Levitico 8 - Bible with DC

Maordenan ni Aaron ken dagiti Annakna(Ex. 29:1-37)

1Kinuna ni Yahweh ken ni Moises,

2“Ipanmo ni Aaron ken dagiti annakna iti ruangan ti Tolda. Itugotmo dagiti kawes dagiti papadi, ti lana a pagkonsagrar, ti bumaro a baka a maidaton gapu iti basol, ti dua a kalakian a karnero ken ti sangabasket a tinapay nga awan lebadurana.

3Kalpasanna, ummongem ti entero a gimong sadiay.”

4Tinungpal ni Moises ti bilin ni Yahweh kenkuana ket idi naguummong ti gimong

5kinunana kadakuada, “Bilin ti Apo ti innak aramiden.”

6Inayaban ni Moises ni Aaron ken dagiti annakna iti sangoanan ket binuggoanna ida kas mayannurot iti linteg.

7Inyarruatna ken ni Aaron ti bado ken ti kagay a rutap ken ti barikes. Inyusongna kenkuana ti efod ket pinairutanna babaen iti barikes a napintas ti pannakaabelna.

8Inyarruatna ti pektoral sana inkapet ti Urim ken Tummim.

9Insaadna ti turban iti ulona ket iti parupana, inkabilna ti balitok a balangat a nasagradoan a pakakitaan ti pannakaidaton kas imbilin kenkuana ni Yahweh.

10Kalpasanna, innala ni Moises ti lana ket inkonsagrarna ti Tolda ti Dios ken ti amin nga adda iti unegna; kastoy ti panangikonsagrarna ti amin ken ni Yahweh.

11Nangala iti lana ket winarsianna iti namimpito ti altar ken dagiti alikamenna ken ti palanggana ken ti nagbatayanna tapno maikonsagrarda ken ni Yahweh.

12Inordenanna ni Aaron babaen iti panangibukbokna iti lana iti ulona.

13Kalpasanna, pinagpasangona dagiti annak ni Aaron; binadoanna ida, inkabilna ti barikes ti tunggal maysa ket inkapetna ti pannakakallugongda, kas imbilin ni Yahweh.

14Innala ni Moises ti bumaro a baka a maidaton gapu iti basol. Impatay ni Aaron ken dagiti annakna ti imada iti ulo ti animal.

15Pinarti ni Moises ti animal sa nangala iti dara ket babaen iti ramayna, pinulagidanna dagiti sinan-sara ti altar tapno maidaton ti altar. Imbuyatna iti puon ti altar ti natda a dara. Kastoy ti pannakaidaton iti altar ken ti pannakadalusna iti imatang ti linteg.

16Inikkat ni Moises ti amin a taba dagiti lalaem, ti kasayaatan a paset ti dalem ken dagiti bekkel ken dagiti tabada sana pinuoran dagitoy iti rabaw ti altar.

17Kas imbilin ni Yahweh, pinuoranna iti ruar ti kampo dagiti dadduma a paset ti baka agraman ti lalat, lasag ken bagbagis.

18Innala ni Moises ti kalakian a karnero a maidaton a mapuoran ket impatay ni Aaron ken dagiti annakna ti imada iti ulo ti animal.

19Pinatayna ti animal sana imbuyat ti darana iti uppat a sikigan ti altar.

20-21Rinangrangkayna ti karnero, binuggoanna dagiti lalaem ken dagiti kammaudi a saka; pinuoranna ti ulo, ti taba ken dagiti dadduma a pasetna iti altar, kas imbilin ni Yahweh. Nabanglo dayta nga ayamuom ken ni Yahweh.

22Innala ni Moises ti maikadua a kalakian a karnero a nairanta iti pannakaorden dagiti papadi. Impatay ni Aaron ken dagiti annakna ti imada iti ulo ti animal.

23Pinarti ni Moises ti karnero ket nangala iti dara nga impulagidna iti kannawan a piditpidit ni Aaron, kadagiti akinkannawan a tangan ti ima ken sakana.

24Pinagpasangona dagiti annak ni Aaron, ket impulagidna ti dara iti kannawan a piditpiditda, kadagiti tangan ti kannawan nga ima ken sakada. Imbuyatna ti natda a dara iti aglawlaw ti altar.

25Innalana ti taba, ti nataba nga ipus, amin a taba a kimpet kadagiti lalaem, ti kasayaatan a paset ti dalem, dagiti bekkel agraman ti tabada, ken ti kannawan a kammaudi a saka.

26Kalpasanna, nangala iti maysa a tinapay iti basket a nakaikabilan ti tinapay nga awan lebadurana a naidaton iti Apo, maysa a tinapay a nagamay iti lana, ken maysa a naingpis a kankanen. Imparabawna dagitoy iti taba ken ti kannawan a kammaudi a saka.

27Inkabilna amin dagitoy a taraon iti ima ni Aaron ken dagiti annakna ket indatagda a kas naisangsangayan a sagut iti Apo.

28Innalana met laeng dagitoy a makan kadakuada ket pinuoranna iti altar, iti rabaw ti daton a mapuoran, kas daton ti pannakaorden. Nabanglo daytoy nga ayamuom ken ni Yahweh.

29Innala ni Moises ti barukong ti animal ket indatagna a kas naisangsangayan a sagut ken ni Yahweh. Daytoy ti bingay ni Moises iti karnero a naidaton iti pannakaorden. Natungpal ti amin nga imbilin ni Yahweh.

30Nangala ni Moises iti lana a pagkonsagrar ken iti dara nga adda iti altar ket winarsianna ni Aaron ken dagiti annakna ken dagiti pagan-anayda. Kastoy ti panangikonsagrarna kadakuada ken kadagiti arruatenda ken ni Yahweh.

31Kinuna ni Moises ken ni Aaron ken dagiti annakna, “Ipanyo ti karne iti ruangan ti Tolda ti Dios; angrenyo, ket sadiay, ipanganyo iti tinapay nga adda iti basket a nakaikabilan dagiti daton a nausar iti pannakaorden, kas imbilin ti Apo.

32Puoranyo ti aniaman a matda a tinapay wenno karne.

33Dikay pumanaw iti ruangan ti Tolda no di malpas ti seremonia ti pannakaordenyo; agtalinaedkayo sadiay iti las-ud ti pito nga aldaw.

34Imbilin ti Apo nga aramidentayo ti inaramidtayo ita nga aldaw tapno maikkat dagiti basolyo.

35Agyankayo iti ruangan ti Tolda ti Dios iti aldaw ken rabii iti las-ud ti pito nga aldaw, ta no saanyo nga aramiden, mataykayo. Daytoy ti imbilin kaniak ti Apo.”

36Ngarud, inaramid ni Aaron ken dagiti annakna ti imbilin ni Yahweh ken ni Moises.