Genesis 30 - Bible with DC

1Nagimon ni Raquel iti kabsatna idi saanda nga aganak ken ni Jacob. Kinunana ken ni Jacob, “Matayak la ketdi no saanta a maadaan iti anak.”

2Nakaunget ni Jacob ken ni Raquel ket kinunana, “Mabalinko aya nga alaen ti lugar ti Dios? Saan a siak ti manglaplapped iti panaganakmo.”

3Kinuna ni Raquel, “No kasta, ni Bilha a tagabuk ti kaiddaem tapno aganak ket agbalinak nga ina gapu kenkuana.”

4Intedna ngarud ni Bilha ket kinaidda ni Jacob.

5Nagsikog ni Bilha ket naganak iti lalaki.

6Kinuna ni Raquel, “Kinaasiannak ti Dios. Impangagna ti kararagko ket pinaraburannak iti anak a lalaki.” Isut' gapuna a pinanagananna ti maladaga iti Dan.

7Nagsikog manen ni Bilha ket naganak iti lalaki.

8Kinuna ni Raquel, “Nakidangadangak a sipipinget ken ni manangko ket nangabakak.” Pinanagananna ngarud ti ubing iti Neftali.

9Idi madlaw ni Lea a simmardengen nga aganak, intedna ni Zilpa a tagabuna a kas asawa ni Jacob.

10Naganak ni Zilpa iti lalaki.

11“Nagasatak,” kinuna ni Lea. Iti kasta, pinanagananna ti maladaga iti Gad.

12Naganak manen ni Zilpa iti lalaki

13ket kinuna ni Lea, “Anian a ragsakko! Ita, awagandakon dagiti babbai iti naragsak.” Pinanagananna ngarud ti ubing iti Aser.

14Panagani idi iti trigo. Napan ni Ruben iti taltalon, ket adda nasarakanna a bungbunga ti mandragoras. Insangpetna dagitoy ken ni nanangna a Lea. Kinuna ni Raquel ken ni Lea, “Ikkannak man iti mandragoras nga insangpet ti anakmo.”

15Kinuna ni Lea, “Di pay la umdas aya nga inagawannak iti asawa? Ita, kayatmo pay nga alaen dagiti mandragoras ti anakko!”

Kinuna ni Raquel, “No ikkannak iti mandragoras, ipalubosko a makikaiddaka ken ni Jacob ita a rabii.”

16Iti sumipnget, idi sumangpet ni Jacob a naggapu iti taltalon, sinabat ni Lea ket kinunana, “Umayka kaniak ita a rabii gapu ta inikkak ni Raquel iti mandragoras kas bayad ti pannakikaiddak kenka.” Nagkaiddada ngarud iti dayta a rabii.

17Impangag ti Dios ti kararag ni Lea. Nagsikog ket impasngayna ti maikalima nga anakna a lalaki.

18Kinuna ni Lea, “Ginunggonaannak ti Dios ta intedko ti tagabuk ken ni asawak.” Iti kasta, pinanagananna ti anakna iti Issacar.

19Nagsikog manen ni Lea ket impasngayna ti maikanem a lalaki nga anak ni Jacob.

20Kinunana, “Inikkannak ti Dios iti napateg a sagut. Ita, awatennakon ti asawak ta nakayanakak iti innem a lallaki.” Pinanagananna ngarud ti ubing iti Zabulon.

21Ket kalpasanna, naganak iti babai a pinanagananna iti Dina.

22Kamaudianna, naasian met laeng ti Dios ken ni Raquel. Impangagna ti kararagna; inikkanna iti gundaway nga aganak.

23Nagsikog ni Raquel ket naganak iti lalaki. Kinunana, “Inikkat ti Dios ti pakaibabainak gapu iti pannangtedna kaniak iti anak.

24Ikkannak koma ti Apo iti sabali pay nga anak a lalaki.” Iti kasta, pinanagananna ti ubing iti Jose.Makitinnawar ni Jacob ken ni Laban

25Kalpasan ti pannakaipasngay ni Jose, kinuna ni Jacob ken ni Laban, “Palubosannak koma nga agawid.

26Ikuyogko dagiti assawak ken dagiti annakko. Nateggedko ida gapu iti panagserbik kenka.”

27Kinuna ni Laban, “Palubosannak koma a mangibaga iti daytoy: Kas maibatay iti nasursurok maipapan iti panagpadles, ammok a binendisionannak ti Apo gapu kenka.

28Ibagam ti kayatmo a sueldo ket itedko.”

29Insungbat ni Jacob, “Ammom no kasano ti panagserbik kenka ken no kasano ti yaadu dagiti arbanmo iti aywanko.

30Bassit pay la ti sanikuam sakbay a simmangpetak ngem nakarangrang-aykan ta binendisionannaka ti Apo gapu kaniak. Ita, tiempona metten a tamingek ti pagimbagak.”

31“Ania ngarud ti itangdanko kenka?” sinaludsod ni Laban.

“Diak dumawat iti sueldo,” insungbat ni Jacob. “Ituloyko a taraknen dagiti animalmo no umanamongka iti singasingko.

32Ita met laeng, innak kadagiti arbanmo ket alaek amin a nangisit nga urbon ti karnero ken amin a labang wenno turikturikan nga urbon ti kalding. Kukuakon dagitoy a kas tangdanko.

33Iti masakbayan, nalakamto a matakuatan no inallilawka. No umaymonto kitaen dagiti tangdanko nga animal, ket makitamto nga adda nailaok a saan a labang ken turikturikan a kalding wenno saan a nangisit a karnero, maammoamto a tinakawko daytoy kenka.”

34“Ala, wen. Aramidenta ti imbagam,” kinuna ni Laban.

35Ngem iti dayta nga aldaw, innala ni Laban ti amin a kalakian a kalding a garitan ken amin a kabaian a kalding a turikturikan ken labang, kasta met dagiti amin a nangisit a karnero sana impataraken dagitoy kadagiti annakna a lallaki.

36Kalpasanna, pimmanawda nga agaama ket tallo nga aldawda a nagnagna agingga a dimmanonda iti maysa a disso nga adayo ken ni Jacob. Inaywanan ni Jacob dagiti nabati nga arban.

37Nangala ni Jacob kadagiti naganus a sanga dagiti alamo, almendras ken kastanio sana inikkat ti dadduma nga ukisda tapno kasla garitan ti langada.

38Inkabilna dagitoy a sanga iti paginuman dagiti arban tapno makitada no uminumda. Agtitinnakba ngamin dagiti animal no uminumda.

39Iti kasta, idi agmaya dagiti kalding iti sango dagiti sanga, naganakda kadagiti garitan, turikturikan ken labang nga urbon.

40Saan a pinagtitipon ni Jacob dagiti urbon a karnero ken dagiti kalding. Inlasinna ida iti maysa a lugar tapno kanayon a matannawaganda dagiti garitan ken nangisit nga animal iti arban ni Laban. Kastoy ti panangpaaduna iti arbanna ket inlasinna ida iti arban ni Laban.

41Tunggal agmaya dagiti nasalun-at nga animal, ikabil ni Jacob dagiti sanga iti sangoananda, iti pagin-inumanda, tapno agmayada iti ayan dagiti sanga.

42Ngem dina inkabil dagiti sanga iti sangoanan dagiti saan a nasalun-at nga animal. Idi agangay, nasasalun-at dagiti arban ni Jacob idinto a nakapuy dagiti animal ni Laban.

43Kastoy ti panagbalin ni Jacob a nakabakbaknang. Adu ti karnero, tagabu, kamelio ken asnona.