Dagiti Salmo 38 - Bible with DC

Kararag ti Tao nga Agsagsagaba

1O Apo, dinak kad

dusaen gapu iti pungtotmo!

2Sinugatnak kadagiti panam,

ken dinissoannak kadagiti imam.

3Nadagsen unay ti sakitko gapu iti pungtotmo;

agut-ot ti entero a bagik gapu iti basolko.

4Malmesak iti kaadalem dagiti salungasingko;

makusboak iti dagsenda a napalalo.

5Agnunog ken agbuyok dagiti gaddilko,

gapu iti kinamaagko.

6Napnoak iti parikut ket napasagak;

agmalmalem nga agdungdung-awak.

7Nangato ti gurigorko

ket naut-ot dagiti laslasagko.

8Agkakapsutak ket awanen ti pigsak;

mariribukan toy pusok,

ket agasugak gapu iti ut-ot.

9O Apo, ammom amin a tarigagayko;

mangngegmo ti amin nga asugko.

10Aggutok-gutok toy barukongko ket agkapsutak,

awan metten rimat dagiti matak.

11Gapu iti gaddil nga adda kaniak,

didak asitgan dagiti gagayyem ken kaarrubak,

uray pay ti familiak, adaywandak.

12Agaramid iti palab-og dagiti agpanggep a pumatay kaniak;

dagiti agtarigagay a mangsugat kaniak,

ipangtada ti pannakadadaelko.

Saanda nga agsardeng a mangisiksikat kaniak.

13Kaslaak la tuleng a di makangngeg;

kaslaak la umel a di makasao.

14Wen, kaslaak la tao a di makangngeg;

ket iti kasta, saanak a makasungbat.

15Ngem agtalekak kenka, O Apo,

Apo a Diosko, sungbatannak.

16Dimo ipalubos nga agragsak

dagiti kabusorko iti pakarigatak,

dimo ipalubos a pagtangsitda ti pannakaipababak.

17Ta dandaniakon matnag,

ket kanayon nga agsagsagabaak.

18Ipudnok dagiti basbasolko;

mariribukak kadagiti salungasingko.

19Dagiti kabusorko nasalun-at ken napigsada;

adu ti gumura kaniak nga awan gapgapuna.

20Kaguradak dagiti tattao a dakes ti isubadda iti imbag,

agsipud ta ikalikagumko nga aramiden ti nasayaat.

21O Apo, dinak kadi baybay-an;

O Diosko, dinak kad adaywan.

22Darasem ti umay tumulong kaniak,

O Apo a salakanko!