1Intuloy
8“Bendisionanto ti Apo a Diosyo ti trabahoyo ket punnoennanto iti trigo dagiti kamaligyo. Wen, bendisionannakayto iti daga nga itedna kadakayo.
9“No agtulnogkayo iti Apo a Diosyo ket tungpalenyo ti amin a bilinna, pagbalinennakayto a tattaona a kas inkarina.
10Iti kasta, mabigbigto dagiti amin a tattao ditoy daga a dakayo ti pinili ti Apo a Diosyo ket agbutengdanto kadakayo.
11Paraburannakayto ti Apo iti adu nga annak, adu nga animal ken nawadwad nga apit iti daga nga inkarina kadagidi kapuonanyo nga ited kadakayo.
12Luktanto ti Apo ti nabaknang a pagiduldulinanna iti tangatang: Yegnanto ti tudo iti umisu a panawen ket bendisionannanto ti amin nga aramidyo. Iti kasta, pulos a dikayto makautang no di pay ket dakayo ti agpautang.
13Pagbalinennakayto ti Apo a Diosyo a pangulo kadagiti pagilian; saankayto a paspasurot. Narang-aykayto latta ket agballigikayto iti amin nga aramidyo no la ket agtulnogkayo a sipupudno kadagiti bilinna nga ipakaammok kadakayo ita nga aldaw.
14Ngem masapul a diyo sukiren ti aniaman a bilin ket dikay agdaydayaw ken agserbi kadagiti didiosen.”
Ti Dusa ti Agsukir(Lev. 26:14-46)15“Ngem no dikay agtulnog iti Apo a Diosyo ket diyo tungpalen a sipupudno dagiti amin a bilin ken lintegna nga itedko kadakayo ita nga aldaw, agdissuorto kadakayo amin dagitoy a lunod:
16“Ilunodto ti Apo dagiti il-ili ken taltalonyo.
17“Ilunodnanto dagiti mulmulayo ken ti isaganayo a taraon.
18“Ilunodnakayto ti Apo ket bassitto laeng ti iparaburna nga annakyo; nakirangto ti apityo ken bassitto ti baka ken karneroyo.
19“Ilunodto ti Apo ti amin nga aramidyo.
20“No agaramidkayo iti dakes ket tallikudanyo ti Apo a Diosyo, yegnanto kadakayo ti didigra, riribuk ken parikut iti amin nga aramidyo agingga a mapukawkayo a mamimpinsan.
21Agsasarunonto a sakit ti sagabaenyo agingga nga awan matda kadakayo iti daga nga inkay sakupen.
22Ipalak-amto kadakayo ti Apo ti makaalis a sakit. Aggurigorkayto ket lumtegto dagiti bagbagiyo. Yegnanto ti tikag ken makalanet nga angin a mangdadael kadagiti mulmulayo. Agtalinaedto kadakayo dagitoy a didigra agingga a mataykayo.
23Awanto ti tudo, ket tumangkento a kas iti landok ti dagayo.
24Yegnanto ketdi ti napigsa nga angin a napakuyogan iti tapok ken darat agingga a madadaelkayo.
25“Ipalubosto ti Apo a parmekendakayo dagiti kabusoryo. Maymaysanto ti paggapuanyo a manggubat kadakuada ngem agtataraykayto a mawarawara ket diyonto ammo ti turturongenyo. Agbutengto dagiti amin a tattao ditoy daga a makakita iti mapasamak kadakayo.
26No mataykayo, kanento dagiti tumatayab ken dagiti atap nga ayup dagiti bangkayyo ket awanto ti mangbugaw kadakuada.
27Pagbusaliennakayto ti Apo a kas iti impalak-amna kadagiti taga-Egipto. Malapunoskayto iti gaddil. Agkuradkayto ket agkudkodkayo ngem awanto ti agasna.
28Pagmauyongennakayto ti Apo. Pagbulsekennakayto ket diyonto ammo ti turturongenyo.
29Kaskayto la bulsek nga agar-arikap a dina makita ti papananna, uray tengnga ti aldaw. Dikayto agballigi iti aniaman nga aramidyo. Kanayonkayto a maidadanes ken matakawan ket awanto ti tumulong kadakayo.
30“Makitulagkayto iti babai nga asawaenyo ngem sabalinto ti mangasawa kenkuana. Agbangonkayto iti balayyo ngem diyonto pagnaedan. Agmulakayto iti ubas ngem diyonto maramanan ti bungana.
31Mapartinto ti bakayo iti imatangyo, ngem diyonto maramanan. Kitkitaenyonto nga alaenda dagiti asnoyo ngem didanton maisubli. Maitedto dagiti karneroyo kadagiti kabusoryo ket awanto ti umay tumulong kadakayo.
32Makitayonto ti pannakaited dagiti annakyo tapno agbalinda a tagabu dagiti ganggannaet. Inaldawto a mabannog dagiti matayo a mangpaspasungad kadagiti annakyo ngem didanton agsubli.
33Alaento ti ganggannaet a nasion dagiti amin nga apit a nagbambannoganyo ngem awanto ti maipaay kadakayo no di pasig a pannakaidadanes ken pannakaparparigat.
34Agsagabakayto agingga nga agmauyongkayo.
35Malapunosto dagiti sakayo iti naut-ot ken saan a maagasan a letteg; agbusalinto ti entero a bagiyo.
36“Ipannakayto ti Apo agraman ti ariyo iti ganggannaet a daga a diyo pay nagnaedan ken uray dagidi kapuonanyo. Agdaydayawkayto sadiay kadagiti didiosen a naaramid iti kayo wenno bato.
37Gapu iti mapasamak kadakayo, masdaawto dagiti tattao kadagiti pagilian a pakaiwarasanyo; dakayonto ti kanayon a sarsaritaen, rabrabaken ken katkatawaanda.
38“Uray no adunto a bukel ti itukityo, bassitto ti maapityo ta ibusento dagiti dudon.
39Agmulakayto kadagiti ubas ket taripatoenyonto ida, ngem dikayto makaramanen iti bungada wenno makainum iti arak ti ubas gapu ta iggesento dagiti mula.
40Agtubonto ti olibo iti amin a paset ti dagayo ngem awanto ti aramidenyo a lana ta agregregto dagiti bungada.
41Addanto annakyo, ngem mapukawyonto ida ta maitalawdanto a kas balud iti gubat.
42Ibusento ti igges ti amin a kayo ken mulayo.
43“Rumang-ayto a rumang-ay dagiti ganggannaet nga agnanaed iti sakupyo idinto ta pumanglawto a pumanglaw ti kasasaadyo.
44Addanto kuarta nga ipautangda kadakayo ngem awanto ti maipautangyo kadakuada. Pagangayanna, iturayandakayto.
45“Agdissuorto amin dagitoy a didigra kadakayo. Agtalinaeddanto agingga a madadaelkayo agsipud ta dikay nagtulnog iti Apo a Diosyo, ket diyo tinungpal dagiti amin a lintegna nga intedna kadakayo.
46Dagitoyto ti pammaneknek iti agnanayon a panangukom ti Apo kadakayo ken kadagiti kaputotanyo.
47Binendisionannakayo ti Apo iti amin a banag ngem dikay met agserbi kenkuana a sipapasnek ken siraragsak.
48Agserbikayto ngarud kadagiti kabusor nga ibaon ti Apo a manggubat kadakayo. Mabisinan, mawaw, ken lamolamokayto. Nakakaasikayto. Nakaronto ti panangidadanes dagiti kabusor kadakayo agingga a mataykayo amin.
49Mangyegto ti Apo iti maysa a nasion a bumusor kadakayo. Aggapunto iti adayo a lugar a diyo maawatan ti pagsasaona. Kaslanto agila a mangseppeg kadakayo.
50Naranggasdanto ket awanto ti kaasianda, ubing man wenno nataengan.
51Ibusendanto dagiti animal ken dagiti apityo ket mataykayto iti bisin. Awanto ti ibatida a taraonyo, arak, lana ti olibo, animal wenno karnero ket mataykayto.
52Darupendanto dagiti amin nga ili iti daga nga ited kadakayo ti Apo a Diosyo. Marbanto dagiti nangato ken nasarikedkedan a bakud a pagtaltalgedanyo.
53“Inton madama ti pananglakub kadakayo dagiti kabusoryo, nakaronto unay ti panagbisinyo ket kanenyonto pay ketdin dagiti mismo nga annak nga imparabur kadakayo ti Apo a Diosyo.
54-55Uray ti kataknengan a lalaki a nagtaud iti nangato a familia, awanton asina bayat ti pananglakub dagiti kabusor ket kanennanto ti sumagmamano kadagiti annakna gapu ta awanen sabali a taraonna. Dinanto pay ibingayan ti kabsatna, wenno ti patpatgenna nga asawa wenno dagiti nabati nga annakna.
56-57Uray2 Ar. 6:28-29; Dung. 4:10. ti kataknengan a babai a nagtaud iti nangato a familia a baknang unay ket dina pay kayat idi ti magna no adda papananna, kastanto met ti aramidenna. Inton lakuben dagiti kabusor ti ilina, awanton ti asina ta sililimedto a kanenna ti maladaga a kaipaspasngayna ken uray pay ti kadkadua. Dinanto ibingayan ti ay-ayatenna nga asawa wenno uray ti maysa kadagiti annakna.
58“Tungpalenyo a sipapasnek ti amin a pannursuro ti Dios a naisurat iti daytoy a libro. Raemenyo ti nakaskasdaaw ken nakabutbuteng a nagan ti Apo a Diosyo.
59Ta no saan, yegnanto kadakayo ken iti kaputotanyo dagiti nakaro a sakit ken nadagsen a didigra a pulos a saan a mapasardeng.
60Yegnanto manen dagiti amin a sakit a kinabutbutengyo idi idiay Egipto, ket dikayto maimbagan.
61Yegnanto pay ti amin a kita ti sakit ken angol a saan a nailanad iti daytoy a libro ti linteg ken pannursuro ti Dios ket mataykayto amin.
62Uray no umadukayo a kas iti kaadu dagiti bituen, bassitto laeng ti makalasat kadakayo gapu ta dikay nagtulnog iti Apo a Diosyo.
63Naragsak ti Apo a nangparang-ay kadakayo ken nangpaadu iti bilangyo; kastanto met ti ragsakna a mangdadael ken mangpukaw kadakayo. Mapapanawkayto iti daga nga inkay tagikuaen.
64“Iwarawaranakayto ti Apo iti amin a suli ditoy lubong. Agserbikayto kadagiti didiosen a naaramid iti kayo wenno iti bato, didiosen a diyo pay nagdaydayawan ken di met nagdaydayawan dagidi kapuonanyo.
65Awanto ti masarakanyo a talna iti sadinoman a lugar. Awanto ti disso a makunayo a kukuayo. Madandanagankayto. Kanayonkayto a masikoran ket maawanankayto iti namnama.
66Kanayonto nga agpeggad ti biagyo. Aldaw-rabii nga agbutbutengkayonto. Kankanayonto a madandanagankayo a dumteng ni patay kadakayo iti uray ania nga oras.
67Agkebbakebbakayto iti buteng iti amin a makitayo. No dumteng ti bigat, seggaanyo ti rabii. No dumteng met ti rabii, seggaanyo ti bigat.
68Mailugankayto kadagiti barko ket isublinakayto ti Apo idiay Egipto nupay inkarina idi a saankayon nga agsubli sadiay. Kayatyonto a mailakokayo sadiay a kas tagabu kadagiti kabusoryo ngem awanto ti mayat a gumatang kadakayo.”
Who We AreWhat We EelieveWhat We Do
2025 by iamachristian.org,Inc All rights reserved.
