Dagiti Salmo 143 - Bible with DC

Kararag a Pagdawat iti Tulong

1Denggem, O Apo, ti kararagko;

ipangagmo toy asugko.

Nalinteg ken mapagtalkanka;

patgam ngarud ti dawatko kenka.

2DinakRom. 3:20; Gal. 2:16. kadi ukomen nga adipenmo;

awan ti saan a nagbasol iti imatangmo.

3Sinarsaraknak ti kabusorko,

ket namimpinsan a pinarmeknak.

Iti nasipnget a pagbaludan, impisoknak,

ket awan dumak kadagiti natay idi un-unana.

4Isut' gapuna a ti anusko awanen,

ket ti namnamak napukawen.

5Malagipko dagiti naglabas nga aldaw,

ut-utobek dagiti amin nga inaramidmo,

ket dagiti amin a gapuanam adda iti panunotko.

6Ingatok dagiti imak nga agkararag kenka

kasla natikag a daga toy kararuak a mawaw kenka.

7O Apo, inka kadin ipangag ti dawatko;

ti amin a namnamak napukawko.

Dinak kadi ilemmengan

amangan no maipadaak kadagiti bumaba

iti lubong dagiti natay.

8Agtalekak kenka; binigat nga ipalagipmo kaniak

ti di agbalbaliw nga ayatmo.

Dumanon kenka dagiti kararagko;

isurom kadi kaniak ti rumbeng a dalanko.

9Kenka, O Apo, kumamangak,

pangngaasim kadi ta salaknibannak;

ispalennak iti ima dagiti kabusorko.

10Sika ti Diosko;

isuronak a mangaramid iti pagayatam.

Naimbagka koma kaniak,

ket iturongnak iti natalged a dalan.

11Kas inkarim, O Apo, isalakannak;

gapu iti kinaimbagmo,

ispalennak kadagiti pakariribukak.

12Gapu ta ay-ayatennak, patayem dagiti kabusorko;

pukawem dagiti mangparparigat kaniak ta siak ti adipenmo.