Ezekiel 7 - Bible with DC

Asidegen ti Panungpalan ti Israel

1Nagsao ti Apo kaniak.

2Kinunana, “Anak ti tao, kastoy ti kunak nga Apo a Dios iti daga nga Israel: Dumtengen ti panungpalan ti entero nga Israel!

3“Israel, dimtengen ti panungpalam. Mariknamto ti pungtotko ta ukomenka gapu kadagiti aramidmo. Balsenkanto gapu iti amin a makarimon nga aramidmo.

4Dikanto pakawanen wenno kaasian. Dusaenkanto gapu kadagiti makarimon nga aramidmo tapno maammoam a siak ni Yahweh.”

5Kastoy ti kuna ti Apo a Dios, “Agsasarunonto a didigra ti agdissuor kenka.

6Nalpasen! Daytoyen ti panungpalan. Daytoyen ti kanibusanam!

7Dumtengen ti panungpalanyo, dakayo a tattao nga agnaed iti daga nga Israel. Asidegen ti tiempo nga awanton ti panagrarambak kadagiti pagdaydayawan iti bantay, ket pasigto aminen a pannakariribuk.

8“Iti saan a mabayag, mariknayonton ti amin a dawel ti pungtotko, ta ukomenkayto gapu kadagiti aramidyo. Balsenkayto gapu iti makarimon nga aramidyo.

9Dikayto pakawanen wenno kaasian. Dusaenkayto gapu kadagiti aramidyo. Iti kasta, maammoanyonto a siak ni Yahweh, ket siak ti mangdusa kadakayo.”

10Dumtengen ti aldaw ti didigra. Umad-adun ti kinaranggas. Nakaro unayen ti kinatangsit.

11Ad-adu a kinadakes ti patauden ti kinadawel. Awanto ti agtalinaed a kukuada; mapukawto ti kinabaknangda, ti dayagda wenno kinaraniagda.

12Dumtengen ti tiempo. Asidegen ti aldaw nga awanton ti serserbi ti panaggatang ken panaglako, ta agdissuorton ti pungtot ti Dios kadagiti amin a tattao.

13Awanton ti agtagtagilako nga agpaut ti panagbiagna tapno mapasublina ti napukawna ta agdissuoren ti pungtot ti Dios iti tunggal maysa. Saan a makalasat dagiti managdakdakes.

14Mapuyotto dagiti trumpeta ket agsagananto ti amin ngem awan ti mapan makigubat ta agdissuor ti pungtot ni Yahweh iti tunggal maysa.

Dusa ti Basol dagiti Israelita

15Adda agraranget kadagiti kalsada, ket kadagiti balbalay adda sakit ken bisin. Matayto iti ranget dagiti adda iti away, ket dagiti adda iti siudad, mataydanto iti sakit ken bisin.

16Addanto dagiti agkamang kadagiti bambantay a kasla napabutngan a kalapati manipud kadagiti tanap. Agsasainnekdanto gapu kadagiti basbasolda.

17Agkapsutto dagiti imada, ket agkutukotto dagiti tumengda.

18Agarruatdanto iti nakersang a lupot. Agtigergerdanto. Makuskosanto dagiti uloda ket maibabaindanto.

19Ibellengdanto a kas basura dagiti balitok ken pirakda iti kalsada, agsipud ta saan ida a maisalakan ti balitok ken pirak inton idissuor ni Yahweh ti pungtotna. Saanda a mabalin nga aramaten dagitoy a panggun-od iti tarigagayda wenno pangep-ep iti bisinda. Dagiti balitok ken pirak ti nakaigapuan ti panagbasolda.

20Pinagparammagda dagiti napintas nga alahasda, ket inaramidda ida a makarimon nga imahen. Isut' gapuna a pinagbalin ni Yahweh a karimonda dagiti sanikuada.

21Kuna ni Yahweh, “Palubosakto dagiti ganggannaet nga agsamsam kadagiti sanikuada. Agawento dagiti managdakdakes ti kinabaknangda ket tulawanda.

22Diakto bumibiang uray no rabngisenda ti Templok, uray no serken dagiti mannanakaw ket tulawanda.

23“Awanen ti urnos. Adu unayen ti mapappapatay ket napnon dagiti siudad iti kinaranggas.

24Yegkonto ditoy dagiti kadaksan a nasion, ket ipaluboskonto a tagikuaenda dagiti balbalayyo. Mapukawton dagiti napipigsa a lallaki ti panagtalekda kadagiti bagbagida inton palubosak dagiti nasion a mangtulaw kadagiti lugar a pagdaydayawanyo.

25Mapukawen ti namnama. Birokenyonto ti talna ket pulos a diyonto masarakan.

26Agsasarunonto a dumteng ti didigra, kasta met ti dakes a damag. Agpakpakaasikayto kadagiti profeta nga ipakaammoda dagiti mapasamak iti masakbayan. Awanto ti maisuro dagiti papadi kadagiti tattao. Awanto met ti maibalakad dagiti panglakayen.

27Agladingitto ti ari, mapukawto ti namnama ti prinsipe, ket agtigergerto dagiti tattao gapu iti buteng. Dusaenkayto gapu kadagiti amin nga inaramidyo, ket ukomenkayto a kas iti panangukomyo kadagiti sabali a tattao. Daytoyto ti mangipakita a siak ni Yahweh.”