1Nangibaon ni Hiram nga ari ti Tiro iti bunggoy a makinegosio ken ni David. Pinatulodanna ni David kadagiti kayo a sedro agraman dagiti kantero ken karpintero tapno bangonenda ti palasio ni David.
2Iti kasta, nabigbig ni David nga insaad ni Yahweh a kas ari ti Israel, ket parparang-ayenna ti pagarianna gapu kadagiti tattaona.
3Idiay Jerusalem, nangasawa pay ni David kadagiti sabali a babbai ket naaddaan iti ad-adu pay nga annak.
4Dagitoy dagiti lallaki nga annakna a naipasngay idiay Jerusalem: Sammua, Sobab, Natan, Solomon,
5Ibhar, Elisua, Elpelet,
6Noga, Nefeg, Jafia,
7Elisama, Beeliadad ken Elifelet.
Ti Pannakaparmek dagiti Filisteo(2 Sam. 5:17-25)8Idi madamag dagiti Filisteo a naisaaden ni David nga ari ti entero a pagilian ti Israel, napanda binirok tapno tiliwenda. Iti kasta, rimmuar ni David a mangsaranget kadakuada.
9Dimteng dagiti Filisteo iti Tanap ti Refaim ket rinugianda ti nagsamsam.
10Sinaludsod ni David iti Dios, “Makirangetak kadi kadagiti Filisteo? Maparmekko kadi ida?”
Simmungbat ni Yahweh: “Wen, darupem ida, ket pagballigienka.”
11Rinaut ngarud ni David dagiti Filisteo idiay Baal Perazim ket pinarmekna ida. Kinuna ni David, “Inaramatnak ti Dios a kas layus a nangsawang iti sarikedked ti armada dagiti kabusor.” Dayta ti gapuna a napanaganan dayta a lugar iti Baal Perazim.
12Idi nagtataray a pimmanaw dagiti Filisteo, nabatida dagiti imahen dagiti diosda ket pinapuoran ida ni David.
13Iti saan a mabayag, nagsubli dagiti Filisteo iti tanap, ket nagsamsamda manen.
14Nakiuman manen ni David ken ni Yahweh. Imbaga ni Yahweh, “Saan a ditoy ti paggapuam a mangdarup kadakuada. Manglikawka ketdi ket darupem ida iti likudda, iti asideg dagiti kayo a balsamo.
15Inton mangngegmo dagiti danapeg iti ngatoen dagiti kaykayo, dagdagusem ti dumarup ta adda ti Dios iti sangoananyo a mangparmek iti armada dagiti Filisteo.”
16Tinungpal ni David ti imbilin ti Dios. Napagsanudda dagiti Filisteo manipud Gabaon agingga idiay Gezer.
17Nagdinamag ni David iti amin a lugar. Gapu ken ni Yahweh, nagbalin ni David a pagbutbutngan dagiti amin a nasion.
Who We AreWhat We EelieveWhat We Do
2025 by iamachristian.org,Inc All rights reserved.
