaan iti sebada idi agtataray dagiti Israelita.

14Ngem saan a nagtaray ni Eleazar ken dagiti soldadona ket nakirangetda kadagiti Filisteo iti tengnga ti talon. Impaay ni Yahweh kenkuana ti dakkel a balligi.

15Iti maysa nga aldaw, tallo kadagiti 30 a nalatak a soldado ti napan iti kabatoan a pagigianan ni David iti asideg ti Rukib ti Adullam. Nagkampo met dagiti Filisteo iti Tanap ti Refaim.

16Adda idi ni David iti nasarikedkedan a turod, ket sinakup ti maysa a bunggoy dagiti Filisteo ti Betlehem.

17Immapay ti iliw ni David ket kinunana, “Adda la koma mapan mangala iti danum nga inumek iti bubon iti abay ti ruangan ti Betlehem!”

18Sinarakusok dagiti tallo a mamaingel a soldado ti kampo dagiti Filisteo, simmakdoda iti bubon ket impanda ti danum ken ni David. Ngem saan nga ininum ni David; imbuyatna ketdi a kas daton ken ni Yahweh sana

19kinuna, “Diak mabalin nga inumen daytoy! Kasko la in-inumen ti dara dagitoy a lallaki a nangipusta iti biagda!” Isut' gapuna a dina kayat nga inumen ti danum. Dagitoy dagiti gapuanan dagitoy tallo a nalatak a mannakigubat.

20Ni Abisai a kabsat ni Joab ti pangulo dagiti “Mamaingel a Tallopulo.” Babaen iti gayangna, pinatayna ti 300 a lallaki iti pannakirangetna kadakuada. Gapu iti daytoy, nagbalin a nalatak kadagiti “Tallopulo.”

21Isu ti kalatakan kadagiti “Tallopulo,” ket nagbalin a panguloda ngem dina naartapan “Dagiti Tallo.”

22Maysa a nalatak a mannakigubat ni Benaias nga anak ni Jehoyada a taga-Kabzeel. Adu dagiti aramidna a nangipakitaanna iti kinaturedna. Pinatayna ti dua a nalaing a mannakigubat a Moabita. Iti naminsan nga agtudtudo iti niebe, napan iti maysa a rukib ket pinatayna ti maysa a leon.

23Adda pay pinatayna nga Egipcio nga agtayag iti a pito ket gudua a kadapan. Siaarmas ti Egipcio iti nakadakdakkel a gayang. Pang-or ti armas ni Benaias a nangdarup iti Egipcio. Inagawna ti gayang ti Egipcio ket daytoy ti pinangpatayna kenkuana.

24Dagitoy dagiti aramid ni Benaias a maysa kadagiti “Tallopulo.”

25Maysa a maingel kadagiti “Tallopulo” ngem saan a nalatak a kas kadagiti “Tallo.” Isu ti dinutokan ni David a pangulo dagiti guardiana.

26-47Dagitoy dagiti nalatak a mannakigubat:

Ni Asael a kabsat ni Joab;

ni Elhanan nga anak ni Dodo a taga-Betlehem;

Sammot a taga-Harod; Helez a taga-Pelet;

Ira nga anak ni Ikkes a taga-Tekoa;

Abiezer a taga-Anatot;

Sibbecai a taga-Husa;

Ilai a taga-Aho;

Maharai a taga-Netofa;

Heled nga anak ni Baana a taga-Netofa;

Itai nga anak ni Ribai a taga-Gabaa iti tribu ti Benjamin;

Benaias a taga-Piraton;

Hurai a naggapu kadagiti tanap iti asideg ti Gaas;

Abiel a taga-Arba;

Asmabet a taga-Bahurum;

Eliaba a taga-Saalbon;

Hasem a taga-Gizon;

Jonatan nga anak ni Sagee a taga-Harar;

Ahiam nga anak ni Sakar a taga-Harar;

Elifal nga anak ni Ur;

Hefer a taga-Mekera;

Ahija, a taga-Pelon;

Hezro a taga-Carmel;

Naarai nga anak ni Ezbai;

Joel a kabsat ni Natan;

Mibhar nga anak ni Hagri;

Zelek a taga-Ammon;

Naharai a taga-Beerot (isu ti para-iggem iti armas ni Joab);

Ira ken Gareb a taga-Jattir;

Urias a Hiteo;

Zabad nga anak ni Alai;

Adina nga anak ni Siza (maysa a nalatak a kameng iti tribu ti Ruben ket adda tallopulo a soldadona.)

Hanan nga anak ni Maaca;

Josafat a taga-Mitan;

Uzzia a taga-Astera;

Samma ken Jeiel nga annak ni Hotam a taga-Aroer;

Jediael ken Joa nga annak ni Simri a taga-Tiz;

Eliel a taga-Mahava;

Jeribai ken Josavias nga annak ni Elnaam;

Itma a taga-Moab;

Eliel, Obed ken Jaasiel a taga-Zoba.