Uk-ukom 7 - Bible with DC

Parmeken ni Gideon dagiti Midianita

1Nasapa a bimmangon ni Gideon ken dagiti amin a tattaona ket nagkampoda iti asideg ti Ubbog ti Harod. Iti amiananda, nagkampo met dagiti Midianita iti tanap iti abay ti Turod ti More.

2Kinuna ni Yahweh ken ni Gideon, “Adu unay dagiti tattaom. Bassit laeng ti masapulko a pangparmek kadagiti Midianita. Ipagarupdanto pay ketdi a nangabakda gapu iti pigsada, ket didanto bigbigen a timmulongak kadakuada.

3Ipakaammom ket agawid.”

Iti kasta, nagawid ti 22,000 ngem nagbati ti 10,000.

4Kinuna ni Yahweh ken ni Gideon, “Aduda pay laeng. Isalogmo ida iti danum ket piliekto ti kayatko. No kunak a kumuyog daytoy a tao kenka, alaem. Ket no kunak a saanmo nga alaen, saanmo nga alaen.”

5Impan ngarud ni Gideon ida iti danum ket kinuna ni Yahweh kenkuana, “Ilasinmo dagiti kasla agab-ab-ab nga aso, kasta met dagiti agparintumeng nga uminum.”

6Tallogasut a lallaki ti imminum iti danum kadagiti dakulapda. Nagparintumeng nga imminum dagiti dadduma.

7Kinuna ti Apo ken ni Gideon, “Dagitoy 300 a lallaki ti aramatek a mangispal kadakayo, ket parmekemto dagiti Midianita. Pagawidemon dagiti dadduma.”

8Malaksid dagiti 300, pinagawidna amin dagiti Israelita ngem pinaibatina dagiti taraon ken tangguyobda. Adda ti kampo dagiti Midianita iti tanap iti babaenda.

9Iti dayta a rabii, kinuna ni Yahweh ken ni Gideon, “Bumangonka ket rautem ti kampo dagiti Midianita. Pagballigienka.

10Ngem no mabutengka a mangraut kadakuada, sumalogkayo a dua ken ni Pura nga adipenmo a mapan iti kampoda.

11Mangngegmonto dagiti sasawenda ket mapaturedkanto a mangraut kadakuada.”

Iti kasta, napan da Gideon ken Pura iti asideg ti kampo dagiti kabusorda.

12Kasla dudon a naiwaras dagiti Midianita, dagiti Amalekita ken dagiti tattao dagiti tribu a taga-daya. Adu ti kamelioda a kas iti kaadu ti darat ti baybay.

13Idi dumteng ni Gideon sadiay, nangngegna ti maysa a lalaki a mangisarsarita iti tagtagainepna iti gayyemna. “Nagtagtagainepak,” kinunana. “Adda kampay idi maysa a tinapay a sebada a nagtulidtulid iti kampotayo. Nadalapusna ti maysa a tolda. Natuang ti tolda ket nayaplag iti daga.”

14Kinuna ti gayyemna, “Awan sabali a kayatna a sawen dayta, no di ti kampilan ni Gideon nga Israelita nga anak ni Joas. Timmulong ti Dios kenkuana a mangparmek kadagiti Midianita ken iti entero a buyottayo!”

15Idi mangngeg ni Gideon ti kayat a sawen ti tagtagainep, nagparintumeng ket nagdaydayaw iti Yahweh. Kalpasanna, nagsubli iti kampo dagiti Israelita ket kinunana, “Intayon! Tulongannatayo ti Apo a mangparmek kadagiti Midianita.”

16Biningayna iti tallo a bunggoy dagiti 300 a tattaona. Inikkanna ti tunggal maysa iti tangguyob ken karamba nga adda pagsilawan iti unegna.

17Imbagana kadakuada, “Siputandak, ket aramidenyo ti aramidek apaman a makaasidegak iti kampo.

18No agtangguyobkami kadagiti kakaduak, agtangguyobkayo met iti amin a lawlaw ti kampo sayo ipukkaw, ‘Gapu iti Apo ken ni Gideon!’”

19Dimteng ni Gideon ken dagiti 100 a tattaona iti asideg ti kampo sakbay ti tengnga ti rabii, apaman a nagsukat ti guardia. Nagtangguyobda sada binurak dagiti karamba nga iggemda.

20Nagtangguyob dagiti tallo a grupo ket binurakda dagiti karambada. Iniggamanda dagiti pagsilawanda iti makannigidda ken dagiti tangguyob iti makannawanda, sada impukkaw, “Kampilan para iti Apo ken ni Gideon!”

21Awan immalis iti lugar a nagtakderanna iti lawlaw ti kampo. Nariribuk ti entero a kampo. Nagririaw ken nagtataray a pimmanaw dagiti Midianita.

22Idi agtangtangguyob dagiti 300 a tattao, pinagraranget ni Yahweh dagiti Midianita iti kampo. Nagtarayda nga agpa-Sere ra agingga iti Bet-sitta ken iti ili ti Abel-mehola iti asideg ti Tabat.

23Naayaban dagiti lallaki kadagiti tribu ti Neftali, Aser ken dagiti dua a paset ti Manases ket kinamatda dagiti Midianita.

24Nangibaon ni Gideon kadagiti mapan iti amin a katurturodan ti Efraim ket kinunada kadagiti tattao, “Sumalogkayo ta umayyo gubaten dagiti Midianita. Guardiaanyo dagiti pagballasiwan ti Jordan ken dagiti waig agingga idiay Bet-bara tapno saan a makalibas dagiti Midianita.”

Naayaban dagiti tattao ti Efraim ket ginuardiaanda ti Karayan Jordan ken amin a waig agingga idiay Bet-bara.

25Tiniliwda dagiti dua a pangulo iti Midian, da Oreb ken Zeeb. Pinatayda ni Oreb iti ayan ti Bato ni Oreb. Pinatayda met ni Zeeb iti Pagpespesan iti Ubas ni Zeeb. Sinunsonda dagiti Midianita. Impanda ken ni Gideon nga adda iti daya ti Jordan dagiti ulo da Oreb ken Zeeb.