Ezra 7 - Bible with DC

Mapan ni Ezra idiay Jerusalem

1Naglabas ti adu a tawen. Ni Artaxerxes ti emperador ti Persia idi dimteng idiay Jerusalem ti maysa a tao nga agnagan Ezra. Nagtaud ni Ezra iti kapuonan ni Aaron a nangato a padi. Kastoy ti panagsasaruno dagiti kapuonanna: ni Ezra anak ni Seraias nga anak ni Azarias nga anak ni Hilkias;

2ni Hilkias anak ni Sallum nga anak ni Zadok nga anak ni Ahitub;

3ni Ahitub anak ni Amarias nga anak ni Azarias nga anak ni Merayot;

4ni Merayot anak ni Zerahias nga anak ni Uzzi nga anak ni Bukki;

5ni Bukki anak ni Abisua nga anak ni Finees nga anak ni Eleazar; ni Eleazar anak ni Aaron.

6-7Masirib ni Ezra ket naan-anay ti ammona maipapan iti linteg nga inted ni Yahweh a Dios ti Israel ken ni Moises. Gapu ta binendisionan ti Dios, inted kenkuana ti emperador ti amin a dawatenna. Iti maikapito a tawen a panagturay ni Artaxerxes, napan ni Ezra idiay Jerusalem. Kinaduana ti maysa a bunggoy dagiti Israelita a buklen dagiti papadi, Levita, kantores iti templo, guardia ti templo ken dagiti trabahador.

8-9Pimmanawda idiay Babilonia iti umuna nga aldaw ti umuna a bulan, ket kaasi ti Dios, dimtengda idiay Jerusalem iti umuna nga aldaw ti maikalima a bulan.

10Bayat ti panagbiagna, inggaed ni Ezra nga inadal ken tinungpal dagiti linteg ken alagaden nga ipaannurot ni Yahweh kadagiti Israelita ket insurona dagitoy kadakuada.

Ti Dokumento a Naited ken ni Ezra

11Daytoy ti dokumento nga inted ni Emperador Artaxerxes ken ni Ezra, ti padi a masirib ken naan-anay ti ammona maipapan kadagiti linteg ken bilin nga inted ti Apo iti Israel:

12“Naggapu daytoy ken ni Emperador Artaxerxes ket agpaay ken ni Ezra a padi ken masirib iti linteg ti Dios ti langit.

13Ibilinko a mapalubosan amin nga Israelita iti pagariak, papadi man wenno Levita, a mayat a kumuyog kenka a mapan idiay Jerusalem.

14Siak nga emperador, agraman dagiti pito a mammagbaga kaniak, ibaonka a mangkita iti agdama a kasasaad ti Jerusalem ken ti Juda. Kitaem no maan-annurot met laeng ti linteg nga intalek kenka ti Diosmo.

15Masapul nga itugotmo dagiti balitok ken pirak a kayatmi nga ited a kas sagut iti Dios ti Israel a ti Templona adda idiay Jerusalem. Siak ken dagiti mammagbaga kaniak, itedmi daytoy a sagut.

16Alaem met dagiti amin a pirak ken balitok a maurnongmo iti entero a probinsia, agraman dagiti sagut nga ited dagiti Israelita ken dagiti papadida nga agpaay iti Templo ti Diosda idiay Jerusalem.

17“Gastoem ti kuarta iti rumbeng a pakausaranna. Gumatangkanto kadagiti toro a baka, kalakian a karnero, urbon ti karnero, daton a makan ken arak a mainum ket idatonmonto ida iti altar iti Templo idiay Jerusalem.

18Mabalinyo a gastoen iti aniaman a kayatyo kadagiti kakaduam dagiti amin a pirak ken balitok a masobrayo, kas mayannurot iti pagayatan ti Diosyo.

19Masapul nga idatagmo iti Dios idiay Jerusalem dagiti alikamen a naited kenka nga agserbi iti panagdaydayaw iti Templo.

20Alaemto iti tesoreria ti pagarian ti kuarta a masapulmo a paggatang iti dadduma pay a masapul ti Templo.

21“Kadakayo amin a tesorero iti probinsia iti Laud-ti-Eufrates, ibilinko nga itedyo a dagus ti aniaman a dawaten kadakayo ni Ezra a padi ken masirib iti linteg ti Dios ti langit.

22Mangtedkay iti saan a nasursurok ngem iti tallo a tonelada a pirak, 26 a kaban a trigo, 550 a galon nga arak, 550 a galon a lana ti olibo, ken amin nga asin a masapulna.

23Ikagumaanyo nga ited amin a sapulen ti Dios ti langit nga agserbi iti Templona. Aramidenyo amin a kabaelanyo tapno saannak a kapungtot ti Dios kasta met dagiti ari a sumaruno kaniak.

24Maiparit nga agsingirkay iti buis kadagiti papadi, Levita, musiko, guardia, agtartrabaho, wenno siasinoman nga agserserbi iti daytoy a Templo.

25“Sika, Ezra, yantangay ta naparaburanka iti sirib, mangdutokka kadagiti administradores ken ukom a mangituray kadagiti amin a tattao nga agnanaed iti Laud-ti-Eufrates nga agbibiag a mayallubog iti linteg ti Diosyo. Masapul nga isurom dayta a linteg kadagiti saan pay a makaammo.

26Madusa a dagus ti siasinoman a saan nga agtungpal kadagiti linteg ti Diosyo wenno kadagiti linteg ti pagarian; mapapatay wenno mapagtalaw wenno masamsam dagiti sanikuana wenno maibalud.”

Idaydayaw ni Ezra ti Dios

27Kinuna ni Ezra, “Madaydayaw ti Apo a Dios dagiti kapuonantayo! Tinignayna ti ari tapno siaayat a mangdayaw iti Templo ti Apo idiay Jerusalem iti kastoy a wagas.

28Kaasi ni Apo Dios, nagun-odko ti parabur ti ari, dagiti mammagbaga kenkuana ken dagiti amin a mamaingel nga ofisialesna. Inikkannak ti Apo a Diosko iti kired ti nakem ket adu a papangulo dagiti tribu ti Israel ti naallukoyko a kumuyog kaniak nga agsubli.”