Josue 4 - Bible with DC

Maibangon dagiti Baton-lagip

1Idi nakaballasiwen dagiti amin a tattao iti Karayan Jordan, kinuna ni Yahweh ken ni Josue:

2“Mangpilika iti 12 a lallaki, maysa kada tribu,

3ket pagpidutem ida iti saggagaysada a bato iti tengnga ti Jordan, iti mismo a nagtakderan dagiti papadi. Baklayenda dagitoy a bato ket ikabilda iti pagkampoanyo inton rabii.”

4Inayaban ngarud ni Josue dagiti 12 a pinilina

5ket imbagana kadakuada, “Umun-unakayo ngem ti Lakasa ti Tulag ti Apo a Diosyo. Inton dumtengkay iti tengnga ti Jordan, mangala ti tunggal maysa kadakay iti bato a baklayenna, maysa para iti tunggal tribu ti Israel.

6Agpaayto dagitoy a bato a pakalaglagipan dagiti tattao iti inaramid ti Apo. Iti masakbayan, inton saludsoden dagiti annakyo ti kaipapanan dagitoy,

7ibagayonto kadakuada a nagsardeng ti panagayus ti Jordan idi maiballasiw ti Lakasa ti Tulag ti Apo. Kanayonto nga ipalagip dagitoy a bato kadagiti Israelita ti napasamak ditoy.”

8Kas imbilin ni Yahweh ken ni Josue, nangala dagiti lallaki iti 12 a bato iti tengnga ti Jordan, maysa iti tunggal tribu ti Israel. Imballasiwda dagitoy nga impan iti nagkampoanda ket sadiay ti nangidissoanda.

9Nangikabil met ni Josue iti 12 a bato iti tengnga ti karayan, iti nagtakderan dagiti papadi a nangawit iti Lakasa ti Tulag. (Agpapan ita, adda pay laeng sadiay dagiti bato.)

10Nagtalinaed a sitatakder dagiti papadi iti tengnga ti Jordan agingga a nalpas amin nga imbilin ni Yahweh ken ni Josue nga aramiden dagiti tattao. Daytoy ti bilin idi ni Moises.

Nagdardaras a limmasat dagiti tattao.

11Idi nakaballasiwda aminen, immun-una manen ti Lakasa ti Tulag ni Yahweh ken dagiti papadi.

12Kas imbaga ni Moises kadakuada, immun-una ngem dagiti Israelita dagiti siiigam a lallaki iti tribu ni Ruben, iti tribu ti Gad ken ti kagudua ti tribu ti Manases.

13Iti imatang ni Yahweh, agarup 40,000 a mannakigubat ti nagturong iti pagbabakalan iti tanap nga asideg iti Jerico.

14Iti dayta nga aldaw, intan-ok ti Apo ni Josue iti imatang dagiti Israelita. Rinaraemda ni Josue iti unos ti panagbiagna a kas met iti panagraemda idi ken ni Moises.

15Imbaga ni Yahweh ken ni Josue

16a pasang-atenna iti Jordan dagiti papadi a mangaw-awit iti Lakasa ti Tulag.

17Nagtungpal ni Josue.

18Idi makatakdangen dagiti papadi, nagayus manen ti karayan ket naglippias dagiti teppangna.

19Maika-10 nga aldaw iti umuna a bulan idi ballasiwen dagiti tattao ti Jordan. Nagkampoda idiay Gilgal iti daya ti Jerico.

20Sadiay ti nangikabilan ni Josue kadagiti 12 a bato nga innalada idiay Jordan.

21Kinunana kadagiti Israelita, “Iti masakbayan, inton saludsoden dagiti annakyo ti kaipapanan dagitoy a bato,

22ilawlawagyonto kadakuada a nagmaga ti Jordan idi bimmallasiw ti Israel.

23Ibagayonto a pinagmaga ti Apo a Diosyo ti karayan agingga a nakaballasiwkayo, a kas iti inaramidna iti Nalabaga a Baybay idi bumallasiwkami.

24Gapu itoy, maammoanto ti amin a tao ditoy daga no kasano ti kadakkel ti pannakabalin ti Apo ket agnanayon nga agbutengkayto iti Apo a Diosyo.”