Dagiti Salmo 17 - Bible with DC

Kararag ti Nalinteg a Tao

1Denggem, O Apo, ti asugko a mangtunton iti kalintegak;

ti panagdawatko iti tulong imdengannak.

Ipangagmo daytoy napudno a kararag.

2Ipaulogmo ti pangngeddengmo a manganamong kaniak

agsipud ta ammom ti naimbag.

3-4Naan-anay nga ammom ti pusok;

umayka kaniak iti rabii.

Naan-anay ti panangsuotmo kaniak,

ket awan nasarakam a dakes a tarigagayko.

Pudno ti saok, saan a kas kadagiti dadduma;

tinungpalko dagiti bilinmo

ken diak sinurot ti dalan dagiti naranggas.

5Kankanayon a sinurotko ti wagasmo,

ket pulos a diak pinanawan ti dalanmo.

6Agkararagak kenka, O Dios, agsipud ta sungbatannak;

taliawennak ngarud ket dagiti saok inka ipangag.

7Ipakitam ti nakaskasdaaw nga ayatmo ket ispalennak;

iti sibaymo, kadagiti kabusor awan pakaan-anoak.

8Salaknibannak, kas panangsalluadmo iti ay-ayatem;

salukobannak kadagiti bukodmo a payak

9iti panangdarup dagiti managdakdakes a kabusor a nanglikmut kaniak.

10Awan asida ket natangsit ti panagsaoda.

11Addada iti sadinoman a pagturongak;

agur-urayda iti gundaway a mangipababa kaniak.

12Kasda la leon a mangur-uray kaniak

tapno rangrangkayendak.

13Umayka, O Apo, ket parmekem dagiti kabusorko!

Isalakannak kadagiti managdakdakes babaen iti kampilanmo.

14Isalakannak kadagiti addaan iti amin a kasapulan ditoy a biag.

Ipataymo kadakuada dagiti panagsagaba nga insaganam kadakuada,

ket adda pay koma agpaay nga ibaklay dagiti appokoda.

15Ngem makitakanto gapu ta awan dakes nga aramidko;

ket gapu iti kaaddam, no makariingak mapnoakto iti rag-o.