Ezekiel 30 - Bible with DC

Dusaento ni Yahweh ti Egipto

1Nagsao manen ti Apo.

2Kinunana, “Anak ti tao, agipadtoka ket ipakaammom a siak nga Apo a Dios, kastoy ti kunak. Ipukkawmo:

Dumtengen ti aldaw a nakaal-alliaw!

3Asidegen ti aldaw,

Wen, ti aldaw a panagtignay ti Apo.

Nalidemto dayta nga aldaw,

Aldaw a pannakadusa dagiti nasion.

4Bumtakto ti gubat idiay Egipto,

Ket addanto dakkel a didigra idiay Etiopia.

Adunto ti mapapatay idiay Egipto,

Masamsamto ti sanikua ti pagilian

Ket mabaybay-anto nga aglangalang.

5“Iti dayta a gubat, mapapatayto dagiti natangdanan a soldado ti Etiopia, Put, Lud, Arabia, Kub ken uray dagiti tattaok.”

6Kuna ni Yahweh, “Matayto iti gubat dagiti amin a mangsalsalaknib iti Egipto, manipud Migdol iti amianan agingga iti Siene iti abagatan. Maparmekto ti napalangguad nga armada ti Egipto. Siak nga Apo a Dios ti nagsao.

7Tinto dagada ti kakaroan iti pannakadadaelna iti entero a lubong. Marbanto a mamimpinsan dagiti siudadna.

8Inton puorak ti Egipto ket mapapatay amin a mangsalsalaknib kenkuana, maammoandanton a siak ni Yahweh.

9“Inton dumteng dayta nga aldaw, ibaonkonto dagiti tattaok nga aglugan kadagiti barko tapno riingendanto dagiti awan annadda a tattao ti Etiopia. Kasta unayto ti butengda gapu iti pannakadadael ti Egipto. Dumtengen dayta nga aldaw!”

10Kuna ti Apo a Dios, “Ninto Nebucadnesar nga ari ti Babilonia ti aramatek a panggibus iti kinabaknang ti Egipto.

11Kaduananto ti naranggas nga armadana nga umay mangdadael iti daga. Sikakampilandanto a mangraut iti Egipto ket mapnonto ti daga kadagiti bangkay.

12Pagmagaekto ti Karayan Nile ket iturayanto dagiti managdakdakes a tattao ti Egipto. Dadaelento dagiti ganggannaet ti entero a daga.” Daytoy ti kuna ti Apo.

13Kuna ti Apo a Dios, “Dadaelekto dagiti imahen, kasta met dagiti sinan-dios idiay Memfis. Awanton ti mangituray iti Egipto ket pagbutngekto dagiti amin a tattao.

14Pagbalinekto a langalang ti akin-abagatan nga Egipto ket puorakto ti siudad ti Zoan iti amianan. Dusaekto ti kangrunaan a siudad ti Tebes.

15Ipariknakto ti pungtotko iti siudad ti Pelusium, ti agdindinamag a sarikedked ti Egipto. Dadaelekto ti kinabaknang ti Tebes.

16Puorakto ti Egipto ket agsagabanto ti Pelusium. Marbanto dagiti bakud ti Tebes ket malayusto ti siudad.

17Matayto iti gubat dagiti agtutubo kadagiti siudad ti Heliopolis ken Bubastis ket maitalawto a kas balud dagiti dadduma a tattao.

18Agsipngetto ti init idiay Tafnes inton dadaelek ti pannakabalin ti Egipto ket gibusak ti bilegna a pagtangtangsit dagiti tattao. Addanto ulep a mangkumot iti Egipto ket maitalawto dagiti tattao iti amin a siudad.

19Kastoyto ti panangdusak iti Egipto ket maammoandanto a siak ni Yahweh!”

Ti Pannakadadael ti Turay ti Ari ti Egipto

20Iti maikapito nga aldaw iti umuna a bulan, iti maika-11 a tawen, nagsao ti Apo kaniak.

21Kinunana, “Anak ti tao, tinukkolko ti takkiag ti ari ti Egipto. Saankonto a pagimbagen tapno dinanto kabaelan ti agiggem iti kampilan.

22Ngarud, siak nga Apo a Dios kastoy ti kunak: ‘Siak ti kabusor ti ari ti Egipto. Tukkolek dagiti dua a takkiagna—ti saan pay a natukkol ken ti natukkolen, ket maibbatannanto ti kampilan.

23Iwarawarakto dagiti Egipcio kadagiti nasnasion.

24Kalpasanna, papigsaekto dagiti takkiag ti ari ti Babilonia ket ipaiggemkonto kenkuana ti kampilanko. Ngem tukkolekto dagiti takkiag ti ari ti Egipto ket agasugto agingga a matay iti sangoanan ti kabusorna.

25Wen, pakapsutekto ti ari ti Egipto; ngem papigsaekto ti ari ti Babilonia ket inton itedko kenkuana ti kampilanko ket ilayatna iti Egipto, maammoanto ti amin a siak ni Yahweh.

26Iwarawarakto dagiti Egipcio iti entero a lubong. Iti kasta, maammoandanto a siak ni Yahweh.’”