Ezekiel 4 - Bible with DC

Iladawan ni Ezekiel ti Pannakalakub ti Jerusalem

1Kinuna ti Dios, “Anak ti tao, mangalaka iti ladrilio, ket ikabilmo iti sangom samo uged-ugedan a mangiladawan iti siudad ti Jerusalem.

2Iladawam ti pannakalakub ti siudad. Mangugedka iti sinan-sarikedked, sinan-torre a pagwanawanan, sinan-kampo ken kadagiti sinanmaso a pagrakrak iti lawlawna.

3Mangalaka iti landok a pariok, ket ikabilmo a kas bakud a nagbaetan ti lugar nga ayanmo ken ti siudad. Sangoem ti siudad a kasla sika ti manglaklakub. Agpaayto daytoy a pagilasinan ti pagilian dagiti Israelita.

4-5“Agiddaka nga agsikig iti makannigidmo ket ipatayko kenka ti basol ti Israel. Iti las-ud ti 390 nga aldaw, agyankanto sadiay ket agsagabakanto gapu kadagiti basbasolda. Sinentensiaanka iti maysa nga aldaw iti tunggal tawen a panagpaut ti dusada.

6Inton aggibus dagitoy nga aldaw, agballikidkanto iti makannawanmo, ket sagabaem ti basol ti Juda iti 40 nga aldaw—maysa nga aldaw ti tunggal tawen ti dusada.

7“Dimo isina ti panagkitam iti pannakalakub ti Jerusalem. Layatam, ket agipadtoka iti maibusor iti siudad.

8Parautanka tapno saanka a makapagballikid agingga a malpas ti pannakalakub ti siudad.

9“Ita, mangalaka iti trigo, sebada, utong, patani, miho ken espelta. Paglalaokem ida amin, ket agaramidka iti tinapay. Daytoyto ti kanem bayat ti 390 nga aldaw a panagiddam a nakasikig iti kannigid.

10Walo nga onsa ti tinapay ti maipalubos a kanem iti tunggal aldaw, ket masapul a mayanay agingga iti sumuno nga aldaw.

11Makedngan pay ti inumem. Dua a baso ti danum laeng iti inaldaw.

12Mangpuorkanto iti namaga a takki ti tao ket usaremto ti beggangna a pangluto iti bibingka a sebada. Kanemto ti bibingka iti imatang dagiti tattao.”

13Kinuna ti Apo, “Inton iwarawarak dagiti Israelita iti nadumaduma a pagilian, kastoyto ti wagas ti pannanganda iti taraon a saan a nadalus.”

14Ngem insungbatko, “Saan, Apo Dios! Diak pay tinulawan ti bagik. Manipud kinaubingko, diak pay nagsida iti karne ti animal a natay wenno pinatay ti narungsot nga animal. Diak pay nangan iti taraon a maibilang a narugit.”

15Iti kasta, kinuna ti Dios, “Ala wen, palubosanka a mangusar iti takki ti baka a panglutom iti tinapaymo.”

16Kinunana pay, “Anak ti tao, isardengkonto ti pannakaited ti taraon dagiti agnanaed idiay Jerusalem. Madanagan ken mariribukanto dagiti tattao sadiay bayat ti panangsukatda iti taraon ken inumenda.

17Wen, maibusandanto iti kanen ken inumen. Mapukawdanto ti namnamada. Main-inutdanto a mapukaw gapu kadagiti basolda.”