Uk-ukom 14 - Bible with DC

Ni Samson ken ti Babai a Taga-Timna

1Iti maysa nga aldaw, simmalog ni Samson idiay Timna a nakakitaanna iti maysa a Filistia.

2Nagawid ket kinunana kadagiti nagannak kenkuana, “Adda nasirpatko a Filistia idiay Timna a magustoak unay. Kayatko nga asawaen, isu nga inkay koma kasao.”

3Ngem kinuna dagiti nagannak kenkuana, “Apay a mangasawaka iti puli dagiti saan a kugit a Filisteo? Awan aya ti mapilim kadagiti kabagiantayo wenno maysa kadagiti kadaraantayo?”

Ngem kinuna ni Samson ken ni amana, “Isu ti kayatko nga alaenyo nga asawaek.”

4Saan nga ammo dagiti nagannak kenkuana a ni Yahweh ti mangiturturong ken ni Samson iti daytoy nga aramidna. Agbirbirok ngamin ni Yahweh iti gundawayna a makigubat kadagiti Filisteo. Iti dayta a panawen, dagiti Filisteo ti mangituray iti Israel.

5Iti kasta, napan ni Samson idiay Timna a kinakuyogna dagiti nagannak kenkuana. Idi magmagnada kadagiti kaubasan sadiay, nangngegna ti agngerngernger a bumaro a leon.

6Pagammoan, bimmaba ti Espiritu ni Yahweh ken ni Samson. Pimmigsa ni Samson, ket babaen kadagiti imana, rinangrangkayna ti leon a kas iti panangrangkayna iti maysa nga urbon a kalding. Ngem dina imbaga kadagiti nagannak kenkuana ti inaramidna.

7Napanna ngarud kinasarita ti babai, ket nagustoanna.

8Kalpasan ti sumagmamano nga aldaw, nagsubli ni Samson a mangasawa kenkuana. Idi magmagna, simmiasi iti dalan tapno mapanna kitaen ti leon a pinatayna. Nasdaaw a nakakita iti adu nga uyokan ken diro iti uneg ti bangkay.

9Inakuyna ti diro kadagiti imana ket nangan iti daytoy bayat ti pannagnana. Nagtarus iti ayan dagiti nagannak kenkuana ket inikkanna ida. Nanganda ngem dina imbaga nga innalana ti diro iti bangkay ti leon.

10Napan ni amana iti balay ti babai ket nagpadaya ni Samson sadiay. Daytoy ti ugali dagiti babbaro idi.

11Idi makita dagiti Filisteo ni Samson, nangipanda iti 30 a lallaki a mangadkadua kenkuana.

12Kinuna ni Samson kadakuada, “Burburtiaankayo. No mapugtoanyo ti kaipapananna sakbay a malpas ti padaya, ikkankayo iti 30 a kawes a linen ken 30 a pagan-anay a pagsukatan.

13Ngem no diyo mapugtoan ti kaipapananna sakbay a malpas ti boda, dakayo ti mangted iti 30 a kawes a linen ken 30 a pagan-anay a pagsukatan.”

“Ala ngarud,” insungbatda, “ibagamon ta denggenmi.”

14Kinunana,

“Iti mangmangan, rimmuar ti makan;

iti napigsa, rimmuar ti nasam-it.”

Kalpasan ti tallo nga aldaw, dida pay la napugtoan ti kayat a sawen ti burburtia.

15Iti maikapat nga aldaw, kinunada iti asawa ni Samson, “Sikapam ni asawam tapno ibagana kenka ti kaipapanan ti burburtiana. No madika, puorandaka ken ti balay ni amam. Inawisdakami kadi tapno pagpanglawendakami?”

16Iti kasta, napan kenkuana ti asawana. Agsangsangit a nagkuna, “Dinak gayam ay-ayaten! Kagurguranak! Nagburburtiaka kadagiti gagayyemko ket dimo pay imbagbaga kaniak ti kaipapananna!”

Kinuna ni Samson kenkuana, “No diak pay imbaga kadagiti dadakkelko ti kaipapananna, apay ketdin nga ibagak kenka?”

17Daytoy ti nagsangsangitan ti babai bayat ti boda. Ngem iti maikapito nga aldaw, imbaga ni Samson agsipud ta pinilit ni asawana nga ibagana. Ket imbaga ti asawana daytoy kadagiti kailianna.

18Iti maikapito nga aldaw sakbay ti ipapan ni Samson iti kuarto, kinuna kenkuana dagiti lallaki ti siudad,

“Ania pay ti nasamsam-it ngem ti diro?

Ania pay ti napigpigsa ngem ti leon?”

Simmungbat ni Samson:

“No diyo pinagarado ti bakak,

diyo koma naammoan ti burburtiak.”

19Pagammoan, bimmaba ti Espiritu ni Yahweh ken ni Samson ket pimmigsa. Simmalog a napan idiay Askelon. Sadiay, 30 a lallaki ti pinapatayna; innalana dagiti pagan-anayda sana inted kadagiti nangipatarus iti burburtiana. Gapu iti pungtotna iti inaramid ni asawana, nagawid iti balay ni amana.

20Naited ti asawa ni Samson iti maysa kadagiti lallaki a bayabayna iti panagkasarda.