Ezekiel 33 - Bible with DC

Dutokan ti Dios ni Ezekiel a Guardia(Eze. 3:16-21)

1Nagsao ti Apo kaniak.

2Kinunana, “Anak ti tao, ibagam kadagiti kailiam ti mapasamak no yegko ti gubat iti maysa a pagilian. Mangdutok dagiti tattao iti dayta a pagilian iti maysa kadakuada nga agbalin a guardia.

3No makita ti guardia a sumungad dagiti kabusor, pagunienna ti trumpeta tapno ballaaganna dagiti tattao.

4No adda makangngeg iti ballaag ngem dina ipangag, ket dumteng ti kabusor a mangpapatay kenkuana, isu ti akimbasol iti ipapatayna.

5Basolna ti ipapatayna agsipud ta dina impangag ti ballaag a nangngegna. No impangagna, nakalibas koma.

6Ngem no makita ti guardia ti isusungad ti kabusor ket dina pagunien ti trumpeta, dumtengto ti kabusor a mangpapatay kadagita a managbasol. Pabasolekto ti guardia iti pannakapapatayda.

7“Ita, anak ti tao, isaadka a guardia iti Israel. Ipakaammom kadakuada dagiti ballaag nga ibagak kenka.

8No kunak a matay ti managdakdakes, ngem dimo ballaagan a mangbaliw iti aramidna, matayto a managbasol ket pabasolenka iti ipapatayna.

9No ballaagam ti managdakdakes ket dina isardeng ti kinadakesna, matayto a managbasol, ngem maispalto ti biagmo.”

Ti Pagrebbengan ti Tunggal Maysa

10Nagsao ti Apo kaniak. Kinunana, “Anak ti tao, ulitem kadagiti Israelita ti sasawenda: ‘Madagsenankami kadagiti basolmi ken dagiti dakes a naaramidmi. Main-inut a mapukawkami. Awanen ti namnamami iti biag.’

11Ibagam kadakuada nga isapatak iti naganko nga Apo a sibibiag a Dios, diak agragsak a makakita iti ipapatay ti managbasol. Kaykayatko a makita nga isardengna ti agbasol tapno agbiag. Dakayo nga Israelita, isardengyo ti dakes nga aramidyo. Apay aya a kayatyo ti matay?

12“Ita, anak ti tao, ibagam kadagiti Israelita a no agbasol ti nalinteg a tao, saanto nga isalakan ti naimbag nga inaramidna. No isardeng ti managbasol ti dakes nga aramidna, saan a madusa. No rugian ti nalinteg a tao ti agbasol, dinto agbiag.

13Mabalinko nga ikari nga agbiag ti naimbag a tao, ngem no panunotenna nga umanayen dagiti naimbag nga aramidna iti napalabas ket rugianna ti agbasol, diakto lagipen dagiti naimbag nga inaramidna. Matayto gapu kadagiti basolna.

14Mabalinko a ballaagan ti maysa a managbasol ket ibagak a matay, ngem no isardengna ti agbasol ket aramidenna ti nasayaat ken rumbeng—

15kas pangarigan isublina ti naisalda kenkuana ken ti tinakawna—no agsardeng nga agbasol ket tungpalenna dagiti linteg a mangted iti biag, saanto a matay ngem agbiag.

16Pakawanekto dagiti basolna. Agbiagto agsipud ta inaramidna ti nasayaat ken rumbeng.

17“Kuna dagiti kailiam a saan a nalinteg ti aramidko. Ti aramidda ti saan a nalinteg.

18No isardeng ti nalinteg a tao ti agaramid iti naimbag ket rugianna ti agaramid iti dakes, matayto gapu iti daytoy.

19No isardeng ti managbasol ti agaramid iti dakes ket aramidenna ti nasayaat ken rumbeng, inispalna ti biagna.

20Ngem, dakayo nga Israelita, kunayo a saan a nalinteg ti aramidko. Ukomenkayto gapu iti aramidyo.”

Maipadamag ti Pannakadadael ti Jerusalem

21Iti2 Ar. 25:3-10; Jer. 39:2-8; 52:4-14. maikalima nga aldaw, iti maika-10 a bulan iti maika-12 a tawen a pannakaitalawmi, adda lalaki a nakalibas manipud idiay Jerusalem. Immay kaniak ket impadamagna a natnagen ti siudad ti Jerusalem.

22Iti dayta a rabii sakbay ti idadatengna, nariknak ti pannakabalin ti Apo. Idi dumteng ti nakalibas, iti sumuno a bigat, insublin ti Apo ti pannakabalinko nga agsao.

Dagiti Basol dagiti Tattao

23Nagsao ti Apo kaniak.

24Kinunana, “Anak ti tao, kastoy ti kuna dagiti agnaed kadagiti nadadael a siudad ti Israel, ‘Maymaysa ni Abraham idi naited kenkuana ti entero a daga. Ngem ita ta adutayon, kukuatayon ti daga.’

25“Ibagam kadakuada a siak nga Apo a Dios, kastoy ti kunak: Agsidsidakayo iti karne nga adda darana. Agdaydayawkayo kadagiti didiosen. Agpapataykayo. Ania ti panggapuanyo nga agkuna a kukuayo ti daga?

26Pagtangtangsityo dagiti kampilanyo. Makarimon dagiti aramidyo. Makikamkamalalakayo. Ania ti panggappuanyo nga agkuna a kukuayo ti daga?

27“Ibagam kadakuada nga isapatak iti naganko nga Apo a sibibiag a Dios, ballaagak ida a mapapatayto dagiti agnaed kadagiti narba a siudad. Kanento dagiti atap nga animal dagiti agnaed iti away. Agsakitto ket matayto dagiti aglemlemmeng kadagiti bantay ken rukib.

28Pagbalinekto a langalang ken awan serserbina ti daga. Agpatingganton ti pannakabalin a pagtangtangsitda. Agbalinto a nakabutbuteng dagiti bantay ti Israel ket awanton ti agdaliasat sadiay.

29Inton dusaek dagiti tattao gapu kadagiti basolda ket paglangalangek ti pagilian, maammoandanton a siak ni Yahweh.”

Saan a Tungpalen dagiti Tao ti Sao ti Profeta

30Kinuna ti Apo, “Anak ti tao, pagsasaritaandaka dagiti kailiam no agsasarakda kadagiti bakud ti siudad wenno kadagiti ruangan ti balayda. Kunada iti tunggal maysa, ‘Intay denggen no ania ti sao nga aggapu ita iti Apo.’

31Isut' gapuna nga agdudupudop dagiti tattaok nga umay dumngeg kenka, ngem dida tungpalen ti ibagam nga aramidenda. Napno iti ayat dagiti balbalikasda ngem dagiti inaagum nga aramidda.

32Ibilangdaka laeng nga agpabpabuya nga agkankanta iti kanta ni ayat wenno agtuktokar iti arpa. Denggenda ti amin a saom ngem pulos nga awan ti tungpalenda.

33Ngem inton matungpal dagiti saom—ket awan duadua ti pannakatungpalda—daytoyto ti pakaammoanda nga adda profeta a nagnaed kadakuada.”