Isaias 19 - Bible with DC

Dusaento ti Dios ti Egipto

1DaytoyJer. 46:2-26; Eze. 29:1–32:32. ti pakdaar maipapan iti Egipto.

Mapan ti Apo idiay Egipto. Napardas ti ulep a paglugananna. Agtigerger dagiti didiosen ti Egipto iti imatangna, ket tumakrot dagiti Egipcio.

2Kuna ti Apo, “Pataudek ti riribuk idiay Egipto. Agbibinnusorto dagiti agkakabsat ken dagiti agkakaarruba. Aggugubatto dagiti siudad ket pagiinnagawanto dagiti ari ti turay.

3Paayekto ti panggep dagiti taga-Egipto ket dadaelekto ti tured ti pakinakemda. Agpatulongdanto kadagiti didiosenda. Makiumandanto kadagiti mammuyon ket pabagbagaandanto kadagiti espiritu dagiti natay.

4Yawatkonto dagiti Egipcio iti naranggas a tao ket iturayanto ida ti nauyong nga ari.” Daytoy ti sao ti Apo a Mannakabalin-amin.

5Umababawto ti Karayan Nile ket mangin-inutto nga agmaga.

6Mabungsotto dagiti pagayusan ti karayan bayat ti in-inut a panages-esna. Malaylayto dagiti runo ken tanubong.

7Magangonto amin a mulmula iti igid ti Karayan Nile ket mayangindanto.

8Agasug ken agsangitto dagiti mangngalap nga agbibiag babaen iti panagkalkalapda iti karayan. Awanto ti serserbi dagiti banniit ken iketda.

9Mapukawto ti namnama dagiti agab-abel iti lupot a linen.

10Lumdaang ken agladingitto dagiti umaabel ken nalaing nga agtrabaho.

11Maag dagiti papangulo iti siudad ti Zoan! Minamaag ti balakad dagiti mamasirib iti Egipto. Ania ket a tureddan a mangibaga iti ari nga isuda ti timmawid iti laing dagiti mamasirib ken dagiti ari!

12Sika nga ari ti Egipto, sadino ti ayan dagiti mamasirib a mamagbaga kenka? Nalabit a maibagada kenka ti plano ti Apo a Mannakabalin-amin maipapan iti Egipto.

13Maag dagiti papangulo ti Zoan ken Memfis. Rumbeng nga isuda ti mangidalan iti nasion ngem isuda ketdi ti nangyaw-awan.

14Aramid ti Apo ti pannangtedda kadagiti balakad a mangyaw-awan. Gapu iti daytoy, pasig a dakes ti aramid ti Egipto. Agibar-ibar a kas iti nabartek. Mabaddekanna ti saruana ket maikaglis.

15Awan a pulos ti maaramid ti Egipto, nabaknang man wenno napanglaw, nanumo man wenno natan-ok.

Agdaydayawto ti Egipto ken ni Yahweh

16Dumtengen ti tiempo a tumakrot a kasla babbai dagiti tattao ti Egipto. Agtigergerdanto iti buteng inton makitada ti Apo a Mannakabalin-amin a mangilayat iti imana a pangdusa kadakuada.

17Tunggal malagipda ti Juda, agtigergerdanto iti buteng ket malagipda met ti kinadaksanggasat nga insagana ti Apo a Mannakabalin-amin nga agdissuor kadakuada.

18Inton dumteng dayta a tiempo, Hebreo ti maaramatto a pagsasao iti lima a siudad ti Egipto. Agsapatanto dagiti tattao sadiay iti nagan ti Apo a Mannakabalin-amin. Maysanto kadagiti siudad ti maawagan iti “Siudad ti Init.”

19Inton dumteng dayta a tiempo, addanto altar a maidaton iti Apo iti daga ti Egipto. Addanto met nasagradoan nga adigi a naikonsagrar kenkuana iti beddeng ti Egipto.

20Agserbinto dagitoy a pakakitaan iti kaadda ti Apo a Mannakabalin-amin idiay Egipto. Inton maparparigat dagiti tattao sadiay ket agpatulongda iti Apo, mangibaonto iti mangispal kadakuada.

21Ipakaammonto ti Apo ti kinasiasinona kadagiti Egipcio ket bigbigen ken agdaydayawdanto kenkuana. Agidatagdanto kenkuana kadagiti sakrifisio ken daton. Agsapatadanto kenkuana ket tungpalendanto ti karida.

22Dusaento ni Yahweh dagiti Egipcio ngem paimbagennanto met la ida. Agsublidanto kenkuana ket ipangagnanto dagiti kararagda ken paimbagennanto ida.

23Inton dumteng dayta a tiempo, addanto dakkel a kalsada nga aggapu iti Egipto nga agturong idiay Asiria. Makapanto dagiti taga-Asiria idiay Egipto ket makapanto met dagiti taga-Egipto idiay Asiria. Agmaymaysanto dagiti dua a nasion iti panagdaydayawda.

24Inton dumteng dayta a tiempo, maipadanto ti Israel iti Egipto ken Asiria. Agbalinto dagiti tallo a nasion a bendision iti entero a daga.

25Bendisionanto ti Apo a Mannakabalin-amin ida. Kunananto, “Bendisionanka, Egipto, dakayo a tattaok; sika, Asiria, a pinarsuak; ken sika, Israel, a pinilik a tattaok.”