Dagiti Salmo 46 - Bible with DC

Adda Kadatayo ti Dios

1Ti Dios ti kamang ken pigsatayo;

sisasagana a tumulong iti nariribuk a tiempo.

2Ditay ngarud agbuteng uray no agginggined,

ken margaay dagiti bantay a maigabor iti taaw,

3uray no agdaranudor dagiti baybay,

ken magunggon dagiti turod gapu iti dawelna.

4Adda karayan a mangted rag-o iti siudad ti Dios,

iti nasantoan a pagtaengan ti Kangatoan.

5Iti daytoy a siudad, agnaed ti Dios;

awanto pakaan-anoanna, dinto marsuod,

parbangon pay laeng tulongannan.

6Agkintayeg dagiti pagilian,

aglagaw dagiti pagarian,

aggurruod ti Dios ket marunaw ti daga.

7Adda kadatayo ti Apo a Mannakabalin-amin;

ti Dios ni Jacob ti kamangtayo.

8Umayyo kitaen ti inaramid ti Apo!

Imutektekanyo dagiti nakaskasdaaw nga inaramidna ditoy daga!

9Pagsardengenna dagiti gubat iti sangalubongan;

dadaelenna dagiti pana, tukkolenna dagiti gayang,

ken puoranna dagiti lugan a pakigubat.

10“Isardengyo ti aggugubat

ket ammoenyo a siak ti Dios,” kunana.

“Siak ti kangatoan kadagiti nasion,

katan-okan iti entero a lubong!”

11Adda kadatayo ti Apo a Mannakabalin-amin;

ti Dios ni Jacob ti kamangtayo!