Jeremias 2 - Bible with DC

Ti Panagtallikud ti Israel

1Imbaga ti Apo kaniak

2nga innak ipakaammo daytoy a mensahe kadagiti amin nga agnaed idiay Jerusalem:

“Malagipko ti kinapudnom idi ubingka;

malagipko met ti ayatmo kaniak idi kakaskasarta.

Sinurotnak idiay let-ang,

iti maysa a daga nga awan pay mulana.

3Israel, nailasinka nga agpaay kaniak,

sika ti pinilik a kasayaatan a bunga.

Pinagsagabak dagiti amin a nangranggas kenka;

inyegko ti didigra kadakuada.

Daytoy ti sao ni Yahweh.”

Ti Basol dagiti Kapuonan ti Israel

4Denggenyo ti mensahe ti Apo, dakayo a kaputotan ni Jacob, dakayo a tribu ti Israel.

5Kuna ti Apo:

“Ania ti pammabasol dagiti kapuonanyo kaniak?

Apay a tinallikudandak?

Nagdaydayawda kadagiti awan serbina a didiosen,

ket nagbalinda met nga awan serbina.

6Saanda a sinaludsod,

‘Sadino ti ayan ti Apo

a nangiruar kadatayo idiay Egipto?

Sadino ti ayan

ti nangidalan kadatayo idiay let-ang,

daga a langalang ken ayan ti adu nga abut,

namaga ken napeggad a daga,

daga a saan a mapagpagnaan

ken daga nga awan agnaed?’

7Impanko ida iti nadam-eg a daga,

tapno lak-amenda dagiti bungana ken amin a naimbag a masarakan kenkuana.

Ngem idi dimtengda sadiay,

tinulawanda dayta a daga.

Pinagbalinda a makarimon

ti daga nga intedko kadakuada.

8Saan a sinaludsod dagiti papadi, ‘Sadino ti ayan ti Apo?’

Saandak nga am-ammo dagiti papadik;

binusordak dagiti agtuturay.

Iti nagan ni Baal, nagsao dagiti profeta

ket nagdaydayawda kadagiti didiosen nga awan serbina.”

Ti Pammabasol ni Yahweh kadagiti Tattaona

9Kuna ti Apo,

“Isut' gapuna nga idatagko

daytoy a pammabasol kadakayo.

Idatagko pay daytoy a pammabasol kadagiti annak dagiti annakyo.

10Agpalaudkayo a mapan idiay puro ti Kitim ket kitaenyo.

Mangibaonkay iti mapan idiay Kedar;

matakuatanyonto nga awan pay ti kastoy a napasamak.

11Addan aya nasion a nangisukat iti diosna

uray pay saan a pudno a dios?

Ngem insukatdak dagiti tattaok,

siak a Dios a nangitan-ok kadakuada;

wen, insukatdak kadagiti didiosen a saan a makatulong kadakuada.

12Iti kasta, siak, ni Yahweh,

bilinek ti langit nga agkintayeg,

pagamakek ken pagsiddaawek.

13Adda dua a basol dagiti tattaok:

binaybay-andak nga ubbog ti danum a sibibiag,

nagkalida kadagiti bubon a di mabalin a pagurnongan iti danum.

Ti Nagbanagan ti Panagtallikud ti Israel

14“Tagabu aya ti Israel? Nayanak aya a tagabu?

Apay ngarud nga an-anupen dagiti kabusorna?

15Kasda la leon a nagngernger kenkuana;

pinagbalinda a disierto ti dagana

ket dagiti ilina narbada,

naan-anay a nagpanawan,

awan agnaed kadakuada.

16Binurak tattao't Memfis ken Tafnes ti ulona.

17Israel, sika a mismo ti nangyeg iti daytoy a dusa

ta binaybay-annak, ni Yahweh a Diosmo,

idi kibkibinenka iti dalanmo.

18Ania ti maal-alam no mapanka idiay Egipto

tapno uminumka iti Karayan Nile?

Ania ti gunggonam no mapanka idiay Asiria

tapno uminumka iti Karayan Eufrates?

19Ti mismo a kinadakesmo ti pakadusdusaam;

maukomkanto gapu iti panangtallikudmo kaniak.

Maammoamto ti kinapait ken kinadakes

iti panangbaybay-am ken ni Yahweh a Diosmo,

ken saanmon a panagbuteng kaniak.

Daytoy ti saok nga Apo a Dios a Mannakabalin-amin.”

Madi ti Israel nga Agdaydayaw ken ni Yahweh

20Kuna ti Apo a Dios,

“Israel, nabayagen a linaksidmo ti panangiturayko.

Dimo kinayat ti agtulnog ken agdaydayaw kaniak.

Iti tunggal nangato a turod

ken iti sirok ti nalangto a kayo,

nagdaydayawka kadagiti didiosen,

nagiddaka a kasla balangkantis.

21Immulaka a kas iti napili nga ubas,

kas kasayaatan a bukel ti frutas.

Ngem kitaem ti nagbalinam!

Kaska la nalungsot nga ubas,

nga awan serserbina, awan mangayat.

22Uray no agdigoska iti adda apogna a danum,

ken agsabonka iti adu,

makitak latta ti mansa ti basolmo.

23Kasano a kunam a dimo tinulawan ti bagim?

Kasano a kunam a dika nagdaydayaw kadagiti didiosen a Baal?

Kitaem ti panagbasolmo idi addaka iti tanap;

kitaem ti inaramidmo.

Arigmo ti agmaya a kamelio

a taray a taray

24nga agdardaras nga agturong iti disierto.

Awan makapasardeng kenkuana.

Nalaka a biroken dagiti agtarigagay kenkuana,

ta sisasagana latta no masapulda.

25Israel, dimo ipalubos nga agsakasakaka,

wenno mamagaan ta karabukobmo.

Ngem kunam, ‘Diak mabalin ti agsubli.

Ay-ayatek dagiti didiosen, ket surotek ida.’”

Rumbeng a Madusa ti Israel

26Kuna ti Apo, “Kas iti mannanakaw a maibabain no matiliwan iti aramidna, kastanto met a maibabainkayo amin nga Israelita—dagiti ariyo ken ofisialesyo, dagiti papadi ken profetayo.

27Maibabainkayto amin—dakayo nga agkuna nga amayo ti kayo, ken inayo ti bato. Mapasamakto daytoy ta tinallikudandak ket saankayo a nagsubli kaniak. Ngem no adda rigatyo, dawatenyo nga isalakankayo.

28“Ngem sadino ti ayan dagiti didiosen nga inaramidyo a pagdaydayawanyo? No adda rigatyo, bay-anyo nga isuda ti mangisalakan kadakayo—no kabaelanda! Juda, adu ti didiosem a kas iti kaadu dagiti ilim.

29Ania aya ti reklamoyo? Apay a sinukirdak?

30Awan serserbi ti panangdusak kadakayo; diyo kayat ti paisuro kaniak. Kaskayo la narungsot a leon, a nangpapatay kadagiti profetayo.

31Dakay a tattao ti Israel, denggenyo a naimbag ti saok. Nagbalinak aya a let-ang kadakayo, kas iti nasipnget ken napeggad a daga? Saan! Apay ngarud a kunayo nga aramidenyonto ti kaykayatyo, ket pulos a dikayto agsubli kaniak?

32Malipatan aya ti balasang ti alahasna? Malipatan aya ti babai ti kawesna nga agkasar? Ngem namin-adu a nalipatandak dagiti tattaok.

33Nalaingka nga agarem! Mabalin a makasursuro kenka dagiti kadaksan a babbai.

34Namansaan dagiti pagan-anaymo iti dara dagiti napanglaw ken awan basolna, saan nga iti dara dagiti mannanakaw.

“Ngem uray kasta,

35kunam pay laeng, ‘Awan basolko; awan duadua a nagbaawen ti pungtot ti Apo kaniak.’ Ngem siak, ni Yahweh, dusaenkanto gapu ta ilibakmo a nagbasolka.

36Imbabam ta dayawmo babaen iti panagkamangmo kadagiti didiosen dagiti sabali a pagilian. Paayennakanto ti Egipto a kas iti panangpaay kenka ti Asiria.

37Panawamto ti Egipto a nakadumogka gapu iti bainmo. Siak, ni Yahweh, linaksidko dagiti tattao a pagtaltalkam; awan pagimbagan a maitedda kenka.”