Deuteronomio 13 - Bible with DC

1“No adda profeta wenno tao a mangilawlawag iti tagtagainep a mangipakita kadakayo iti maysa a milagro wenno datdatlag,

2ket awisennakayo nga agdaydayaw ken agserbi kadagiti didiosen a diyo pay nagdaydayawan. Uray no matungpal ti karina,

3diyo ipangpangag dayta a tao. Susuotennakayo la ti Apo a Diosyo tapno maammoanna no ay-ayatenyo met laeng ti Apo iti amin a pusoyo.

4Tungpalenyo ti Apo ket agbutengkayo kenkuana. Agtulnogkayo kenkuana ket salimetmetanyo dagiti bilinna; agdaydayaw ken agtalinaedkayo a napudno kenkuana.

5Ngem patayenyo ti siasinoman a profeta wenno mammadles a mangibaga a supringenyo ti Apo a nangiruar kadakayo idiay Egipto a nakatagabuanyo. Dakes ti kasta a tao ket panggepnakayo nga isina iti panagbiag nga imbilin ti Apo a panagbiagyo. Masapul a maikkat dayta a kinadakes iti sidongyo.

6“Nalabit nga umay a sililimed ti kabsatyo wenno annakyo wenno ti patpatgenyo nga asawa wenno ti nadekket a gayyemyo ket awisennakayo nga agdaydayaw kadagiti sabali a didiosen, a diyo pay nagdaydayawan kasta met dagidi kapuonanyo.

7Nalabit nga allukoyennakayo ti maysa kadakuada nga agdaydayaw kadagiti didiosen dagiti agnaed iti asidegyo wenno kadagiti didiosen dagiti agnaed iti adayo.

8Ngem dikay paallukoy kenkuana; diyo pay ketdi ipangpangag. Diyo kaasian; diyo isakit wenno salakniban.

9Papatayenyo! Dakayo ti umuna a mangbato kenkuana ket kalpasanna batoen met dagiti dadduma.

10Batoenyo agingga a matay! Pinanggepnakayo nga isina iti Apo a Diosyo a nangiruar kadakayo idiay Egipto a nakatagabuanyo.

11Madamagto dagiti amin nga Israelita ti napasamak ket agbutengdanto; awanton ti agaramid iti kasta a kinadakes iti sidongyo.

12“Inton agnaedkayon kadagiti ili nga ited ti Apo a Diosyo, mabalin a madamagyo

13nga adda sumagmamano nga awan serserbina a kailianyo a nangyaw-awan kadagiti tattao iti ilida nga agrukbab agdaydayaw kadagiti didiosen a diyo pay nagdaydayawan.

14No madamagyo daytoy, palutpotenyo a naimbag ket no pudno a naaramid ti kasta a kinadakes,

15patayenyo amin nga agnaed iti dayta nga ili ken amin a bakada. Dadaelenyo a mamimpinsan dayta nga ili.

16Ummongenyo dagiti amin a sanikua dagiti tattao nga agnaed sadiay ket ipanyo iti plasa. Kalpasanna, puoranyo ti ili ken amin a linaonna kas daton iti Apo a Diosyo. Bay-anyo nga aglangalang dayta nga ili iti agnanayon ket dinton mabangon.

17Awan ti alaenyo kadagiti naituding a madadael tapno agbaaw ti pungtot ti Apo ken kaasiannakayo ket paaduennakayto a kas inkarina kadagiti kapuonanyo.

18Kasta ti aramidenna no tungpalenyo dagiti amin a bilin nga intedko kadakayo ita nga aldaw ket aramidenyo ti pagayatanna.”