Isaias 43 - Bible with DC

Ispalen ti Dios dagiti Tattaona

1Israel, kuna ti Apo a

namarsua kenka,

“Saanka nga agbuteng—salaknibanka.

Inawagak ti naganmo—kukuaka.

2No aglasatka kadagiti adalem a karayan,

addaakto kenka;

dinakanto parmeken dagiti pakariribukam.

No magnaka iti apuy, dikanto mauram;

dikanto maan-ano kadagiti nakaro a pakasuotam.

3Ta siak ni Yahweh a Diosmo,

ti Nasantoan a Dios ti Israel a mangisalakan kenka.

Yawatkonto ti Egipto tapno mawayawayaanka;

yawatkonto ti Etiopia ken ti Seba.

4Yawatkonto dagiti nasion

tapno maisalakan ti biagmo.

Napategka ngamin kaniak

gapu ta itan-okka ken ay-ayatenka.

5Dika agbuteng ta addaak kenka!

“Pagawidekto dagiti tattaom

manipud iti kaadayoan a paset ti daya ken laud.

6Bilinekto ti amianan a palubosanna ida,

ibagakto iti abagatan a dina igawid ida.

Palubosanyo nga agsubli dagiti tattaok

manipud kadagiti adayo a daga,

manipud iti amin a suli ti lubong agawidda.

7Isuda dagiti tattaok;

pinarsuak ida tapno idaydayawdak.”

Ti Israel ti Mangsaksi ken ni Yahweh

8Kuna ti Dios,

“Idatagyo dagiti tattaok iti pangukoman.

Adda matada ngem bulsekda;

adda lapayagda ngem tulengda!

9Ayabanyo dagiti pagilian iti pangukoman.

Siasino kadagiti didiosenda ti makaipadto

iti mapasamak iti masakbayan?

Siasino kadakuada ti nangipakpakauna

kadagiti mapaspasamak iti agdama?

Itugot man dagitoy a didiosen dagiti saksida

tapno paneknekanda nga adda kalinteganda,

tapno saksianda ti kinapudno ti saoda.

10“Dakayo nga Israelita, dakayo ti saksik;

pinilikayo a nasion nga agserbi kaniak

tapno maam-ammodak ken mamatikayo,

ket maawatanyo a sisiak ti Dios.

Malaksid kaniak, awan ti sabali a Dios;

awan ti immun-una ngem siak,

ket awanto met ti sumaruno.

11“Siak ni Yahweh,

siak la ti makaisalakan kadakayo.

12Impakpakaunak idi ti mapasamak,

ket kalpasanna, immayak timmulong kadakayo.

Awan ti didiosen a nakaaramid iti daytoy;

dakayo ti mangsaksi kaniak.

13Siak ti Dios, ket agnanayonak a Dios.

Awan ti makaliklik iti pannakabalinko,

awan ti makabalbaliw iti aramidko.”

Agtalaw dagiti Israelita idiay Babilonia

14Kastoy ti kuna ti Apo, ti nasantoan a Dios ti Israel, a mangisalakan kadakayo:

“Tapno maisalakankayo, mangibaonakto

iti armada a mangraut iti Babilonia.

Rebbaekto dagiti ruangan ti siudad,

ket agbalinto a sangsangit ti dir-i dagiti tattaona.

15Siak ni Yahweh, ti Nasantoan a Diosyo.

Pinarsuaka, Israel, ket siak ti ariyo.”

16Idi un-unana, nangaramid ti Apo iti dalan iti baybay,

maysa a pagnaan iti nadawel a danum.

17Inturongna ti nabileg nga armada iti pakadadaelanna,

armada a buklen dagiti lugan a pakigubat

ken dagiti nagkabalio.

Limnedda ket didan limmung-aw;

naiddepda a kasla silaw ti pabelo!

18Ngem kuna ti Apo:

“Lipatenyo dagiti napalabas a pasamak;

diyo panunotenen dagiti naaramid idi un-unana.

19Kitaenyo ti baro a banag nga aramidek.

Mangrugin nga agparang—makitayo itan!

Mangaramidak iti dalan iti let-ang;

sadiay, ikkankayto kadagiti ubbog ti danum.

20Uray dagiti atap nga animal itan-okdakto;

idaydayawdakto dagiti abestrus ken lobo

inton pagayusek dagiti karayan iti let-ang

tapno adda inumen dagiti pinilik a tattao.

21Isuda dagiti tattao a pinarsuak nga agpaay kaniak—

ket ikankantadanto ti pakaidaydayawak!”

Ti Basol ti Israel

22Kuna ti Apo,

“Ngem saan a siak ti nagdaydayawam;

naumaka kaniak, sika, Israel.

23Saanka a nangidatag iti karnero

a mapuoran a kas daton kaniak.

Saan a siak ti pinadayawam

kadagiti sakrifisio nga indatonmo.

Dika pinadagsenan iti panagdawatko iti sagutmo;

dika rininggor iti panagkiddawko

iti mapuoran nga insenso.

24Dinak inggatangan iti insenso,

wenno pinennek iti taba dagiti animalmo.

Pinadagsenannak ketdi kadagiti basolmo;

naumaak kadagiti dakes nga inar-aramidmo.

25“Ngem siak ti Dios a mangikkat kadagiti basolmo,

ket aramidek daytoy gapu iti kinadiosko.

Diakton isingir dagiti basbasolmo.

26Inta iti pangukoman, idatagmo dagiti pammabasolmo;

ilawlawagmo ti rasonmo a mangipaneknek nga adda kalintegam!

27Nagbasol daydi immuna a kapuonam;

nagbasol kaniak dagidi pangulom.

28Tinulawan dagiti agtuturaymo ti santuario.

Daytoy ti gapuna nga inyegko

ti pannakadadael iti Israel;

impalubosko a maibabain dagiti tattaok.”